رسائی کے لنکس

'آئی پیڈ' تنازع: ایپل نےچینی کمپنی کو 6 کروڑ ڈالر ادا کردیے


چین میں واقع ایک 'ایپل اسٹور' کا منظر

چین میں واقع ایک 'ایپل اسٹور' کا منظر

ٹیکنالوجی کی معروف کمپنی 'ایپل' نے چین میں 'آئی پیڈ' کےٹریڈ مارک پر کھڑے ہونے والے تنازع کے حل کے لیے ایک مقامی کمپنی کو چھ کروڑ ڈالر ادا کردیے ہیں۔

پیر کو ایک چینی عدالت کی جانب سے جاری کیے جانے والے بیان میں کہا گیا ہے کہ 'ایپل' نے 'پرو وِیو ٹیکنالوجی' نامی کمپنی کو یہ رقم ثالثی کے نتیجے میں دونوں کمپنیوں کے درمیان ہونے والی مصالحت کے تحت دی ہے۔

مصالحت کے نتیجے میں دونوں کمپنیوں کے درمیان اس طویل عدالتی جنگ کا خاتمہ ہوگیا ہے جس کے ذریعے 'پرو وِیو ٹیکنالوجی'، 'ایپل' کو چین کے بعض علاقوں میں اس کا 'آئی پیڈ' نامی معروف ٹیبلٹ کمپیوٹر فروخت کرنے سے روکنے کی کوشش کر رہی تھی۔

عدالتی ریکارڈ کے مطابق 'پروویو ٹیکنالوجی' کی تائیوان شاخ ایک دہائی سے زائد عرصہ قبل 'آئی پیڈ' ٹریڈ مارک رجسٹرڈ کراچکی تھی جب کہ 'ایپل' نے اس نام سے اپنا 'ٹیبلٹ پی سی ' 2010ء میں متعارف کرایا تھا۔

گوکہ 'ایپل' نے 2009ء میں 'پرو ویو' سے 'آئی پیڈ' ٹریڈ مارک کے حقوق خرید لیے تھے لیکن چینی کمپنی کا دعویٰ ہے کہ اس نے 'ایپل' کو چین میں اس ٹریڈ مارک کے استعمال کے حقوق فروخت نہیں کیے تھے۔

یاد رہے کہ چین کی 'ٹیبلٹ کمپیوٹرز' کی مارکیٹ میں 'آئی پیڈ' کا حصہ 76 فی صد ہے اور کمپنی کی مصنوعات چین میں بہت مقبول ہیں۔
XS
SM
MD
LG