رسائی کے لنکس

فلپائن: زلزلے سے کم ازکم چھ افراد ہلاک 120 سے زائد زخمی


زلزلے کے باعث پل کا ایک حصہ منہدم ہو گیا

فلپائن کے جنوبی علاقے میں زلزلے سے کم ازکم چھ افراد ہلاک اور 120 سے زائد زخمی ہوگئے ہیں۔

حکام نے ہفتہ کو بتایا کہ جمعہ کو دیر گئے صوبہ سریگاؤ ڈیل نورٹے میں 6.5 شدت کے زلزلے سے متعدد عمارتوں اور ایک ہوائی اڈے کو بھی نقصان پہنچا۔

آتش فشاں اور زیر زمین تبدیلیوں سے متعلق فلپائن کے انسٹیٹیوٹ کے عہدیدار ریناٹو سولیڈم کے مطابق زلزلے کا مرکز سریگاؤ سے 14 کلومیٹر شمال مغرب میں 11 کلومیٹر زیر زمین تھا۔

زلزلے کے وقت لوگ سو رہے تھے لیکن طاقت ور جھٹکوں کے باعث وہ اپنے گھروں اور عمارتوں سے باہر نکل آئے۔

حکام کے بقول ہفتہ کی صبح تک 100 کے لگ بھگ بعد از زلزلہ جھٹکوں (آفٹر شاکس) نے لوگوں کو مزید خوفزدہ کر دیا ہے۔ متاثرہ علاقوں میں امدادی کام شروع کر گیا ہے۔

مرنے والوں کے بارے میں بتایا جاتا ہے کہ وہ زلزلے کے باعث عمارتوں کے منہدم ہونے سے موت کا شکار ہوئے۔

آفات سے نمٹنے کے صوبائی ادارے کے عہدیدار گلبرٹ گونزالیز نے امریکی خبر رساں ایجنسی "ایسوسی ایٹڈ پریس" کو بتایا کہ "ہم تاحال نقصانات اور جائزہ لے کر امدادی سرگرمیوں کا جائزہ لے رہے ہیں۔"

اس ساحلی شہر میں زلزلے سے زیادہ تر پسماندہ علاقوں میں گھروں اور اسکولوں کی عمارتوں کو نقصان پہنچا۔

امدادی کارکنان قریب ہی واقع پوکنوئے نامی دیہات میں بھی مصروف عمل ہیں تاکہ یہاں متاثر ہونے والوں کا بھی صحیح اندازہ لگایا جا سکے۔

شہر کے ہوائی اڈے کے رن وے پر زلزلے باعث دراڑیں پڑ گئی تھیں جس کے بعد ایئرپورٹ کو عارضی طور پر بند کر دیا گیا ہے۔

متاثرہ علاقے کے لوگوں سے کہا گیا ہے کہ وہ محفوظ مقامات کی طرف منتقل ہو جائیں۔

سولیڈم کے مطابق سریگاؤ میں اس سے قبل انیسویں صدی میں طاقتور ترین زلزلہ آیا تھا۔ 1990ء میں بھی شمالی جزیرہ لوزون میں 7.7 شدت کے زلزلے نے بڑے پیمانے پر تباہی مچائی تھی اور کم از کم 2000 افراد اس میں موت کا شکار ہوئے تھے۔

XS
SM
MD
LG