پولیس نے کہا ہے کہ جنوب مغربی ریاست مشی گن میں اس وقت پانچ سائیکل سوار ہلاک اور چار زخمی ہو گئے جب ایک پک اپ ویگن سائیکل سواروں کے گروپ میں جا گھسی۔
یہ حادثہ مشی گن کے ایک دیہاتی قصبے کلامازو میں پیر کو مقامی وقت کے مطابق شام ساڑھے چھ بجے پیش آیا۔ کلامازو کاؤنٹی کے پراسیکیوٹر جیفری ایس گیٹنگ کے مطابق پچاس سالہ ویگن ڈرائیور کو حراست میں لے لیا گیا ہے۔
پانچ سائیکل سوار موقعے پر ہی دم توڑ گئے جبکہ دیگر چار کو اسپتال لے جایا گیا۔ گیٹنگ کے مطابق زخمی اور ہلاک ہونے والوں کے اہل خانہ کو اطلاع دیے جانے سے قبل ان کی شناخت ظاہر نہیں کی جائے گی۔
مقامی ذرائع ابلاغ کے مطابق ایک سائیکل سوار کی حالت نازک ہے جبکہ ایک اور کی حالت خطرے سے باہر ہے۔ دیگر زخمیوں کی حالت کی ابھی کوئی واضح اطلاع موصول نہیں ہوئی۔
مقامی حکام کے مطابق حادثے کے بعد ڈرائیور ویگن کو وہیں چھوڑ کر فرار ہو گیا مگر بعد میں جائے حادثہ سے کچھ فاصلے پر اسے حراست میں لے لیا گیا۔
ابھی یہ واضح نہیں کہ سائیکل سواروں کا تعلق کہاں سے تھا اور ان کا آپس میں کیا رشتہ تھا۔