رسائی کے لنکس

بحری جہاز کے ذریعے آپ صرف 6دن میں سعودی عرب پہنچ سکیں گے۔ اس مقصد کے لئے، پاکستان کی وزارت پورٹس اینڈ شپنگ تیز ترین بحری جہازحاصل کر رہی ہے

ایسے تمام پاکستانی شہریوں کے لئے جو سفر حج پر لاکھوں روپے خرچ کرنے کی سکت نہیں رکھتے، خوشی کی خبر یہ ہے کہ وہ اب صرف 25 سے 30ہزار روپے خرچ پر حج کی سعادت حاصل کرسکیں گے۔۔ لیکن، ایسے عازمین کو ہوائی سفر کے بجائے بحری جہاز سے سفر کرنا ہوگا۔

گھبرایئے نہیں۔ بحری جہاز کے ذریعے آپ صرف 6دن میں سعودی عرب پہنچ سکیں گے۔ اس مقصد کے لئے، پاکستان کی وزارت پورٹس اینڈ شپنگ تیز ترین بحری جہازحاصل کر رہی ہے۔

وفاقی وزیر پورٹس اینڈ شپنگ، کامران مائیکل کا کہنا ہے کہ وزیراعظم میاں محمد نواز شریف کی جانب سے منظوری کے بعد، اگلے سال، یعنی 2015ء کے حج سیزن میں، اس منصوبے کا آغاز ہوجائے گا۔

پاکستان کے مؤقر اخبارات ’ایکسپریس‘ اور ’ٹری بیون‘ نے وفاقی وزیر کے حوالے سے رپورٹ دی ہے کہ اس منصوبے سے سب سے زیادہ فائدہ غریبوں اور کم آمدنی والے طبقے کو ہوگا، کیوں کہ اس وقت حج پر ساڑھے تین سے چار لاکھ روپے خرچہ آتا ہے۔ لیکن، بحری جہاز سے سفر پر صرف 25سے 30ہزار روپے خرچہ آئے گا، جبکہ اس میں کھانے پینے کا خرچ بھی شامل ہے۔

وفاقی وزیر کا کہنا ہے کہ تیز ترین بحری جہازوں کی خریداری کے لئے یورپی ممالک سے رابطہ کیا جارہا ہے۔ کسٹم اور امیگریشن کے معاملات پر بات چیت آخری مراحل میں ہے۔ حج پر جانے والے جہاز کے ذریعے تجارتی سامان کی بھی ترسیل ممکن ہوسکے گی اور کے لئے بزنس کمیونٹی سے الحاق پر زور دیا جارہا ہے۔

ایک سوال کے جواب میں وفاقی وزیر کا یہ بھی کہنا تھا کہ اگلے مرحلے میں بلوچستان سے ایران جانیوالے زائرین کو بھی بحری جہاز کے سفر کی سہولیات فراہم کی جائیں گی۔
XS
SM
MD
LG