رسائی کے لنکس

من موہن سنگھ واشنگٹن میں ہونے والی جوہری کانفرنس میں شرکت کریں گے

  • سہیل انجم

بھارتی وزیرِ اعظم من موہن سنگھ

بھارتی وزیرِ اعظم من موہن سنگھ

اِس بڑھتے ہوئے اندیشے کے تناظر میں کہ جوہری ہتھیار دہشت گردوں کے ہاتھوں میں پڑ سکتے ہیں، بھارتی وزیرِ اعظم من موہن سنگھ واشنگٹن کا دورہ کرنے والے ہیں، جہاں وہ 12اپریل سے شروع ہونے والی دو روزہ سربراہی کانفرنس میں شرکت کریں گے۔

کانفرنس میں 43ملکوں کے رہنما حصہ لے رہے ہیں اور اِس میں جوہری ہتھیاروں کے غلط ہاتھوں میں پڑنے سے روکنے کے اقدامات پر تبادلہٴ خیال کیا جائے گا۔

حکومت کے ذرائع کے مطابق بھارتی وزیرِ اعظم جوہری ہتھیاروں تک دہشت گردوں کی رسائی کے خطرے پر بھارت کی تشویش سے کانفرنس کو آگاہ کریں گے۔

وہ قانونی طریقہٴ کار اور دیگر ذرائع سے جوہری سازو سامان کے تحفظ کی ضرورت پر بھی زور دیں گے۔ اِس کے علاوہ توقع ہے کہ وہ بھارت میں بین الاقوامی جوہری حفاظتی مرکز کے قیام کی تجویز بھی سامنے رکھیں گے۔

تفصیلات بتاتے ہوئے سیکریٹری خارجہ نیروپامہ راؤ نے نامہ نگاروں سے کہا کہ جوہری تحفظ کے سلسلے میں بین الاقوامی عزم کے استحکام اور پُر امن مقاصد کے لیے جوہری توانائی کے استعمال کی حمایت کے تعلق سے اِس کانفرنس کی زبردست اہمیت ہے۔

نیروپامہ راؤ نے ایک سوال کے جواب میں بتایا کہ بھارت اور امریکہ کے مابین ری پروسیسنگ معاہدے پر، جس کے بارے میں مذاکرات مکمل ہوچکے ہیں، امریکہ کے ذریعے داخلی تبادلہٴ خیال کے بعد دستخط کیے جائیں گے۔

خیال رہے کہ اِس سلسلے میں بھارت کو بھی بعض ضابطے مکمل کرنے ہیں۔

XS
SM
MD
LG