رسائی کے لنکس

انگریزی سیکھئے: Sectarian

  • عابدہ رپلی

فرقے کا مطلب بعد میں آنا بھی سمجھا جاتا ہے اور کاٹنا بھی


آج کی خبر ہے:

Sectarian Fighting Erupts in Central Somalia

یعنی وسطی صومالیہ میں فرقہ وارانہ لڑائی چھڑ گئی۔

سیکٹیرین لفظ سَیکٹ (sect) سے مشتق ہے جس کا مطلب ہے کسی مذہب کے اندر پایا جانے والا کوئی فرقہ۔ مثال کے طور پر عیسائیت مذہب ہے اور کیتھولک، پروٹسٹنٹ، مورمن وغیرہ فرقے ہیں۔ یا جیسے یہودیت مذہب ہے اور آرتھوڈاکس، ریفارم وغیرہ فرقے۔ علم الاشتقاق کی کچھ لغات کہتی ہیں کہ یہ لفظ لاطینی سے آیا ہے جہاں یہ تھا سیکٹا جس کے کئی مطالب تھے، مثلاً راستہ، طریقہ، مکتبِ فکر۔

کچھ محققین کہتے ہیں کہ یہ لفظ پروٹو انڈویورپین سے آیا ہے جہاں یہ تھا sekow اور مراد تھی بعد میں آنا۔ چنانچہ اس کوsequel وغیرہ ایسے الفاظ کا سرچشمہ سمجھا جاتا ہے۔ جب کہ دوسروں کا کہنا ہے کہ یہ لاطینی لفظ secare سے نکلا ہے جس کا مطلب کاٹنا ہے اور اسی سے بعد میں section جیسے الفاظ مرتب ہوئے۔ یہ بات اس لئے قرین قیاس معلوم ہوتی ہے کہ سیکٹ کا کام بنیادی ڈھانچے سے کاٹ کر کسی چیز کو الگ کرنا ہے۔

ادھر اردو میں عام استعمال ہونے والے عربی لفظ فرقہ کا مفہوم بھی کاٹنا، تفریق کرنا، فرق پیدا کرنا، الگ کرنا ہی ہے۔

سو انگریزی میں فرقہ پسند انسان یا فرقے سے متعلق کسی تنظیم کے لئے اسم صفت ہوگا: sectary

اور اسے لفظ سیکرٹری سے خلط ملط نہیں کرنا چاہئے کیونکہ موخر الذکر کی بنیادsecret پر ہے اور یہ ایسے شخص کے لئے استعمال ہوتا ہے جس پر بھروسہ کر کے کسی دفتر یا تنظیم کے سارے راز اس کے حوالے کر دئے جائیں۔

XS
SM
MD
LG