رسائی کے لنکس

صدر اوباما کا کانگریس سے پہلا سالانہ خطاب


صدر اوباما نے اپنی تقریر میں قومی قرضے میں کمی کی کوششوں کے سلسلے میں آئندہ تین سالوں کے لیے حکومت کے اضافی اخراجات کو منجمد کرنے کی تجویز دی جس پر ان کی انتظامیہ 2011ء سے عملدرآمد شروع کرنے کے لیے تیار ہے۔ امریکی عہدے داروں کے مطابق اس اقدام کی بدولت آئندہ دس سالوں کے دوران 250 ارب ڈالرز کی بچت ہوگی۔

صدرباراک اوباما نے اپنے پہلے سٹیٹ آف دی یونین خطاب میں کانگریس پر زور دیا ہے کہ وہ صحت عامہ اور معیشت سے متعلق اُن کی قومی ترجیحات پرعمل کرے۔

بدھ کی شب ایوانِ نمائندگان اور سینٹ کے مشترکہ اجلاس سے سالانہ خطاب میں امریکی صدر نے قانون سازوں پر زور دیا کہ وہ مزید تاخیر کیے بغیر نوکریوں سے متعلق بل منظوری کے لیے ان کے پاس بھیجیں۔ انھوں نے کہا کہ امریکیوں کے لیے روزگار کے مواقع پیدا کرنا ان کی انتظامیہ کی اولین ترجیح ہے۔ صدر اوباما نے اس موقع پرامریکیوں کو کئی سالوں سے درپیش اقتصادی مسائل کے حل کے لیے طویل المعیاد معاشی ترقی کی ایک نئی بنیاد رکھنے کی ضرورت پر زور دیا۔

صدر اوباما کا مکمل خطاب سنیئے

Windows Media Audio »

انھوں نے صحت عامہ کے نظام میں وسیع پیمانے پر اصلاحات کے لیے اپنی جد وجہد جاری رکھنے کے عز م کا اظہار کرتے ہوئے کہا کہ اگر کانگریس نے اس بل کو منظورنہ کیا توبیمہ پالیسیوں پر اخراجات میں مسلسل اضافہ ہوتا چلا جائے گا جس سے امریکی بجٹ کا خسارہ بھی بڑھے گا۔

اپنی تقریر میں صدر اوباما نےاعتراف کیا کہ امریکہ کو سنگین چیلنجوں کا سامنا ہے جب کہ ان کے بعض فیصلوں کو سیاسی مقبولیت حاصل نہیں ہو سکی ہے۔

امریکہ میں بے روزگاری کی موجودہ شرح 10 فیصد اور بجٹ میں خسارہ کھربوں ڈالروں تک پہنچ چکا ہے جب کہ ایک سال قبل عوام میں انتہائی مقبول ہونے کی وجہ سے ملک کا صدر منتخب ہونے والے باراک اوباما کی مقبولیت میں بھی کمی آئی ہے۔

صدر اوباما نے اپنی تقریر میں قومی قرضے میں کمی کی کوششوں کے سلسلے میں آئندہ تین سالوں کے لیے حکومت کے اضافی اخراجات کو منجمد کرنے کی تجویز دی جس پر ان کی انتظامیہ2011ء سے عملدرآمد شروع کرنے کے لیے تیار ہے۔ امریکی عہدے داروں کے مطابق اس اقدام کی بدولت آئندہ دس سالوں کے دوران 250 ارب ڈالرز کی بچت ہوگی۔

صدر اوباما نے کہا کہ وہ ہم جنس پرستوں کی امریکی فوج میں بھرتی پر پابندی کے قانون کی منسوخی کے لیے بھی کام کریں گے۔ اس ”نہ پوچھو اور نہ بتاؤ“ کے قانون کے تحت ہم جنس پرستوں کوامریکی فوج میں بھرتی کیا جا سکتا ہے بشرطیکہ وہ اپنی جنسی ترجیحات کو راز میں رکھیں۔

اوباما کے سٹیٹ آف دی یونین خطاب پر اپنے فوری ردِعمل میں اپوزیشن رپبلکن پارٹی سے تعلق رکھنے والے ورجینیا کے گورنر باب میکڈانل نے کہا کہ وفاقی حکومت نے بہت کچھ کرنے کی کوشش میں امریکہ کی آنے والی نسلوں کے لیے قومی قرضے میں اضافہ کر دیا ہے۔ انھوں نے کہا کہ اصلاحات لائے بغیر سرکاری منصوبوں میں اضافے کی اوباما انتظامیہ کی پالیسی سے امریکی قوم کی آزادی اور خوشحالی خطرے میں پڑ سکتی ہے۔

حال ہی میں ریاست کے گورنر بننے والے میکڈانل کے بقول امریکی عوام ایک سستی اور ہرایک کی دسترس میں ہونے والی صحت عامہ کی پالیسی پر متفق ہیں لیکن وہ ہرگز یہ نہیں چاہتے کہ حکومت اس پالیسی کی نگرانی کرے۔

انھوں نے اوباما انتظامیہ کے ان اقدامات کو بھی شدید تنقید کا نشانہ بنایا جو 25 دسمبر کو کرسمس کے موقع پر ایک امریکی مسافر طیارے کو بم دھما کے سے اڑانے کی کوشش کرنے والے مشتبہ ملزم سے نمٹنے کے لیے کیے گئے ہیں۔

گورنر میکڈانل نے کہا کہ نائیجیریا سے تعلق رکھنے والے اس مشتبہ شخص پر امریکی عدالت میں مقدمہ چلانے کےحکومت کے فیصلے سے وہ متفق نہیں کیونکہ اس کی وجہ سے اس مشتبہ شخص نے تفتیش کاروں سے تعاون ختم کردیا ہے اور یوں قمیتی معلومات حاصل کرنے کا موقع گنوا دیا گیا۔ ان کے بقول امریکیوں کو دہشت گردوں کو شکست دینے پر پیسے خرچ کرنے چاہییں نہ کہ ان کا دفاع کرنے پر۔

XS
SM
MD
LG