نیوزی لینڈ اور پاکستان کے درمیان ہیملٹن میں کھیلے جانے والے پہلے ٹیسٹ میچ کے پہلے دن میزبان ٹیم نے کھیل کے اختتام پر سات وکٹوں کے نقصان پر 260 رنز بنائے ہیں۔
پاکستانی ٹیم کے کپتان مصباح الحق نے ٹاس جیت کرپہلے نیوزی لینڈ کوبیٹنگ کی دعوت دی تھی۔ سپن باؤلر عبدالرحمٰن نے 30 اوورز میں 51 رنز دے کر نیوزی لینڈ کے تین کھلاڑیوں کو آؤٹ کیا ہے۔
مہمان ٹیم کی طرف سے دوسرے کامیاب باؤلر تنویر احمد رہے جنھوں نے دو وکٹیں حاصل کیں جب کہ فاسٹ باؤلر عمر گل نے ایک کھلاڑی کو آؤٹ کیا۔
پہلے دن کا کھیل جب ختم ہوا تو نیوزی لینڈ کے بلے باز ویلیم سن اور ساؤتھی کریز پر موجود تھے۔
دونوں ٹیموں کے مابین دو ٹیسٹ میچ کھیلے جائیں گے۔
