رسائی کے لنکس

پاکستان نے چیمپیئنز ٹرافی ہاکی ٹورنامنٹ میں آٹھ سال بعد کانسی کا تمغہ حاصل کیا اور ٹیم کی کارکردگی پورے ٹورنامنٹ میں قابل قدر رہی۔

سال 2012 میں جہاں پاکستان کو کئی مسائل و سانحات کا سامنا رہا وہیں سال 2012 نے پاکستان کو کئی کامیابیوں سے ہمکنار بھی کیا۔ پاکستان کو ملنے والی ان کامیابیوں سے ملک کا نام عالمی سطح پر اجاگر ہوا۔

امن کی ننھی سفیر اور لڑکیوں کی تعلیم کیلئے آواز اٹھانے والی ملالہ پر حملے کے بعد اقوام متحدہ کے سیکرٹری جنرل بان کی مون نے 10 نومبر کو ’ملالہ ڈے‘ منانے کا اعلان کیا، اقوام متحدہ کے تحت ملالہ کی ہمت و بہادری کو مد نظر رکھتے ہوئے رواں سال 10نومبر کو پاکستان سمیت دنیا بھر میں پہلا ملالہ ڈے منایا گیا، جسے ہر سال منانے کا اعلان بھی کیا گیا۔

پاکستانی طالبہ سنبل سید او-لیول کے انگریزی لٹریچر کے امتحان میں اعلیٰ ترین اعزاز سے کامیابی حاصل کرکے دنیا بھر میں سرفہرست رہیں۔

پاکستان کو ایک اور اعزاز تب ملا جب تیزاب سے متاثرہ خواتین پر بنائی گئی ’سیونگ فیس‘ نامی ڈاکیومینٹری فلم پر شرمین عبید چنائے کو ’آسکر ایوارڈ‘ دیا گیا۔

ایک اور پاکستانی نوجوان موسیٰ فیروز نے ریاضی کے عالمی آن لائن امتحان میں پہلی پوزیشن حاصل کر کے پاکستان کو اعزاز سے نوازا اور آسٹریلوی حکومت کی جانب سے اُنھیں اسناد سے نوازا گیا۔

آرٹ اور ملٹی میڈیا مقابلوٕں کی بات کی جائے تو اس میں پاکستانی پیش پیش رہے ہیں، جب کہ اپیس فاوٴنڈیشن اسٹوڈنٹ آرٹ کے مقابلوں میں حصہ لینے والے طالب علموں نے کامیابی حاصل کی۔

پاکستان کے ہونہار طالب علم سکندر محمود نے ’مائیکروسافٹ‘ اور ’گوگل‘ کے سات نئے کمپیوٹر آپریٹرنگ سسٹم بناکر عالمی سطح پر پاکستان کو اعزاز سے نوازا۔

میٹرک کے طالب علم، شاداب رسول نے بین الاقوامی سطح پر ہونےوالے ماحولیاتی مقابلے میں دوسری پوزیشن حاصل کی۔


اسلامی ممالک کی سائنٹیفک اینڈ کلچرل آرگنائزیشن نے رواں برس سائنس اور ٹیکنالوجی کا انعام پاکستانی پروفیسر تصور حیات کو دیا۔

اسپورٹس کے مقابلوں میں بھی پاکستان نے پوری دنیا میں اپنا لوہا منوایا۔ دیگر کھیلوں کے ساتھ ساتھ پاکستان کا قومی کھیل ’ہاکی‘ بھی اس سال نمایاں رہا۔ پاکستان نے چیمپیئنز ٹرافی ہاکی ٹورنامنٹ میں آٹھ سال بعد کانسی کا تمغہ حاصل کیا اور ٹیم کی کارکردگی پورے ٹورنامنٹ میں قابل قدر رہی۔

سنوکر کے عالمی مقابلے میں 18 سال بعد پاکستان عالمی چیمپیئن بنا۔ محمد آصف نے سنوکر مقابلے کے آخری معرکے میں برطانوی کھلاڑی گیری ولسن کو شکست دے کر یہ عالمی اعزاز پاکستان کے نلیے حاصل کیا۔

دوسری جانب، ایشیائی ممالک کے مابین ہونےوالے کبڈی کے مقابلوں میں پاکستان نے اپنے روایتی حریف ہندوستان کو شکست دی اور ایشیائی سطح پر کبڈی کی یہ چیمپئن شپ جیت لی۔

پنجاب یوتھ فیسٹیول 2012 ءمیں 42810 نوجوانوں نے قومی پرچم کی شکل میں ایک ساتھ کھڑے ہوکر قومی ترانہ پڑھنے کا عالمی ریکارڈ قائم کیا، اور یوتھ فیسٹیول میں منعقدہ کھیلوں کے مقابلوں میں آٹھ عالمی ریکارڈ بنائے، جسے عالمی سطح پر خوب پذیرائی حاصل ہوئی اور پاکستانی طلبا کو اعزازت اور میڈلز سے نوازا گیا۔

تبصرے دکھائیں

XS
SM
MD
LG