رسائی کے لنکس

انتخابات وقت پر ہی ہوں گے:کائرہ


وفاقی وزیر اطلاعات قمر زمان کائرہ

وفاقی وزیر اطلاعات قمر زمان کائرہ

وزیراطلاعات قمر زمان کائرہ نے کہا کہ آئندہ انتخابات سے قبل عبوری حکومت کے قیام سمیت تمام معاملات پر آئین کے مطابق فیصلے کیے جائیں گے اور سیاسی جماعتوں سے مشاورت کا عمل بھی جاری رہے گا۔

پاکستان میں حالیہ ہفتوں میں دہشت گرد حملوں میں شدت آئی ہے اور پشاور میں فضائی تنصیبات پر حملوں، خیبر پختونخواہ کے سینیئر وزیر بشیر بلور کی خودکش حملے میں ہلاکت اور اس سے قبل کراچی اور ملک کے شمال مغربی علاقوں میں پولیو ٹیموں پرفائرنگ کے واقعات کے بعد پیدا ہونے والی صورت حال کے تناظر میں بعض حلقوں کی جانب سے آئندہ عام انتخابات کے انعقاد کے التوا کے خدشات کا اظہار کیا جا رہا ہے۔

لیکن حکمران جماعت پیپلز پارٹی کے سینیئر رہنماء اور وزیر اطلاعات قمر زمان کائرہ نے بدھ کو اپنی جماعت کے کارکنوں کے اجتماع سے خطاب میں کہا کہ ملک کے مسائل کا حل جمہوریت کے تسلسل میں ہے۔

’’انتخابات میں تاخیر نہیں ہو گی، الیکشن وقت پر ہوں گے اور پاکستان کے عوام کی مرضی سے ملک کے حکمران بنیں گے۔‘‘

اُنھوں نے کہا کہ آئندہ انتخابات سے قبل عبوری حکومت کے قیام سمیت تمام معاملات پر آئین کے مطابق فیصلے کیے جائیں گے اور مشاورت کا عمل بھی جاری رہے گا۔

قمر زمان کائرہ نے حکمران پیپلز پارٹی پر بدعنوانی کے الزامات کو مسترد کرتے ہوئے کہا کہ شواہد کے بغیر ایسے بیانات کی کوئی حیثیت نہیں ہوتی۔

حکومت کے اہم وزیر نے یہ بیان ایسے وقت دیا ہے جب پیپلز پارٹی کی مقتول رہنماء بے نظیر بھٹو کی برسی میں شرکت کے لیے ان کی جماعت کے کارکن گڑھی خدا بخش پہنچنا شروع ہو گئے ہیں جہاں بینظیر بھٹو کے بیٹے اور پارٹی کے چیئرمین بلاول بھٹو زرداری 27 دسمبر کو خطاب کریں گے۔
XS
SM
MD
LG