رسائی کے لنکس

کینساس میں تارکین وطن پر حملے کی مبینہ سازش، تین گرفتار


گارڈن سٹی

گارڈن سٹی

قائم مقام وفاقی اٹارنی، ٹام بیئل نے کینساس کے شہر وچیٹا میں اخباری نمائندوں کو بتایا کہ کرٹس ایلن، گیون رائیٹ اور پیٹرک اسٹائین پر داخلی دہشت گردی کا الزام عائد کیا گیا ہے

امریکی محکمہ انصاف کا کہنا ہے کہ جمعہ کو ریاست کینساس کے شہر گارڈن سٹی میں تین مشتبہ افراد کو گرفتار کیا گیا۔

ان افراد پر ایک مسجد اور ایک رہائشی تنصیب پر مبینہ حملے کا منصوبہ تیار کرنے کا الزام ہے۔

قائم مقام وفاقی اٹارنی ٹام بیئل نے کینساس کے شہر وچیٹا میں اخباری نمائندوں کو بتایا کہ کرٹس ایلن، گیون رائیٹ اور پیٹرک اسٹائین پر داخلی دہشت گردی کا الزام عائد کیا گیا ہے۔

اِن تین افراد کو کینساس کے شہر، لبرل میں گرفتار کیا گیا، جو گارڈن سٹی کے جنوب میں تقریباً 65 میل دور واقع ہے۔

تفتیش میں ایک خفیہ ایجنٹ نے مدد کی اور حکام کو اِن افراد کے عزائم کے بارے میں اطلاع فراہم کی۔

بیئل نے کہا کہ اِن افراد نے اُن مقامات کو ہدف بنانے کا منصوبہ تیار کیا جہاں صومالی مہاجرین مقیم ہیں۔

اُنھوں نے بتایا کہ اِن مشتبہ افراد نے ہتھیار اور بارود اکٹھا کیا تھا اور بارود سے لدی موٹر گاڑیاں گارڈن سٹی کی ایک اپارٹمنٹ بلڈنگ کے چاروں اطراف کھڑی کرنا چاہتے تھے، جہاں تقریباٍ 120 افراد مقیم ہیں۔

بیئل نے بتایا کہ یہ حملہ 9 نومبر کو کیا جانے والا تھا، جس سے ایک روز قبل امریکی صدارتی انتخابات ہونے والے ہیں۔

اُنھوں نے کہا کہ اِن افراد کا تعلق ایک تنظیم سے ہے، جس کا نام 'کروسیڈرز' ہے جس کے لیے اُنھوں نے بتایا کہ ''یہ نفرت اور تشدد کے رویے پر یقین رکھتی ہے''۔

سزا کی صورت میں اِن تین مشتبہ افراد کو زیادہ سے زیادہ عمر قید ہو سکتی ہے۔

XS
SM
MD
LG