رسائی کے لنکس

فلوریڈا: نائٹ کلب میں فائرنگ، 50 افراد ہلاک متعدد زخمی


حکام کے مطابق مشتبہ حملہ آور کی شناخت عمر متین کے نام سے ہوئی ہے جو فلوریڈا کے علاقے سینٹ لوسی کا رہائشی تھا۔

امریکہ کی ریاست فلوریڈا میں اتوار کو ایک مشہور نائٹ کلب میں فائرنگ سے 50 افراد ہلاک اور 53 سے زائد زخمی ہو گئے ہیں۔

اورلینڈو میں پولیس کے مطابق فائرنگ کا یہ واقعہ "پلس اورلینڈو" کلب میں پیش آیا جو کہ ہم جنس پرستوں کا ایک مقبول نائٹ کلب ہے۔

پولیس کے سربراہ جان منا کے مطابق حملہ آور کے پاس ایک مشکوک آلہ تھا اور کلب میں داخل ہونے پر اس کا وہاں موجود ایک سکیورٹی افسر کے ساتھ فائرنگ کا تبادلہ ہوا۔

بعد ازاں حملہ آور نے یہاں کچھ لوگوں کو یرغمال بھی بنایا لیا۔

جان منا صحافیوں کو تفصیلات سے آگاہ کر رہے ہیں

جان منا صحافیوں کو تفصیلات سے آگاہ کر رہے ہیں

ان کے بقول پولیس کا خصوصی دستہ جائے وقوع پر پہنچا اور اس دوران حملہ آور اور اہلکاروں کے درمیان فائرنگ کا تبادلہ ہوا جس سے حملہ آور موقع پر ہلاک ہو گیا۔

اورلینڈو کے میئر بڈی ڈائر نے صحافیوں سے گفتگو میں ہلاک و زخمی ہونے والوں کی تعداد کی تصدیق کرتے ہوئے کہا کہ جائے وقوع پر "ہر طرف خون ہی خون بکھرا ہے۔"

حکام کے مطابق مشتبہ حملہ آور کی شناخت عمر متین کے نام سے ہوئی ہے جو فلوریڈا کے علاقے سینٹ لوسی کا رہائشی تھا۔

بتایا جاتا ہے کہ عمر کا خاندان افغانستان سے آکر یہاں آباد ہوا تھا اور وہ امریکہ میں ہی پیدا ہوا تھا۔

مقامی طبی مرکز میں زخمیوں کے لیے کیے گئے انتظامات

مقامی طبی مرکز میں زخمیوں کے لیے کیے گئے انتظامات

وفاقی تحقیقاتی ادارے "ایف بی آئی" کے ترجمان ڈینی بینکس نے پریس کانفرنس کرتے ہوئے بتایا کہ فائرنگ کے اس واقعے کی دہشت گرد کارروائی کے طور پر تفتیش کی جا رہی ہے۔ ان کے بقول حکام یہ تعین کرنے کی کوشش کر رہے ہیں کہ آیا یہ مقامی یا بین الاقوامی دہشت گردی کا معاملہ ہے اور کیا حملہ آور اس میں اکیلا ہی ملوث تھا۔

امریکی خبر رساں ایجنسی نے ایک عینی شاہدین میں شامل ایک شخص جان الامو کے حوالے سے بتایا کہ وہ کلب کے عقبی جانب موجود تھے کہ انھوں نے ایک شخص کو اسلحے کے ساتھ سامنے سے آتے ہوئے دیکھا۔ "میں نے 20، 40، 50 گولیاں چلنے کی آوازیں سنیں اور موسیقی بند ہوگئی۔"

ایک اور شخص روب رک نے بتایا کہ یہ واقعہ رات دو بجے کے قریب کلب کے بند ہونے سے کچھ دیر قبل پیش آیا۔ "سب لوگ اپنے اپنے مشروبات ختم کرنے والے تھے۔"

کلب نے اپنے فیس بک پر فوری طور پر پیغام لکھا کہ لوگ یہاں سے نکلیں اور بھاگ جائیں۔

پولیس نے مقامی رہائشیوں کو اس مقام سے دور رہنے کا انتباہ جاری کیا ہے۔

یہ امر قابل ذکر ہے کہ ایک روز قبل ہی اورلینڈو میں ایک نوجوان گلوکارہ کو پرفامنس کے بعد ایک شخص نے فائرنگ کر کے ہلاک کر دیا تھا۔

XS
SM
MD
LG