رسائی کے لنکس

logo-print

انڈین پریمئرلیگ کی افتتاحی تقریب میں بھارتی فنکاروں کی شاندار پرفارمنس


جنوبی بھارت کا مشہور شہر چنائی منگل کی شام اس وقت رنگا رنگ روشنیوں سے نہا گیا جب وائی ایم سی اے کالج آف فزیکل ایجوکیشن میں انڈین پریمئر لیگ کا آغاز ہوا جس میں کرکٹ اور فلمی دنیا کے ایک سے بڑھ کر ایک شہرہ آفاق ستاروں نے اپنی پرفارمنگ سے اسٹیج کو جگمگادیا۔

اسٹیج پر ایک کے بعد ایک ہٹ اور سپرہٹ اسٹار آکر اپنی پرفارمنس دیتا رہا۔ آغاز ہوا امیتابھ بچن کی شاندار آواز سے ۔ انہوں نے ایک ہندی کویتا(نظم) پڑھ کر سب کو مدہوش سا کردیا۔ ادھر پریانکا چوپڑا نے ایک گانے پر رقص کیا تو دوسری جانب انہوں نے اپنی چٹ پٹی باتو ں سے کرکٹ اسٹارز کو بھی رجھایا۔

کرینہ کپور نے اپنی پچھلے سال کی ہٹ فلم ”را۔ون“ کا ہٹ گیت ”چھمک چھلو“ پرفارم کیا تو پورا ہال تالیوں اور سٹیوں سے گونج اٹھا۔ انہوں نے ایک دو اور گانے بھی پرفارم کئے جس پر سیکڑوں کی تعداد میں موجود ناظرین جھوم اٹھے۔ کرینہ کے علاوہ سلمان خان بھی اس تقریب کی شان بڑھانے ممبئی سے چنائی پہنچے ہیں ۔ تقریب میں اپنے مخصو ص ڈانس اسٹیپس میں مہارت رکھنے والے پربھودیو نے بھی پرفارم کیا۔

ملکی فنکاروں کے ساتھ ساتھ معروف امریکی پاپ اسٹار کیٹی پیری بھی دیگر کئی مشہور فلمی ستاروں کے ساتھ افتتاحی تقریب میں شرکت کی غرض سے چنائی میں موجود ہیں۔یہ ان کا پہلا بھارتی دورہ ہے۔ کلونیئل کزنزکے تذکرے کے بغیر یہ تقریب ادھوری ہوتی لہذا انہوں نے بھی پرفارم کیا اور خوب داد وصول کی۔

چنائی کے وائی ایم سی اے گراوٴنڈ میں ہونے والی افتتاحی تقریب کو دیکھنے کے لئے ہزاروں افراد کی بھیڑ موجود ہے۔ ٹوئنٹی ٹوئنٹی کرکٹ لیگ میں میچزکا آغاز چار اپریل سے ہوگا۔9 ٹیموں کے درمیان 54 دنوں تک مقابلے ہوں گے جبکہ حسب روایات کوئی ایک ٹیم ایک ٹورنامنٹ کی فاتح ہوگی۔

آپ کی رائے

تبصرے دکھائیں

XS
SM
MD
LG