آچر چوٿين ڊسمبر تي ’سنڌي ٽوپي اجرڪ’ جو ڏينهن ملهايو ويو، جنهن کي ’قومي ايڪتا جو ڏهاڙو’ يا ’سنڌي ثقافتي ڏينهن’ جي طور تي تمام وڏي چاه، شوق ۽ اهتمام سان ملهايو ويو، جيڪو نه صرف پاڪستان ۾ بلڪه، ميڊيا جي اطلاعن مطابق، ڏيهه پرڏيهه ۽ دنيا جي ڪيترن ئي وڏن ۽ ننڍن شهرن ۾ ملهايو ويو.
سال 2010 کان وٺي اڄ تائين ان ڏينهن کي باقاعدگيءَ سان ملهايو پيو وڃي، جنهن ۾ هر سال واڌ ايندي پئي وڃي.
هتي واشنگٽن ڊي سي جي ميٽروپوليٽن ايريا وارن سنڌين آچر ڏينهن سيءَ جي مند ۾ ورجينيا جي هڪ ريستوران ۾’سنڌي ٽوپي اجرڪ ڊي’ جي طور تي ڏينهن ملهايو، جنهن جو اهتمام سنڌي ايسو سي ايشن آف نارٿ آمريڪا پاران ۽ سرگرم مڪاني سنڌين ڪيو جن ۾ ٻين کان سواءِ ڊاڪٽر حفيظ عباسي، عطاالله شيخ، شعيب ڀٽو، مشتاق راڄپر، منصور قريشي، مقبول سومرو، نياز شر، نور مصطفي، سرفراز ميمڻ ۽ نصر الله شيخ شامل هيا. ڏينهن جي مناسبت سان ڪافي ڪٽنب شريڪ ٿيا جن کي اجرڪ جا وڳا ۽ سنڌي ٽوپي پاتل هئي.
ڊاڪٽر حفيظ عباسيءَ ان تقريب ۾ تقرير ڪندي ان ڏهاڙي جي اهميت تي روشني وجهندي چيو ته سال 2009 ۾ آصف علي زرداريءَ پاران پاڪستان جي صدر جي حيثيت ۾ سنڌي وڳي ۾ افغانستان جو سرڪاري دورو ڪرڻ کان پوءِ هڪ طبقي پاران ان تي ملڪ ۾ ٿيندڙ تنقيد جي نتيجي ۾ هن ڏهاڙي جي شروعات ٿي، جيڪو هاڻي هڪ ڏڻ جو روپ ڌاري چڪو آهي. ان سلسلي ۾ هن علي قاضي ۽ حسن پيرزادي جي ليک ۽ دلچسيءَ جو حوالو ڏنو. هن چيو ته هاڻي اهو ڏينهن هر هنڌ ڊسمبر جي پهرئين هفتي ۾ ملهايو ويندو آهي.
اطلاعن مطابق، دنيا جي ڪيترن ئي اهم گاديءَ وارن هنڌن ۽ وڏن شهرن ۾ هن ڏينهن کي شاندار نموني سان ريليون ڪڍي، سنڌي ويس پائي ۽ جهمريون هڻي ملهايو ويو.
هوڏانهن ميڊيا رپورٽن مطابق، سنڌ ۾ ڏينهن ملهائڻ جو انداز هن ڀيري اڳي کان به سوايو هو، جنهن ۾ ڪشمور کان ڪيٽي بندر ۽ ڪراچي، ۽ کيرٿر کان ڪارونجهر تائين، جهنگ جهر، ڳوٺ، واهڻ ۽ ننڍي وڏي شهر جي ڪنڊ ڪڙڇ ۾مچ ڪچري، سهپ، ڏاهپ، ايڪي ۽ قومي ڪاڄ جي طور تي ملهايو ويو.
