سنگاکارا ایک بار پھر ڈبل سینچری نہ بنا سکے

کولمبو میں جاری دوسرے کرکٹ ٹیسٹ میچ میں سری لنکا کے بلے باز کمارا سنگاکارا ایک بار پھر صرف آٹھ رنز کے فرق سے ڈبل سینچری بنانے میں کامیاب نہ ہوسکے۔

پہلے ٹیسٹ میچ میں بھی قسمت نے سنگاکارا کے ساتھ یاوری نہ کی اور وہ 199 رنز کے ساتھ ناٹ آؤٹ رہے۔

بدھ کو پاکستان کےخلاف دوسرے ٹیسٹ میچ کے آخری روز سری لنکا کی ٹیم نے 278 رنز پانچ کھلاڑی آؤٹ پر اپنی اننگز دوبارہ شروع کی لیکن سوائے میتھیوز کے کوئی بلے باز بھی زیادہ دیر مخالف باؤلروں کے سامنے جم کر نہ کھیل سکا۔ میتھیوز نے 47 رنز بنائے۔

میزبان ٹیم کے تین بلے باز بغیر کوئی رن بنائے پویلین لوٹ گئے اور پوری ٹیم 391 رنز بنا کر آؤٹ ہوگئی۔ سنکگارا 192 اور دلشان 121 رنز کے ساتھ نمایاں بلے باز رہے۔

پاکستان کی طرف سے جنید خان نے 5، عبدالرحمن نے 4 اور سعید اجمل نے ایک وکٹ حاصل کی۔

اس سے قبل پاکستانی ٹیم نے اپنی پہلی اننگز 551 رنز چھ کھلاڑی آؤٹ پر ختم کرنے کا اعلان کیا تھا۔ اس اننگز کی قابل ذکر بات محمد حفیظ کے 196 اور اظہر علی کے 157 رنز تھے۔

تین ٹیسٹ میچوں کی سیریز میں سری لنکا کو ایک، صفر سے برتری حاصل ہے۔