دوسرا ٹیسٹ ہار جیت کے فیصلے کے بغیر ختم

کولمبو میں کھیلا جانے والا دوسرا کرکٹ ٹیسٹ میچ ہار جیت کے فیصلے کے بغیر ختم ہوگیا۔

میچ کےآخری روز سری لنکا کے پوری ٹیم مہمان ٹیم کی پہلی اننگز کے اسکور 551 رنز کے جواب میں 391 رنز بنا کر آؤٹ ہوگئی۔

پاکستان نے 100 رنز دو کھلاڑی آؤٹ پر اپنی دوسری اننگز ختم کرنے کا اعلان کرتے ہوئے میزبان ٹیم کو جیت کے لیے 261 رنز کا ہدف دیا۔

لیکن سری لنکا کی ٹیم کھیل کے اختتام تک دو وکٹوں کے نقصان پر 86 رنز بنا سکی۔

پاکستان کے باؤلر جنید خان کو میچ کا بہترین کھلاڑی قرار دیا گیا۔

اس میچ میں سری لنکا نے ٹاس جیت کر مہمان ٹیم کو پہلے بیٹنگ کی دعوت دی تھی جس نے پہلے ٹیسٹ میچ کے برعکس پراعتماد اور ذمہ دارانہ بیٹنگ کرتے ہوئے 551 رنز چھ کھلاڑی آؤٹ پر اننگز ڈکلیئر کردی تھی۔

تین ٹیسٹ میچوں کی سیریز میں سری لنکا کو ایک، صفر سے برتری حاصل ہے۔

سیریز کا تیسرا اور آخری ٹیسٹ میچ آٹھ جولائی کو پالی کیلے میں کھیلا جائے گا۔