پاکستان میں کرونا وائرس کا پانچواں کیس رپورٹ
پاکستان میں کرونا وائرس سے متاثرہ ایک اور مریض کی نشاندہی کے بعد ملک میں اب اس وبا سے متاثرہ افراد کی کل تعداد پانچ ہو گئی ہے۔
کرونا وائرس سے متاثرہ مریضہ کی شناخت گلگت بلتستان کی 45 سالہ رہائشی کے طور پر ہوئی ہے جنہیں ہفتے کو گلگت کے ڈسٹرکٹ اسپتال لایا گیا تھا۔
مریضہ کا کرونا وائرس کا ٹیسٹ مثبت آنے کے بعد انہیں اسپتال میں قائم آئیسولیشن وارڈ میں منتقل کر دیا گیا ہے۔
منگل کو وزیر اعظم کے معاون خصوصی برائے صحت ڈاکٹر ظفر مرزا نے اپنے ٹوئٹ میں کرونا وائرس سے متاثرہ پانچواں مریض سامنے آنے کی تصدیق کی اور کہا کہ مریض کی حالت خطرے سے باہر ہے۔
'ہاتھ نہ ملائیں، بوسے سے گریز کریں:' کرونا وائرس دنیا کی عادات اور روایات پر اثر انداز
لوگوں کو ہاتھ ملانے سے منع کریں اور گال سے گال ٹکرانے یا بوسہ دے کر ملنے سے گریز کریں جب کہ گلے ملنے کا تو سوچیں ہی نہ۔ کیوں کہ کرونا وائرس کے پھیلاؤ کے خطرے کے پیشِ نظر دنیا بھر میں مختلف ممالک اپنے شہریوں کو کچھ ایسی ہی ہدایات دے رہے ہیں۔
کرونا وائرس کا خطرہ اتنا بڑھ چکا ہے کہ لوگ اپنی روایتیں اور عادات بدلنے پر مجبور ہو گئے ہیں۔ گھر، دفاتر اور عبادت گاہوں میں بھی لوگ دوسروں سے ملنے میں احتیاط برت رہے ہیں تاکہ کرونا وائرس کے پھیلاؤ کو روکا جا سکے۔
خبر رساں ادارے 'اے ایف پی' نے کرونا وائرس کی وجہ سے لوگوں کی تبدیل ہوتی عادات کا جائزہ لیا ہے۔ دیکھیے وہ کیا ہیں۔
اٹلی: ڈاکٹر اور اعلیٰ عہدے دار کرونا وائرس میں مبتلا، تعداد 1700 ہو گئی
اٹلی میں کرونا وائرس کے تیزی سے پھیلاؤ کی صورت حال صحت کے نظام کے لیے اتنی بحرانی ہو گئی ہے کہ انتظامیہ کو مریضوں کی دیکھ بھال اور علاج کے لیے غیر معمولی اقدامات کرنے پڑ رہے ہیں، جن میں ریٹائرڈ ڈاکٹروں کو واپس بلانا اور زیرتربیت نرسوں کو وقت سے پہلے گریجویٹ کرنا شامل ہیں۔
اٹلی کے شمالی علاقے لومبارڈے میں ملک کے کل 1694 تصدیق شدہ مریضوں میں سے 984 کا تعلق اسی علاقے سے ہے۔ اور اس سے بھی زیادہ خطرے کی بات یہ ہے کہ 10 فی صد ڈاکٹر اور نرسیں ڈیوٹی پر نہیں ہیں کیونکہ ان میں کرونا وائرس کا ٹیسٹ پازیٹو آنے کے بعد انہیں قرنطینہ میں بھیج دیا گیا ہے۔
عہدے داروں کا کہنا ہے کہ کم از کم اگلے ہفتے تک کرونا وائرس کے مریضوں کی تعداد میں اضافہ جاری رہے گا کیونکہ اس کی روک تھام کے لیے کیے جانے والے اقدامات کے نتائج کے اس کے بعد سامنے آنا شروع ہوں گے۔
لومباڈے میں اسپتالوں کے لیے بحرانی کیفیت پیدا ہو چکی ہے کیونکہ لوڈی اور کرمونا کے اسپتالوں میں جگہ نہیں رہی جب کہ نئے مریضوں کی آمد کا سلسلہ جاری ہے۔
اٹلی کے شمالی علاقے لومبارڈے میں ملک کے کل 1694 تصدیق شدہ مریضوں میں سے 984 کا تعلق اسی علاقے سے ہے۔ اور اس سے بھی زیادہ خطرے کی بات یہ ہے کہ 10 فی صد ڈاکٹر اور نرسیں ڈیوٹی پر نہیں ہیں کیونکہ ان میں کرونا وائرس کا ٹیسٹ پازیٹو آنے کے بعد انہیں قرنطینہ میں بھیج دیا گیا ہے۔
عہدے داروں کا کہنا ہے کہ کم از کم اگلے ہفتے تک کرونا وائرس کے مریضوں کی تعداد میں اضافہ جاری رہے گا کیونکہ اس کی روک تھام کے لیے کیے جانے والے اقدامات کے نتائج کے اس کے بعد سامنے آنا شروع ہوں گے۔
لومباڈے میں اسپتالوں کے لیے بحرانی کیفیت پیدا ہو چکی ہے کیونکہ لوڈی اور کرمونا کے اسپتالوں میں جگہ نہیں رہی جب کہ نئے مریضوں کی آمد کا سلسلہ جاری ہے۔
کرونا وائرس کا خطرہ، جنیوا کا سالانہ آٹو شو منسوخ
سوئٹزرلینڈز کی حکومت کی جانب سے کرونا وائرس کے پھیلاؤ کے خطرے کے پیش نظر تمام بڑی سطح کی تقریبات پر فوری پابندی کے اعلان کے بعد جنیوا میں ہونے والا آٹو شو منسوخ کر دیا گیا ہے۔
جنیوا میں پانچ سے پندرہ مارچ تک بین الاقوامی آٹو شو منعقد ہوتا ہے جس میں ہزاروں افراد شرکت کرتے ہیں۔ اس تقریب کی وجہ سے سوئس حکومت کو دو سو سے ڈھائی سو ملین سوئس فرانکس کی آمدنی ہوتی ہے۔
سوئٹزرلینڈز میں اب تک کرونا وائرس کے 15 مریضوں کی تصدیق ہو چکی ہے۔اس ملک کی سرحدیں اٹلی کے ساتھ ملتی ہیں جہاں کرونا وائرس کا شدید حملہ رپورٹ کیا گیا ہے۔ وہاں مریضوں کی تعداد 11 سو سے زیادہ بتائی جا رہی ہے جب کہ 29 ہلاکتیں ہو چکی ہیں۔
