کرونا وائرس: دفاتر اسکول بند، کاروبار محدود، کھیل ملتوی، تقریبات منسوخ
امریکہ میں کروناوائرس کے مریضوں کی تعداد ایک ہزار سے زیادہ ہوگئی ہے جس کے بعد دفاتر اور تعلیمی ادارے بند، کاروباری سرگرمیاں محدود، کھیلوں کے مقابلے ملتوی اور ثقافتی تقریبات منسوخ کی جا رہی ہیں۔
نیویارک میں کروناوائرس کو کنٹرول کرنے کے لیے شیڈول کانفرنس کرونا وائرس کی وجہ سے منسوخ کردی گئی ہے۔ وائرس سے سب سے زیادہ متاثر ریاست واشنگٹن نے سیاٹل میں 250 سے زیادہ افراد کے اجتماع پر پابندی لگادی گئی ہے۔ اس پابندی سے چالیس لاکھ آبادی متاثر ہوگی۔
امریکی حکومت اس بارے میں سوچ بچار کر رہی ہے کہ ہنگامی صورتحال میں 21 لاکھ سرکاری ملازمین کو کیسے دفاتر سے دور گھر سے کام کرنے کے قابل بنایا جائے۔ بدھ کو امریکی انتظامیہ کے حکام ٹیکنالوجی کمپنیوں کے نمائندوں کے ساتھ ملاقات کریں گے۔ کئی سرکاری اداروں میں پہلے ہی ٹیلی ورک کا آغاز کیا جا چکا ہے، جبکہ سیکورٹیز اینڈ ایکسچینج کمیشن نے اپنے تمام عملے کو گھروں سے کام کرنے کی ہدایت کی ہے۔
’ملک کے انٹری پوائنٹس پر مانیٹرنگ کے نظام کو مضبوط کیا جائے‘
پاکستان میں کرونا وائرس کے مریضوں میں ایک اور مریض کا اضافہ ہوگیا ہے اور اب یہ تعداد بڑھ کر 19 تک جا پہنچی ہے۔ وزارت صحت کے حکام کے مطابق گلگت بلتستان میں کرونا وائرس کے مزید ایک مریض کی تصدیق ہوئی ہے۔ تاہم، سب سے زیادہ تعداد میں اب تک صوبہ سندھ کے رہائشی متاثر ہوئے ہیں۔
سندھ حکومت کے ترجمان بیرسٹر مرتضیٰ وہاب کا کہنا ہے کہ متاثر ہونے والے تمام لوگ بیرون ملک کا سفر کرکے ایئرپورٹس کے ذریعے وطن واپس پہنچے تھے، کوئی ایک بھی مقامی شخص یہاں پر متاثرہ نہیں پایا گیا، جو کہ ایک حوصلہ افزا بات ہے۔ ان کا کہنا تھا کہ سندھ حکومت شروع سے یہ بات کہتی آرہی ہے کہ چونکہ ایئرپورٹس وفاقی حکومت کے زیر انتظام ہیں، ملک کے ایئرپورٹس پر ناکافی انتظامات کے باعث کرونا وائرس کے مریضوں کی بڑی تعداد بغیر اسکریننگ ملک میں داخل ہوئے۔
ان کا کہنا تھا کہ وفاقی حکومت کے ملک کے انٹری پوائنٹس پر مانیٹرنگ کے نظام کو مضبوط کیا جائے۔ انہوں نے مصنفہ نورالہدی شاہ کی ٹوئیٹ کا بھی حوالہ دیا جس میں ان کا کہنا تھا کہ مدینہ سے کراچی واپسی پر انہیں اسکریننگ یا ایسی کسی چیکنگ سے گزرنا ہی نہیں پڑا۔
ہیری پوٹر اسٹار کے بھی کرونا وائرس سے متاثر ہونے کی افواہ
ہیری پوٹر فلم سیریز سے شہرت حاصل کرنے والے ہالی وڈ اداکار ڈینیل ریڈ کلف کے بارے میں افواہ زیر گردش تھی کہ وہ بھی کرونا وائرس کا شکار ہو گئے ہیں۔ تاہم ان کے ترجمان نے افواہ کو بے بنیاد اور من گھڑت قرار دیا ہے۔
دنیا کے کئی ممالک کے میڈیا میں گردش کرتی اس افواہ میں کہا جا رہا تھا کہ ڈینیل کرونا وائرس سے متاثر ہونے والے پہلے ہالی وڈ اسٹار ہیں۔
رپورٹس کے مطابق افواہ کی شروعات ایک برطانوی نشریاتی ادارے کے نام سے بنائے گئے ایک ٹوئٹر اکاؤنٹ سے کی جانے والی ٹوئٹ سے ہوئی جس میں کہا گیا تھا کہ ان کے کروان وائرس کے ٹیسٹ کی رپورٹ مثبت آئی ہے۔
اس ٹوئٹ کے بعد افواہ پھیلتی چلی گئی تاہم ریڈ کلف کے ترجمان کی جانب سے تردید کے بعد یہ ٹوئٹ ڈیلیٹ کر دی گئی۔
'اوبر' کا کرونا سے متاثرہ ڈرائیورز، مسافروں کے اکاؤنٹ بند کرنے کا عندیہ
دنیا کی سب سے بڑی آن لائن ٹیکسی کمپنی 'اوبر' نے کہا ہے کہ وہ کرونا کا شکار ہونے والے اپنے ڈرائیورز اور مسافروں کے اکاؤنٹ عارضی طور پر معطل کرنے پر غور کر رہی ہے۔
'اوبر' نے ڈرائیورز اور صارفین کے نام جاری ایک پیغام میں کہا ہے کہ حفاظتی اقدامات کے پیشِ نظر ایسے ڈرائیورز اور مسافروں کے اکاؤنٹس عارضی طور پر معطل کیے جاسکتے ہیں جن کا کرونا کا ٹیسٹ مثبت آیا ہو یا وہ کرونا کے کسی مریض کے ساتھ رابطے میں رہے ہوں۔
واضح رہے کہ کرونا وائرس کے مریضوں کی تعداد میں اضافے اور دنیا کے 100 سے زائد ملکوں میں وائرس کے کیس سامنے آنے کے بعد دنیا بھر میں وائرس کو مزید پھیلنے سے روکنے کے لیے حفاظتی اقدامات جاری ہیں۔
ماہرین کا کہنا ہے کہ کرونا کا وائرس متاثرہ شخص کے کھانسنے، چھینکنے، اس کے زیرِ استعمال اشیا کو چھونے یا مریض سے ہاتھ ملانے کے نتیجے میں دوسرے شخص میں منتقل ہوسکتا ہے جس کے باعث لوگوں کو سخت احتیاط کی ضرورت ہے۔
