کرونا وائرس کا پھیلاؤ روکنے کے لیے نیشنل کوآرڈینیشن کمیٹی قائم
پاکستان میں کرونا وائرس کے پھیلاؤ کی روک تھام کے لیے نیشنل کوآرڈینیشن کمیٹی قائم کر دی گئی ہے جس کا پہلا اجلاس آج ہو گا۔
اجلاس کی صدارت کمیٹی کے کنوینر اور وزیرِ اعظم کے معاون خصوصی ڈاکٹر ظفر مرزا کریں گے۔ کمیٹی میں ڈی جی آئی ایس آئی، ڈی جی ملٹری آپریشنز اور ڈی جی آئی ایس پی آر کو بھی شامل کیا گیا ہے۔
کمیٹی میں داخلہ، خارجہ، خزانہ اور مذہبی امور کے وفاقی وزرا بھی شامل ہیں۔ جعلی خبروں کی روک تھام اور معلومات کے لیے کمانڈ اینڈ کنٹرول سینٹر بھی قائم کیا گیا ہے۔
کاغذ کے بجائے ای فائلنگ
پاکستان کی وزارتِ تجارت نے کرونا وائرس کا پھیلاؤ روکنے کے لیے کاغذ کی بجائے ای فائلنگ کے ذریعے فائلوں کے تبادلے کا فیصلہ کیا ہے۔
اس حوالے سے ایک نوٹی فکیشن بھی جاری کیا گیا ہے، جس میں متعلقہ حکام کو ہدایت کی گئی ہے کہ کاغذ کا استعمال ترک کر کے انٹرنیٹ کے ذریعے سرکاری دستاویزات کا تبادلہ کیا جائے۔
سیکریٹری تجارت نے ان احکامات پر پیر سے عمل درآمد کی ہدایت کی ہے۔ خیال رہے کہ کرونا وائرس کسی بھی سطح کو چھونے سے بھی پھیل سکتا ہے۔
پاکستان کا مسافروں کی واپسی کے لیے مزید مہلت کا مطالبہ
پاکستانی حکام نے سعودی حکام سے درخواست کی ہے کہ پروازوں کی آمدورفت کے لیے مزید تین روز کا وقت دے۔
سعودی حکام نے دونوں ملکوں سے مسافروں کی آمدورفت کے لیے 72 گھنٹے کی مہلت دی تھی۔ جو ہفتے کو ختم ہو گئی۔
اس عرصے کے دوران دونوں ملکوں کی 142 پروازیں آپریٹ ہوئیں، جن کے ذریعے پاکستان سے لگ بھگ 19 ہزار جب کہ سعودی عرب سے 21 ہزار سے زائد مسافر پاکستان آئے۔
پاکستان کے سول ایوی ایشن حکام کا کہنا ہے کہ اب بھی بہت سے مسافر واپس آنا چاہتے ہیں۔ مسافروں کی آمدورفت کے لیے 18 مارچ تک کا وقت دینے کی درخواست کی گئی ہے۔ سعودی عرب نے کرونا وائرس کے پیشِ نظر بین الاقوامی پروازیں بند کرنے کا اعلان کر رکھا ہے۔
آسٹریلیا، نیوزی لینڈ کرکٹ سیریز منسوخ
ایک روزہ میچوں کی سیریز کے لیے آسٹریلیا میں موجود نیوزی لینڈ کرکٹ ٹیم نے کرونا وائرس کے پیشِ نظر وطن واپس جانے کا فیصلہ کیا ہے۔ نیوزی لینڈ کی وزیر اعظم نے حفاظتی اقدامات مزید سخت کرتے ہوئے سرحدوں پر موثر انتظامات کا اعلان کیا ہے۔
نیوزی لینڈ حکام نے اعلان کیا ہے کہ اتوار کے بعد ملک میں داخل ہونے والوں کو خود کو 14 روز تک قرنطینہ میں رکھنا ہو گا۔
نیوزی لینڈ کرکٹ ٹیم نے آسٹریلیا کے خلاف تین ایک روزہ میچوں کی سیریز کھیلنی تھی۔ البتہ پہلے میچ کے بعد ہی یہ سیریز منسوخ کر دی گئی ہے۔ پہلے میچ میں آسٹریلیا نے نیوزی لینڈ کو 71 رنز سے شکست دے دی تھی۔ یہ میچ بھی تماشائیوں کے بغیر کھیلا گیا تھا۔
گلے میں خراش کی شکایت کے بعد نیوزی لینڈ کے فاسٹ بولر لوکی فرگوسن کا کرونا وائرس ٹیسٹ کر کے اُنہیں الگ کر دیا گیا ہے۔ آسٹریلیا کے فاسٹ بولر کین رچرڈسن کا بھی جمعرات کو کرونا وائرس کے شبے میں ٹیسٹ کیا گیا تھا، البتہ اُن کا یہ ٹیسٹ منفی آیا تھا۔