کرونا وائرس سے غریب ملکوں کی معیشت تباہ ہو سکتی ہے: عمران خان
پاکستان کے وزیر اعظم عمران خان نے پیش گوئی کی ہے کہ خوفناک کرونا وائرس سے غریب ممالک کی معیشت تباہ ہو سکتی ہے۔
امریکی جریدے 'بلوم برگ' کو دیے گئے انٹرویو میں عمران خان نے کہا کہ امیر ممالک کو غریب ممالک کے ذمے واجب الادا قرضے معاف کر دینے چاہئیں۔ اُنہوں نے کہا کہ غریب ممالک میں اگر یہ وائرس متعدی مرض میں تبدیل ہو گیا تو نہ صرف پاکستان بلکہ برصغیر اور افریقی ممالک میں اس سے نمٹنے کے لیے صحت کی سہولیات ناکافی ہوں گی۔
پاکستان کا شمار دُنیا کے اُن ملکوں میں ہوتا ہے جن کے ذمے نہ صرف آئی ایم ایف بلکہ مختلف ممالک کی جانب سے دیے گئے قرضے واجب الادا ہیں۔
پاکستان کے وزیر اعظم کا یہ بیان ایسے وقت میں سامنے آیا ہے جب پاکستان میں بھی کرونا وائرس کیسز کی تعداد میں روز بروز اضافہ ہو رہا ہے۔ عالمی ادارہ صحت کے مطابق منگل کو پاکستان میں کرونا وائرس سے ایک ہلاکت کی بھی تصدیق ہوئی ہے۔
انٹرویو میں عمران خان نے کہا کہ غربت اور کمزور معیشت کے باعث ہمارے پاس اس وائرس کا مقابلہ کرنے کے لیے درکار وسائل نہیں ہیں۔ اُنہوں نے کہا کہ مجھے غربت اور بھوک میں اضافے کا زیادہ خدشہ ہے۔
کرونا وائرس سے کوئی ہلاکت نہیں ہوئی : وزیر اعلٰی پنجاب
پاکستان کے صوبے پنجاب کے وزیر اعلٰی عثمان بزدار نے لاہور کے میو اسپتال میں کرونا وائرس سے پہلی ہلاکت کی خبروں کی تردید کی ہے۔
اپنی ٹوئٹ میں وزیر اعلٰی عثمان بزدار کا کہنا تھا کہ میو اسپتال میں ہلاک ہونے والی عمران علی کی ٹیسٹ رپورٹ موصول ہوئی ہیں، جس سے پتا چلا ہے کہ اُن کی موت کرونا وائرس سے نہیں ہوئی۔
عثمان بزدار کا کہنا تھا کہ پنجاب میں کرونا وائرس کے آٹھ کیسز رپورٹ ہوئے ہیں۔ جنہیں صحت کی بہترین سہولیات فراہم کی جا رہی ہیں۔
ترکی افواہیں پھیلانے کے الزام میں 19 افراد گرفتار
ترکی میں حکام نے کرونا وائرس سے متعلق سوشل میڈیا پر افواہیں اور غلط معلومات پھیلانے کے الزام میں 19 افراد کو حراست میں لے لیا ہے۔
حکام کا کہنا ہے کہ اس ضمن میں 93 افراد کی نشاندہی کی گئی تھی جو ملک میں بڑے پیمانے پر کرونا وائرس پھیلنے کی افواہیں پھیلانے میں مصروف تھے۔
ترک وزارتِ داخلہ کا کہنا ہے کہ یہ افراد حکومتی عہدے داروں کے خلاف بھی ہرزہ سرائی کر رہے تھے کہ حکومت کرونا وائرس کے خلاف سنجیدہ اقدامات نہیں کر رہی۔
ترکی کی حکومت نے کرونا وائرس کا پھیلاؤ روکنے کے لیے متعدد کھیلوں کے مقابلے منسوخ کر دیے ہیں۔ ترکی نے 20 ممالک کے لیے اپنی پروازیں بھی معطل کر دی ہیں جب کہ اجتماعی نماز کی ادائیگی پر بھی پابندی عائد کر دی ہے۔ ترکی میں منگل تک کرونا وائرس کے 47 کیسز کی تصدیق ہوئی ہے۔
ترک حکام کا کہنا ہے کہ نو یورپی ملکوں سے وطن واپس آنے خواہش مند افراد کو 17 مارچ کو واپس لایا جائے گا۔ انہیں 14 روز تک قرنطینہ میں رکھا جائے گا۔
ایران: کرونا وائرس سے ہلاکتوں کی تعداد 988 ہو گئی، 16 ہزار سے زائد مریض
ایران میں کرونا وائرس سے ہلاکتوں کی تعداد منگل کو 988 ہو گئی ہے جب کہ ملک بھر میں 'کووڈ 19' کے 16 ہزار سے زائد مریض رپورٹ ہو چکے ہیں۔
ایران کے سرکاری خبر رساں ادارے 'اِرنا' کے مطابق ایران میں کرونا وائرس کے 16 ہزار 169 مریض سامنے آ چکے ہیں جن میں سے 5389 افراد صحت یاب ہو گئے ہیں۔
منگل کو ایران میں مزید 135 ہلاکتیں ہوئی ہیں جس کے بعد ہلاکتوں کی مجموعی تعداد 988 ہو گئی ہے۔
ایران میں کرونا وائرس کے پیشِ نظر حفاظتی اقدامات کے تحت اسکول، دکانیں، بازار اور عوامی اجتماعات کے مقامات بند ہیں۔