پروازوں کی منسوخی سے پاکستانی مسافر مشکلات ک شکار
کرونا وائرس کے باعث کئی ممالک نے فضائی سروس معطل کر دی ہے ایسے میں شہریوں کو مشکلات کا سامنا کرنا پڑ رہا ہے۔ صورت حال واضح نہ ہونے سے مختلف ممالک میں پھنس جانے والے افراد مالی طور پر بھی مشکل کا سامنا کرنے پر مجبور ہو رہے ہیں۔ اس حوالے سے مزید تفصیلات بتا رہی ہیں وائس آف امریکہ کی نمائندہ گیتی آرا
بلوچستان میں کرونا وائرس سے نمٹنے کے لیے فوج کی مدد طلب
بلوچستان میں صوبائی حکومت نے کرونا وائرس کے خطرے کے پیش نظر پاک فوج کی مدد طلب کر لی ہے۔
صوبائی حکومت نے آرٹیکل 245 کے تحت فوج کو سول اختیارات دینے کے لیے مرکز کو خط ارسال کیا ہے۔
خط کے مطابق صوبے بھر میں ایمرجنسی کی صورت حال سے نمٹنے کے لیے فوج کو سول اختیارات حاصل ہوں گے۔
خیبر پختونخوا میں کرونا وائرس کے کیسز میں اضافہ
پاکستان کے صوبہ خیبر پختونخوا کے وزیر اعلیٰ کے مشیر برائے اطلاعات اجمل وزیر کا کہنا تھا کہ صوبے میں مزید آٹھ افراد میں کرونا وائرس کی تصدیق ہوئی ہے جس کے بعد خیبر پختونخوا میں کرونا وائرس کے مصدقہ کیسز کی تعداد 31 ہو گئی ہے۔
خیال رہے کہ صوبے میں مجموعی طور پر مشتبہ مریضوں کی تعداد 170 رپورٹ کی گئی ہے۔ دوسری جانب 63 افراد کو کلیئر قرار دیا گیا ہے۔
نئے مشتبہ کیسز میں ایبٹ آباد میں چار، چارسدہ میں ایک، ڈی آئی خان میں ایک، ہری پور میں پانچ، کوہاٹ میں دو مریض رپورٹ ہوئے۔ جب کہ مردان میں 10، نوشہرہ میں ایک، پشاور میں 12، سوات میں دو اور صوابی سے دو مشتبہ کیسز سامنے آئے ہیں۔