برطانوی شہزادہ چارلس بھی کرونا وائرس کا شکار
برطانوی شہزادہ چارلس بھی کرونا وائرس کا شکار ہو گئے ہیں جس کی تصدیق بکنگھم پیلس نے بھی کر دی ہے۔
بھارہ کہو میں مزید 9 افراد میں کرونا وائرس کی تشخیص
اسلام آباد کے علاقے بھارہ کہو کے میں مزید نو افراد میں کرونا وائرس کی تشخیص ہوئی ہے۔ یہ وہی علاقہ ہے جہاں گزشتہ دنوں مسجد میں مقیم تبلیغی جماعت کے چھ ارکان نے وائرس کی تصدیق ہوئی تھی۔
اسلام آباد کے ڈپٹی کمشنر حمزہ شفقات نے تصدیق کرتے ہوئے کہا ہے کہ مسجد اور اس کے گرد و نواح میں مزید نو لوگوں کے کرونا وائرس ٹیسٹ مثبت آئے ہیں جس کے بعد علاقے میں کرونا کیسز کی تعداد 16 ہو گئی ہے۔
کوٹ ہتھیال اور بارہ کہو کے علاقوں کو فوج اور مقامی انتظامیہ نے مکمل طور پر سیل کر دیا ہے۔ ڈپٹی کمشنر نے عوام سے اپیل کی ہے کہ وہ انتظامیہ سے تعاون کریں۔
ڈپٹی کمشنر کے مطابق بھارہ کہو روڈ بھی ہر قسم کی ٹریفک کے لیے بند کر دی گئی ہے۔
ترکی میں اموات 7 سے 44 تک پہنچ گئیں
ترکی میں بدھ کو کرونا وائرس سے ہلاکتیں سات سے 44 تک پہنچ گئیں جب کہ 343 نئے کیسز سامنے آئے ہیں۔
ترکی کے وزیر صحت فرحتین کوکا کے مطابق گزشتہ 24 گھنٹوں کے دوران 3952 افراد کے کرونا وائرس ٹیسٹ لیے گئے ہیں اور ملک بھر میں 343 کیسز سامنے آنے کے بعد متاثرہ افراد کی تعداد 1872 ہو گئی ہے۔
ان کے بقول، ترکی بھر میں اب تک 28 ہزار افراد کے کرونا وائرس ٹیسٹ لیے جا چکے ہیں۔
دنیا کے مختلف ملکوں میں احتیاطی تدابیر
کرونا وائرس چین سے شروع ہو کر دنیا کے تقریباََ ہر ملک تک پہنچ چکا ہے۔ اس وائرس سے سب سے زیادہ افراد چین میں متاثر ہوئے تاہم سب سے زیادہ ہلاکتیں یورپی ملک اٹلی میں ہوئی ہیں۔ امریکہ، ایران، اسپین، جرمنی، پاکستان، بھارت، سعودی عرب و دیگر ممالک میں اس سے بچنے کے لیے شہر اور دیہات لاک ڈاؤن کیے جا چکے ہیں۔
کرونا کا خوف، دنیا بھر کی شاہراہیں سنسان
