- By روشن مغل
پاکستانی کشمیر میں گھریلو قرنطینہ کے لیے ہدایات جاری
کرونا وائرس کے پھیلاؤ کی مؤثر روک تھام کے لیے پاکستان کے زیر انتظام کشمیر کی اسٹیٹ ڈیزاسٹر مینجمنٹ اتھارٹی نے شہریوں کے لیے گھریلو قرنطینہ کی ہدایات جاری کی ہیں۔
اسٹیٹ ڈیزاسٹر مینجمنٹ اتھارٹی کی جانب سےعوام کو ہدایت کی گئی ہے کہ حال میں بیرون ملک یا علاقے کے باہر سے آنے والے مسافر مشتبہ مریض کو الگ کمرے میں رکھیں۔
سی ڈی ایم کے مطابق کمرے کے ساتھ اٹیچ واش روم ہونا چاہیے۔
ہدایات میں مزید کہا گیا ہے کہ ایک وقت میں ایک ہی بندے کو کمرے میں رکھا جائے۔ کمرے میں فون، بجلی، پانی اور کوڑا اٹھانے کے انتظامات ہونے چاہیئں جب کہ مشتبہ مریض کے کھانے کا بندوبست بھی اسی کمرے میں کیا جائے۔
یہ بھی کہا گیا ہے کہ قرنطینہ کیے ہوئے شخص کی دیکھ بھال کے لیے صرف ایک شخص کو مخصوص کریں اور دوران علیحدگی کسی بھی شخص کو حالیہ مسافر کے پاس نہ جانے دیں جب کہ نہ ہی مسافر کر باہر گھونے کی اجازت دی جائے۔
- By ضیاء الرحمن
پنجاب کے شہر جھنگ کی سبزی منڈی میں پہلا سینیٹائزر واک تھرو گیٹ نصب
پنجاب کے شہر جھنگ کی سبزی منڈی میں کرونا وائرس سے بچاؤ کے لیے پہلا سینیٹائزر واک تھرو گیٹ نصب کر دیا گیا ہے۔ گیٹ سے روزانہ پانچ ہزار سے زائد افراد گزر سکتے ہیں۔
ڈپٹی کمشنر جھنگ طاہر وٹو کے مطابق پاکستان میں وائرس کی بڑھتی ہوئی بیماری کے پیش نظر یہ گیٹ شہر کی بڑی سبزی منڈی کے باہر لگایا گیا ہے۔
وائس آف امریکہ سے گفتگو کرتے ہوئے ڈپٹی کمشنر نے بتایا کہ لاک ڈاؤن کی صورت حال کے باعث کچھ ایسی جگہیں تھیں جہاں لوگوں کی آمد و رفت کو بند نہیں کیا جا سکتا تھا جن میں سبزی منڈی بھی شامل ہے۔
ان کے بقول منڈی میں روزانہ سیکڑوں کی تعداد میں لوگ آتے ہیں۔
طاہر وٹو نے بتایا کہ انہوں نے ترکی کی ایک ویڈیو دیکھی تھی جسے دیکھ کر انہیں بھی یہ واک تھرو سینیٹائرز گیٹ بنانے کا خیال آیا۔
ان کا کہنا تھا کہ وائرس سے بچاؤ کے لیے بنائے گے واک تھرو سینیٹائزر گیٹ پر ایک لاکھ 82ہزار روپے لاگت آئی ہے جب کہ یہ صرف دس گھنٹوں میں تیار کیا گیا ہے۔
جھنگ کے بعد پنجاب کے صنعتی شہر فیصل آباد میں بھی ایسے ہی واک تھرو سینیٹائرز گیٹ لگانے کی منصوبہ بندی کی جا رہی ہے۔
اسسٹنٹ کمشنر فیصل آباد ایوب بخاری نے وائس آف امریکہ سے گفتگو کرتے ہوئے بتایا کہ ایسے واک تھرو سینیٹائزر گیٹ نصب پر کام تیزی سے جاری ہے۔
ٹوکیو اولمپکس اب 23 جولائی 2021 سے شروع ہوں گے
کرونا وائرس کے پھیلاؤ کے باعث رواں سال ملتوی ہونے والے ٹوکیو اولمپکس کی نئی تاریخوں کا اعلان کردیا گیا ہے۔
اب یہ گیمز 23 جولائی سے آٹھ اگست 2021 کے دوران منعقد ہوں گے۔ خصوصی افراد کے پیرا اولمپک 24 اگست سے پانچ ستمبر تک ہوں گے۔
اولمپک مقابلوں کی نئی تاریخ کا اعلان انٹرنیشنل اولمپک کمیٹی، انٹرنیشنل پیرالمپک کمیٹی اور ٹوکیو 2020 آرگنائزنگ کمیٹی نے مشترکہ اعلامیے میں کیا۔
ٹوکیو اولمپکس رواں سال 24 جولائی سے نو اگست تک جاپان میں شیڈول تھے۔ تاہم کرونا وائرس کی وبا کے سبب انہیں گزشتہ ہفتے ایک سال تک ملتوی کر دیا گیا تھا۔
جاپان ان گیمز کے انعقاد کے لیے نہ صرف بڑے پیمانے پر سرمایہ کاری کرچکا تھا بلکہ تمام انتظامات بھی مکمل کرلیے گئے تھے۔
کرونا وائرس کے پھیلاؤ کے پیش نظر مختلف ملکوں کے سربراہان نے یہ مقابلے ملتوی کرنے پر زور دیا تھا۔
کینیڈا نے سب سے پہلے اپنے ایتھلیٹس نہ بھیجنے کا اعلان کیا تھا۔ جس کے بعد دیگر ممالک نے بھی اپنے کھلاڑی ٹوکیو نہ بھجوانے کا فیصلہ کیا تھا۔
لاک ڈاؤن میں علاج کی مفت آن لائن سہولت
پاکستان میں کرونا وائرس کے کیسز کی تعداد میں مسلسل اضافہ ہو رہا ہے اور حکومت کی جانب سے لاک ڈاؤن کے بعد اس وبا کو لے کر شہریوں میں خوف اور بے چینی پائی جاتی ہے۔
لاک ڈاؤن کے دوران ایک اہم مسئلہ بیماری کے لیے معالجین تک رسائی کا نہ ہونا بھی ہے۔اس سلسلے میں ٹیلی میڈیسن کا طریقہؑ کار خاصا کار آمد ثابت ہو رہا ہے۔
'صحت کہانی' کے نام سے کراچی سے ملک کے بہت سے شہروں میں کام کرنے والا ٹیلی میڈیسن ادارہ اس وقت کرونا وائرس کے پیش نظر اپنی موبائل ایپلی کیشن کو صارفین کے لیے مفت فراہم کر رہا ہے جس میں خواتین ڈاکٹرز کی مدد سے ان مریضوں کا علاج یا کاوؑنسلنگ کی جا رہی ہے جنھیں اس کی اشد ضرورت ہے۔
ڈاکٹر سارہ سعید 'صحت کہانی' کی بانی ہیں۔ اُن کے مطابق یہ ادارہ دو طریقوں سے ملک میں کام کر رہا ہے۔ پہلے طریقہ کار کے تحت پسماندہ علاقوں میں ان کے کئی کلینکس ہیں جہاں ایک تربیت یافتہ نرس موجود ہوتی ہے جو وہاں آنے والے مریضوں کو آن لائن ڈاکٹر کی مدد سے علاج کی آسانی فراہم کرنے میں مدد دیتی ہیں۔
دوسرا طریقہؑ کار موبائل اپیلی کیشن ہے جس کی مدد سے مریض 24 گھنٹے کسی بھی ڈاکٹر سے آڈیو یا ویڈیو لنک کی مدد سے رابطے میں آسکتا ہے۔