کراچی میں مزید دو ہلاکتوں کی تصدیق
پاکستان کے صوبہ سندھ کی وزیر صحت ڈاکٹر عذرا افضل نے کراچی میں کرونا وائرس سے مزید دو ہلاکتوں کی تصدیق کی ہے۔ وزیر صحت کا کہنا ہے کہ دونوں افراد میں وائرس مقامی سطح پر منتقل ہوا تھا۔
حکام کا کہنا ہے کہ ہلاک ہونے والوں کی عمریں 60 اور 80 سال ہیں۔ اور انہیں گردوں اور دل کے عارضے لاحق تھے۔
وزیر صحت کے مطابق دونوں مریضوں کے ٹیسٹ یکم اپریل کو مثبت آئے تھے۔ ان ہلاکتوں کے ساتھ ہی پاکستان میں کرونا وائرس سے ہلاک ہونے والوں کی مجموعی تعداد 37 ہو گئی ہے۔
بھارت میں کرونا وائرس کے کیسز 2300 سے متجاوز
بھارت میں کروناوائرس کے مثبت کیسیز کی تعداد 2301 اور ہلاکتوں کی تعداد 56 ہو گئی ہے۔ گزشتہ 24 گھنٹوں کے دوران 336 نئے کیسیز سامنے آئے اور 6 افراد ہلاک ہوئے ہیں۔
وزیر اعظم نریندر مودی نے ایک مختصر ویڈیو پیغام میں عوام سے اپیل کی ہے کہ وہ کرونا وائرس سے لڑنے کے لیے پانچ اپریل کو رات نو بجے نو منٹ تک اپنے موبائل کی ٹارچ یا موم بتی جلا کر یکجہتی کا مظاہرہ کریں۔
البتہ اپوزیشن جماعتوں نے وزیر اعظم کی اس ہدایت کو مسترد کرتے ہوئے کہا ہے کہ وزیر اعظم کے پاس کرونا وائرس کا مقابلہ کرنے کا کوئی ویژن نہیں ہے۔
بھارت کی سپریم کورٹ نے مزدوروں کی کم سے کم تنخواہ اور بے روزگار ہونے والے طبقات کی مالی معاونت کے ضمن میں دائر درخواست پر حکومت کو نوٹس جاری کر دیا ہے۔
پاکستان میں نماز جمعہ کے محدود اجتماعات
پاکستان میں کرونا وائرس کا پھیلاؤ روکنے کے لیے نماز جمعہ کے اجتماعات کو بھی محدود رکھا گیا۔ بیشتر مساجد میں تین سے پانچ افراد نے نماز جمعہ ادا کی۔
حکومت کی جانب سے اس مرتبہ مزید سخت انتظامات کیے گئے تھے۔ نماز جمعہ سے قبل ملک بھر کی مساجد کے قریب پولیس اور قانون نافذ کرنے والے اداروں کا گشت جاری رہا۔
مساجد سے اعلانات بھی کیے گئے کہ شہری گھروں میں نماز پڑھیں۔
لاہور کے جامعہ نعیمیہ کے مہتتم مفتی راغب نعیمی نے بھی ایک فتویٰ جاری کیا تھا کہ اگر تین سے پانچ افراد بھی مسجد میں جمعہ ادا کریں تو نماز ہو جائے گی۔
علماء کرام نے بھی شہریوں سے اپیل کی تھی کہ وہ سماجی دُوری اختیار کریں تاکہ اس وائرس کو پھیلنے سے روکا جا سکے۔
خیبرپختونخوا کے بینکوں کے باہر رش
پاکستان کے صوبے خیبرپختونخوا کے بینکوں کے باہر لوگ تنخواہوں کی وصولی کے لیے قطار میں کھڑے ہیں۔ حکومت نے لوگوں کو زیادہ تعداد میں جمع نہ ہونے کی ہدایت کر رکھی ہے۔ لیکن مہینے کے آغاز پر تنخواہوں کی وصولی کے لیے لوگوں نے بینکوں کا رخ کیا۔
