نیو یارک کے قبرستانوں میں جگہ کم، اجتماعی قبروں میں میتوں کی تدفین
امریکہ کی ریاست نیویارک میں کرونا وائرس سے ہزاروں افراد کی ہلاکت کے بعد قبرستانوں میں تدفین کی لیے جگہ ختم ہو گئی ہے۔ لہٰذا نیویارک کے ہارٹ نامی جزیرے پر اجتماعی قبر کھود کر میتوں کو دفنایا جا رہا ہے۔
کرونا ریلیف فنڈ کے تحت امدادی رقوم کی ادائیگی جاری
حکومت پاکستان کی طرف سے کرونا وائرس ریلیف فنڈ کے تحت لوگوں کو امدادی رقوم کی ادائیگی کا سلسلہ جاری ہے۔ اس پروگرام کے تحت ایک کروڑ 20 لاکھ مستحق افراد میں فی خاندان 12 ہزار روپے تقسیم کیے جا رہے ہیں۔ کئی شہروں میں رقم کی تقسیم کے دوران بدنظمی بھی دیکھنے میں آ رہی ہے اور سماجی فاصلے کا خیال نہیں رکھا جا رہا۔
امریکہ: اموات کے باوجود موسم گرما تک معمولات زندگی بحال ہونے کی اُمید
امریکہ میں کرونا وائرس کے باعث ہلاکتوں میں مسلسل اضافے کے باوجود محکمہ صحت کے حکام کا کہنا ہے کہ اسپتال آنے والے مریضوں کی تعداد میں کمی سے وبا پر قابو پانے کی امید نظر آ رہی ہے۔ طبی ماہرین موسم گرما تک امریکہ میں معمولات زندگی بحال ہونے کی نوید بھی سنا رہے ہیں۔
کرونا وائرس کے باعث بے روزگاری میں اضافے اور معاشی نقصان کی وجہ سے امریکہ کے صدر ڈونلڈ ٹرمپ سماجی پابندیاں ہٹانا چاہتے ہیں۔ تاکہ امریکہ میں کاروبارِ زندگی جلد سے جلد دوبارہ بحال ہو سکے۔
امریکی صدر نے حالیہ بیان میں کہا تھا کہ تاریک سرنگ کے دوسری طرف روشنی ہے۔
برطانوی خبر رساں ادارے 'رائٹرز' کے مطابق کرونا وائرس کے پھیلاؤ کو روکنے کے لیے امریکہ میں کیے گئے اقدامات سے اس مہلک وائرس سے متاثرہ مریضوں کی اسپتالوں میں داخلے کی تعداد میں کمی دیکھی جارہی ہے۔
امریکہ میں جمعرات کو کرونا وائرس کے باعث 1783 ہلاکتیں ہوئیں۔ جو بدھ کو ہونے والی ہلاکتوں سے 190 کم ہیں۔
- By جمشید رضوانی
احساس کفالت سینٹر کے باہر بھگدڑ، خاتون ہلاک
ملتان کے علاقے قاسم پور کالونی میں 'احساس کفالت سینٹر' کے باہر امداد کی تقسیم کے دوران بھگدڑ مچ گئی۔ بھگدڑ کے نتیجے میں 65 سالہ خاتون دیگر خواتین کے قدموں تلے دب کر ہلاک ہو گئی۔
پینسٹھ سالہ خاتون کی لاش کو ریسکیو 1122 نے نشتر اسپتال منتقل کر دیا ہے۔
ریسکیو 1122 کے مطابق 65 سالہ بزرگ خاتون دھکم پیل میں پھسل کر نیچے گری تو دوسری خواتین اس کے اوپر سے گزر گئیں انہیں نشتر اسپتال منتقل کیا گیا لیکن وہ جانبر نہ ہو سکیں۔
کیش پروگرام کے تحت ملتان کے ایک لاکھ بارہ ہزار افراد میں 12 ہزار روپے فی خاندان رقم تقسیم کی جا رہی ہے۔
کمشنر ملتان کے ترجمان کا کہنا ہے کہ ہلاک ہونے والی خاتون کا پوسٹ مارٹم کرایا جا رہا ہے۔ شنید یہ ہے کہ وہ بھگدڑ سے نہیں بلکہ دل کا دورہ پڑنے سے ہلاک ہوئیں۔
کیش کی تقسیم کا یہ عمل جنوبی پنجاب کے تمام اضلاع میں جاری ہے۔