کرونا وائرس: کوئلے کی کان میں کام کرنے والے مزدور بھی متاثر
پاکستان میں کرونا وائرس کا پھیلاؤ روکنے کے لیے جاری لاک ڈاؤن سے کوئلے کی کانوں میں کام کرنے والے مزدور بھی پریشان ہیں۔ ایک طرف انہیں کرونا وائرس کا خوف ہے تو دوسری جانب وہ روزگار نہ ہونے سے تنگ ہیں۔ حکومتی پابندیوں نے ان مزدوروں کو کس مشکل میں ڈالا ہوا ہے؟ جانتے ہیں کوئٹہ سے ایک کان کن کی زبانی
پاکستان میں ہلاکتیں 96 ہو گئیں
بھارت میں کرونا وائرس کے 10 ہزار سے زائد مریض، لاک ڈاؤن میں توسیع
بھارت کے وزیرِ اعظم نریندر مودی نے کرونا وائرس کے پیشِ نظر ملک بھر میں جاری لاک ڈاؤن میں تین مئی تک توسیع کر دی ہے۔ دوسری جانب بھارت بھر میں کرونا وائرس کے مریضوں کی مجموعی تعداد 10 ہزار سے زائد ہو گئی ہے۔
خبر رساں ادارے 'رائٹرز' کے مطابق منگل کو بھارتی وزیر اعظم نے ٹی وی پر قوم سے خطاب کرتے ہوئے کہا کہ اس وقت کرونا وائرس کے پھیلاؤ کو روکنا ایک چیلنج ہے۔
نریندر مودی کا کہنا تھا کہ ہر بھارتی شہری کو تین مئی تک لاک ڈاؤن میں رہنا ہو گا۔ انہوں نے شہریوں سے اپیل کی کہ وہ کرونا وائرس کا ملک کے دیگر حصوں میں پھیلاؤ روکنے کے لیے معاونت کریں۔
خیال رہے کہ بھارت میں کرونا وائرس کے مریضوں کی مجموعی تعداد 10 ہزار 363 ہو گئی ہے جب کہ اب تک 339 افراد ہلاک ہو چکے ہیں۔
گزشتہ تین ہفتوں میں اٹلی میں اموات کی کم ترین شرح
اٹلی میں گزشتہ تین ہفتوں کے دوران کرونا وائرس سے ہلاک ہونے والوں کی شرح کم ترین درجہ پر ہے۔ اٹلی کے عہدیداروں کا کہنا ہے کہ انتہائی نگہداشت میں داخل ہونے والوں کی تعداد میں بھی کمی ہوئی ہے۔
اٹلی، یورپ کا وہ ملک ہے جسے کرونا وائرس نے سب سے زیادہ متاثر کیا ہے، اور یہاں مریضوں کی تعداد ایک لاکھ 56 ہزار سے تجاوز کر گئی ہے۔ تاہم، اٹلی کے چند ماہرین کا کہنا ہے کہ وائرس سے ہوئی اموات کی تعداد کہیں زیادہ ہو سکتی ہے، کیونکہ بوڑھے افراد کیلئے قائم سینٹروں میں، بہت سی ایسی ہلاکتیں ہوئیں جن کے ٹیسٹ نہیں ہوئے تھے۔
خبر رساں ادارے، دی ایسوسی ایٹڈ پریس (اے پی) کرونا وائرس کے مریضوں اور اس سے ہلاک ہونے والوں کے اعداد خود مرتب کر رہا ہے۔ اے پی نے خبر دی ہے کہ امریکہ میں بوڑھے افراد کیلئے بنائے گئے نرسنگ ہومز میں اپریل کے اوائل میں اموات میں اضافہ ہوا ہے، اور یہ تعداد 3300 تک پہنچ گئی ہے۔ تاہم اٹلی ہی کی طرح، یہاں بھی ہلاکتوں کے درست اعداد شاید سامنے نہ آ سکیں کیونکہ بہت سے معمر افراد، ٹیسٹ ہونے سے پہلے ہی ہلاک ہو گئے۔