کرونا وائرس: تھائی عوام سونا بیچنے کے لیے اُمڈ آئے
کرونا وائرس کی دنیا بھر میں پھیلی وبا کے سبب سونے کی قیمتوں میں اضافہ ہو گیا ہے جس کے بعد تھائی لینڈ کے سیکڑوں شہری اپنے قیمتی زیوارت فروخت کرنے بینکاک کے 'چائنا ٹاؤن' میں امڈ آئے ہیں۔
ملک کی سب سے اہم سونے کی مارکیٹ 'چائنا ٹاؤن' کی دکانوں میں سونا بیچنے والوں کا رش اس قدر بڑھ گیا ہے کہ تل دھرنے کو جگہ نہیں ہے۔
ٹریفک پولیس کے لیے لوگوں کو کنٹرول کرنا مشکل ہو گیا ہے اور لوگ قطاروں میں لگ کر سونا بیچ رہے ہیں۔
تھائی شہریوں کی بڑی تعداد سرمایہ کاری کی غرض سے وقتاً فوقتاً سونے کے زیوارت ذخیرہ کرتی ہے۔ سونے کی قیمت بڑھنے پر اسے مارکیٹ میں فروخت کر دیا جاتا ہے۔
- By زبیر ڈار
کرونا وائرس: سرینگر کے کئی علاقے ریڈ زون میں تبدیل
بھارت کے زیر انتظام کشمیر میں کرونا وائرس کا پھیلاؤ روکنے کے لیے انتظامیہ نے کئی علاقوں کو ریڈ زون قرار دیا ہے۔ کرونا کے خلاف جنگ میں مقامی رضا کار بھی انتظامیہ کا ساتھ دے رہے ہیں جنہوں نے اپنے علاقوں میں لاک ڈاؤن پر عمل درآمد کرانے کی ذمہ داریاں سنبھال لی ہیں۔ مزید دیکھیے زبیر ڈار کی رپورٹ میں
صدر ٹرمپ کا معیشت جلد کھولنے کا اعلان
امریکہ میں مسلسل دوسرے روز کرونا وائرس کے شکار مزید دو ہزار سے زائد افراد ہلاک ہو گئے ہیں۔ ہلاکتوں میں اضافے کے باوجود صدر ڈونلڈ ٹرمپ نے اعلان کیا ہے کہ وہ جمعرات کو لاک ڈاؤن ختم کرنے کا منصوبہ پیش کریں گے۔
دنیا بھر میں کرونا وائرس کے اعداد و شمار جمع کرنے والے امریکی ادارے جانز ہوپکنز یونیورسٹی کے مطابق امریکہ میں کرونا وائرس سے ہلاکتوں کی تعداد 30 ہزار 925 ہو گئی ہے۔
گزشتہ چوبیس گھنٹوں کے دوران دو ہزار سے زائد افراد ہلاک ہوئے ہیں۔ منگل کو ہلاکتوں کی یہ تعداد 28 ہزار سے زائد تھی جو بدھ کو بڑھ کر 30 ہزار سے تجاوز کر گئی ہے۔
وائٹ ہاؤس میں معمول کی نیوز بریفنگ کے دوران صدر ٹرمپ نے کہا کہ وہ ملک کی معیشت کھولنے کا ارادہ رکھتے ہیں اور اس حوالے سے جمعرات کو ایک منصوبہ بھی پیش کریں گے۔
صدر ٹرمپ کا یہ بیان ایسے موقع پر سامنے آیا ہے جب امریکہ میں کرونا وائرس سے ہونے والی ہلاکتیں عروج پر پہنچ چکی ہیں اور نئے کیسز میں بھی تیزی سے اضافہ ہو رہا ہے۔