- By گیتی آرا
'امریکہ سے واپسی کے تمام راستے پاکستانیوں کے لیے بند ہیں'
امریکہ میں اس وقت جہاں کرونا وائرس سے ہلاکتوں کی تعداد 40 ہزار سے زائد ہو چکی ہے وہیں مرحلہ وار معمولات زندگی کی طرف واپسی کا ہدایت نامہ بھی جاری ہو چکا ہے۔ اس پر کیسے عمل یا کب ہو گا۔ اس سوال سے میرا شاید کوئی سروکار نہیں کیونکہ میں خود امریکہ میں پھنسے 800 پاکستانیوں کی اس فہرست میں شامل ہوں جو ہر روز طویل ہوتی جا رہی ہے۔
ان پاکستانیوں کو ایک ماہ گزر جانے کے بعد بھی یہ نہیں معلوم کہ امریکہ سے پاکستان واپسی کب اور کیسے ہو پائے گی۔
فرازے سید ان چند پاکستانیوں میں سے ایک ہیں جنہیں مارچ میں اس وقت جہاز سے آف لوڈ کیا گیا تھا جب وہ نیویارک سے پاکستان جانے کے لیے طیارے میں سوار ہوئے۔
آف لوڈ کرنے کی وجہ وہی سرکاری مخمصہ تھا جس میں فوری کرونا ٹیسٹ کروا کر ہی جہاز میں چڑھنے کی ہدایت کی گئی۔ جہاز چلا گیا اور دو دن بعد پاکستان نے تمام پروازیں بند کر دیں۔ نتیجہ یہی ہے کہ فرازے اسی نیو یارک میں پھنسی ہوئی ہیں جہاں اس وقت وبا سے 13 ہزار افراد کی موت ہو چکی ہے۔
سندھ میں کرونا وائرس کی سرائیت کے 18 مقامات کا تعین
صوبہ سندھ میں محکمۂ صحت کے حکام نے 18 سے زائد ایسے مقامات کا تعین کیا ہے جہاں کرونا وائرس انتہائی تیزی سے سرائیت کر رہا ہے۔
سندھ حکومت کے مطابق ان مقامات میں سے زیادہ تر 'ہاٹ اسپاٹس' کراچی شہر میں ہیں۔ جن میں ضلع شرقی میں واقع گلشن اقبال کی بعض یونین کمیٹیاں، گلزار ہجری، منظور کالونی، جیکب لائنز اور ڈالمیا کا علاقہ شانتی نگر شامل ہیں۔
اسی طرح ضلع غربی میں افغان بستی اور اطراف میں موجود کچی آبادی کو کرونا وائرس کے تیزی سے پھیلاؤ کے مراکز قرار دیا جا رہا ہے۔
حکام کے مطابق لیاری میں بھی کرونا وائرس پھیلتا جا رہا ہے جہاں اب تک 74 کیسز سامنے آئے ہیں جب کہ کئی افراد کی ٹیسٹ رپورٹس آنا باقی ہیں۔
اسی طرح سندھ کے دیگر علاقوں حیدرآباد، نواب شاہ، میرپور خاص، گھوٹکی اور لاڑکانہ کی باکرانی روڈ سے ملحقہ علاقے کرونا وائرس کی زد میں ہیں۔
تازہ ترین اعداد و شمار کے مطابق سندھ میں اب تک 26 ہزار سے زائد ٹیسٹ کیے گئے ہیں۔ ان میں 2767 کیسز مثبت آئے ہیں۔
صوبائی حکومت کے ترجمان کے مطابق کرونا وائرس سے 61 افراد کی موت واقع ہوچکی ہے اور 635 ایسے مریض ہیں جو صحت یاب ہوچکے ہیں۔
مشرق وسطیٰ رمضان کی روایتی رونقوں اور سرگرمیوں سے خالی ہو گا
مشرق وسطیٰ اس بار ماہِ رمضان کی روایتی رونقوں اور سرگرمیوں سے خالی ہو گا۔ کرونا وائرس کے پھیلاؤ کو روکنے کے لیے احتیاطی تدابیر کے طور پر نہ تو افطار پارٹیاں ہو سکیں گی اور نا ہی مساجد میں باجماعت نماز۔
مشرق وسطیٰ میں اگلے ہفتے سے اسلامی مہینہ رمضان شروع ہونے والا ہے۔ اس ماہ کو مقدس ترین مہینہ تصور کیا جاتا ہے۔
دنیا بھر میں آباد تمام مسلمان ماہِ رمضان میں طلوعِ فجر سے غروب آفتاب تک تمام دن کچھ نہیں کھاتے پیتے جب کہ شام کو افطار کا اہتمام کیا جاتا ہے۔
لیکن اس سال تیزی سے پھیلتی کرونا وائرس کی وبا نے سعودی عرب اور لبنان سے لے کر لیبیا اور عراق و یمن کے جنگی علاقوں تک سب جگہ رمضان کی روایت و سرگرمیوں کو محدود سے محدود تر کر دیا ہے۔
جرمنی میں دکانیں کھلنا شروع
یورپی ملک جرمنی میں کرونا وائرس کے سبب نافذ کردہ لاک ڈاؤن میں نرمی کرتے ہوئے کچھ دکانیں کھول دی گئی ہیں۔
یورپی ممالک اٹلی، اسپین اور فرانس میں کرونا وائرس کے سبب ایک دن میں ہونے والی ہلاکتوں کی تعداد میں مسلسل کمی دیکھی جا رہی ہے جس کے بعد ان ملکوں نے پابندیوں میں نرمی پر غور شروع کر دیا ہے۔
جرمنی نے پیر کو بعض دکانیں کھولنے کی اجازت دے دی ہے جب کہ حکام کا کہنا ہے کہ مختلف شہروں میں بڑی دکانیں بھی جلد کھول دی جائیں گی۔
جرمنی میں چار مئی سے اسکول بھی کھول دیے جائیں گے۔ جرمنی کو یورپ میں کرونا وائرس پر قابو کرنے والا سب سے کامیاب ملک قرار دیا جا رہا ہے۔