کرکٹ سے دوری کے باعث 'ردھم' میں آنے میں وقت لگے گا: بابر اعظم
پاکستان کرکٹ ٹیم کے قابل اعتماد بلے باز بابر اعظم نے اعتراف کیا ہے کہ کرونا وائرس کے باعث کرکٹ نہ ہونے سے صلاحیتوں کو زنگ لگ رہا ہے۔ لیکن اُن کے بقول بنیادی تبدیلیوں کے بعد وہ 'ردھم' میں آ جائیں گے۔
خبر رساں ادارے 'رائٹرز' کے مطابق ایک انٹرویو کے دوران بابر اعظم نے کہا کہ "کرکٹ سے طویل دوری سستی پیدا کر سکتی ہے۔ لیکن اگر کرکٹر اپنی بنیاد یاد رکھے تو دوبارہ ردھم میں آ سکتا ہے۔"
اُنہوں نے کہا کہ ردھم حاصل کرنے میں وقت لگے گا۔ لیکن وہ ایسا کرنے میں کامیاب ہو جائیں گے اور لوگ اسی بابر اعظم کو دوبارہ دیکھیں گے۔ جسے اُنہوں نے چند ہفتے قبل دیکھا تھا۔
بابر اعظم مارچ کے وسط میں پاکستان سپر لیگ (پی ایس ایل) منسوخ ہونے کے بعد دیگر کھلاڑیوں کی طرح گھر تک ہی محدود ہیں۔ عالمی سطح پر کرکٹ سمیت دیگر تمام کھیلوں کی سرگرمیاں بھی معطل ہیں۔
ایران: ٹیکنالوجی کے شعبے سے منسلک خواتین مشکلات کا شکار
ایران میں کرونا وائرس کے پھیلاؤ نے جہاں ملکی معیشت کو شدید نقصان پہنچایا ہے۔ وہیں ٹیکنالوجی کے شعبے میں تگ و دو کے بعد نوکری حاصل کرنے والی ایرانی خواتین کو اپنی ملازمتیں بچانے کا چیلنج بھی درپیش ہے۔
کرونا وائرس کے باعث ٹیکنالوجی کے شعبے سے وابستہ بہت سی خواتین گھروں سے کام کر رہی ہیں۔ انہی میں فرشتے قصری بھی شامل ہیں، جن کے بقول گھر سے کام کرنے کے فوائد بھی ہیں اور نقصانات بھی۔
فرشتے ایران کی آن لائن بکنگ کی سب سے بڑی سروس 'علی بابا' کے 'ہیومن ریسورس' شعبے کی سربراہ ہیں۔
کرونا وائرس کے باعث ٹریولنگ کا شعبہ بھی سب سے متاثرہ ہونے والے کاروبار میں شامل ہے۔ فرشتے اور ان کے ساتھیوں کو بھی اپنی ملازمتوں کے تحفظ کے حوالے سے کئی خدشات ہیں۔
- By سہیل انجم
بھارت: لوک سبھا سیکرٹریٹ کے ملازم کا کرونا ٹیسٹ مثبت
بھارت میں کروناوائرس کے کیسز اور ہلاکتوں میں مسلسل اضافہ ہو رہا ہے۔ منگل کو لوک سبھا سکریٹریٹ کے ایک ملازم اور صدر کی رہائش گاہ راشٹرپتی بھون کی ایک ملازمہ کے گھر کے ایک فرد کا کرونا ٹیسٹ مثبت آیا ہے۔
حکام نے راشٹرپتی بھون کمپلکس کے کم از کم 125 اسٹاف کوارٹرز کو سیل کر کے ان کے مکینوں کو قرنطینہ مراکز میں بھیج دیا ہے۔
لوک سبھا سکریٹریٹ اور راشٹرپتی بھون کمپلیکس میں کرونا وائرس کے سامنے آںے والے یہ پہلے کیسز ہیں۔
دوسری جانب ریاست اتر پردیش کی پولیس نے لاک ڈاؤن کی خلاف ورزی کرنے والوں کے خلاف 24000 سے زائد مقدمات درج کر لیے ہیں جب کہ 71000 سے زائد افراد کے خلاف کارروائی کی گئی ہے۔
پولیس نے جیلوں پر دباؤ اور کرونا وائرس کے پھیلاؤ کے خدشے کے پیشِ نظر تمام ملزمان کو ضمانت پر رہا بھی کر دیا ہے۔
ایڈیشنل چیف سکریٹری کے مطابق پولیس نے لاک ڈاؤن کی خلاف ورزی کرنے والوں سے جرمانے کے طور پر ساڑھے نو کروڑ روپے بھی وصول کیے ہیں۔
یاد رہے کہ بھارت میں کرونا وائرس سے ہلاک ہونے والوں کی تعداد 590 اور مثبت کیسز کی تعداد 18 ہزار 601 ہے۔
- By شمیم شاہد
افغانستان میں پھنسے 520 پاکستانیوں کی وطن واپسی
کرونا وائرس کے باعث افغانستان میں پھنس جانے والے پاکستانی باشندوں کی واپسی کا عمل جاری ہے۔
حکام کا کہنا ہے کہ منگل کو مزید 520 افراد افغانستان سے براستہ طورخم گزرگاہ واپس آ گئے ہیں جنہیں کرونا وائرس سے متاثرہ یا مشتبہ افراد کے نگہداشت اور طبی معائنے کے لیے قائم کردہ قرنطینہ کے خصوصی مراکز منتقل کر دیا گیا ہے۔
افغانستان میں پھنسنے والے پاکستانی باشندوں کی واپسی کا عمل 18 مارچ کو شروع ہوا تھا۔ حکام کے بقول اب تک 1200 سے زائد شہری افغانستان سے وطن واپس آ چکے ہیں جن میں سے 950 قرنطینہ کے مراکز میں داخل ہیں۔
حکام کا کے مطابق سرحد پار موجود مزید ڈیڑھ ہزار پاکستانی باشندوں کی واپسی کا عمل بھی اگلے چند روز میں مکمل کر لیا جائے گا۔