امریکہ میں کرونا وائرس سے ریکارڈ یومیہ ہلاکتیں، نئے ریلیف پیکج پر آج دستخط ہوں گے
امریکہ کے صدر ڈونلڈ ٹرمپ کرونا وائرس سے متاثر ہونے والے چھوٹے کاروباروں اور اسپتالوں کی معاونت کے لیے 484 ارب ڈالر کے امدادی پیکج پر جمعے کو دستخط کریں گے۔ وائٹ ہاؤس کی جانب سے جاری اعلامیے میں کہا گیا ہے کہ دستخط ایوانِ صدر کے 'اوول آفس' میں کیے جائیں گے۔
گزشتہ دو ماہ کے دوران یہ امریکی صدر کی جانب سے چوتھا امدادی پیکج ہے۔ یہ پیکج لاکھوں امریکیوں کو ریلیف اور چھوٹے کاروباری حضرات کی مدد کے لیے دیا جا رہا ہے۔
کرونا وائرس کا پھیلاؤ روکنے کے لیے امریکہ کی بیشتر ریاستوں میں لاک ڈاؤن ہے جس سے کاروبارِ زندگی شدید متاثر ہے اور لاکھوں افراد بے روزگار ہو چکے ہیں۔
کرونا وائرس کی وبا پھیلنے کے بعد سے اب تک دو کروڑ 60 لاکھ سے زائد امریکیوں نے بے روزگاری الاؤنس کے لیے درخواستیں جمع کرائی ہیں۔ صرف گزشتہ ہفتے میں ہی 44 لاکھ سے زائد درخواستیں جمع کرائی گئی ہیں۔
لہٰذا امریکی صدر نے چھوٹے کاروباروں اور اسپتالوں کی مدد کے لیے 484 ارب ڈالر کے ایک اور پیکج کا اعلان کیا ہے جو ایوانِ نمائندگان سے بھی کثرت رائے سے منظور ہو چکا ہے۔
مزید پڑھیے
اگلے 15 روز اہم ہیں، لوگ گھروں کو عبادت گاہ بنائیں: ڈی جی آئی ایس پی آر
پاکستانی فوج کے ترجمان میجر جنرل بابر افتخار کا کہنا ہے کہ کرونا کے حوالے سے اگلے پندرہ دن بہت اہم ہیں۔ بہتر ہے عوام گھروں کو عبادت گاہیں بنائیں اور احتیاط کریں۔
رال پنڈی میں نیوز کانفرنس کرتے ہوئے انہوں نے بتایا کہ کرونا وبا کی وجہ سے پاکستان کے مختلف علاقوں میں فوج کی تعیناتی کی گئی ہے اس کے لیے فوج سیکیورٹی الاؤنس وصول نہیں کرے گی۔
میجر جنرل بابر افتخار نے کہا کہ سیکیورٹی ٹاسک سے متعلق اقدامات کا تسلسل جاری رکھا جائے گا۔ فوج کی روٹین اور ٹریننگ بھی جہاں تک ممکن ہو جاری رکھی جائے گی۔
ڈی جی آئی ایس پی آر کا کہنا تھا کہ ٹریک اینڈ ٹریس ٹیکنالوجی کے تحت ہاٹ سپاٹس پر سمارٹ لاک ڈاؤن کی پالیسی اپنا رہے ہیں۔
میجر جنرل بابر افتحار کا کہنا تھا کہ پاکستان میں صورتِ حال اب بھی قابو میں ہے۔ لیکن پاکستانیوں کو اجتماعی احتیاط کی ضرورت ہے۔
اُن کا کہنا تھا کہ لوگ رمضان میں اپنے گھروں کو عبادت گاہ بنائیں۔
میجر جنرل بابر افتحار نے بتایا کہ پاکستان میں سول اور فوجی قیادت مل کر اس خطرے کا مقابلہ کر رہی ہے۔
مزید پڑھیے
- By ضیاء الرحمن
چمن بارڈر کھل گیا، پاکستانی ٹرانسپورٹرز کی وطن واپسی شروع
پاکستان نے افغانستان میں پھنسے ٹرک ڈرائیوروں کی وطن واپسی کے لیے چمن بارڈر کھول دیا ہے۔ حکام کے مطابق سرحدی گزرگاہ ہفتے میں تین دن کھولی جائے گی۔ سرحد پار کرنے والے تمام افراد کو اسکریننگ کے بعد سرحد کے نزدیک بنائے جانے والے قرنطینہ مرکز میں رکھا جائے گا۔ مزید جانیے مرتضیٰ زہری کی اس رپورٹ میں۔
- By ضیاء الرحمن
پنجاب میں کرونا وائرس کے مزید 84 کیسز رپورٹ
صوبۂ پنجاب میں کرونا وائرس کے مزید 84 کیسز سامنے آئے ہیں جس کے بعد صوبے بھر میں 'کووڈ 19' کے مریضوں کی مجموعی تعداد 4851 ہو گئی ہے۔
ترجمان محکمۂ صحت پنجاب حافظ قیصر عباس کے مطابق کرونا وائرس کے مریضوں میں 768 زائرین، تبلیغی جماعت کے 1915 افراد، 86 قیدی اور 2082 عام شہری شامل ہیں۔
ترجمان پرائمری اینڈ سیکنڈری ہیلتھ کئیر پنجاب کے مطابق کرونا وائرس کے سب سے زیادہ مریض لاہور میں رپورٹ ہوئے ہیں جہاں 943 افراد میں وائرس پایا گیا ہے۔ اس کے علاوہ راولپنڈی میں 197، جہلم میں 37، گوجرانوالہ میں 117 اور گجرات میں 169 افراد میں کرونا وائرس کی تصدیق ہوئی ہے۔
محکمۂ صحت پنجاب کے مطابق کورونا وائرس سے اب تک صوبے بھر میں 68 اموات ہو چکی ہیں اور 925 افراد اس بیماری سے صحت یاب ہو چکے ہیں۔ اب تک 67 ہزار سے زائد افراد کے کرونا وائرس ٹیسٹ کیے جا چکے ہیں۔
دوسری جانب پنجاب میں جاری لاک ڈاؤن میں نرمی کے باعث صوبائی دارالحکومت لاہور کی مختلف مساجد میں نمازِ جمعہ کے اجتماعات ہوئے۔ بیشتر مساجد نماز کی ادائیگی کے دوران لوگوں کے درمیان فاصلے کے احکامات کو یقینی بنایا گیا۔