کرونا وائرس سے سب سے زیادہ متاثرہ ملک
بورس جانسن کی 10 ڈاؤننگ اسٹریٹ آمد
برطانوی وزیرِ اعظم بورس جانسن کرونا وائرس سے مکمل صحت یاب ہونے کے بعد دوبارہ کام پر واپس آ گئے ہیں۔
بورس جانسن کے قریبی حلقوں نے تصدیق کی ہے کہ وہ اتوار کی شام 10 ڈاؤننگ اسٹریٹ پہنچے ہیں اور وہ پیر کو کابینہ اجلاس کی صدارت بھی کریں گے۔
بورس جانسن کرونا وائرس سے متاثر ہونے والے کسی ملک کے پہلے سربراہ ہیں۔ وہ تین روز تک انتہائی نگہداشت یونٹ میں بھی تھے اور لگ بھگ تین ہفتوں کے بعد ان کی دوبارہ سرکاری رہائش گاہ واپسی ہوئی ہے۔
بھارت: قرنطینہ میں موجود خاتون اجتماعی زیادتی کا شکار
بھارت کی ریاست راجستھان کے ایک اسکول میں قائم قرنطینہ میں ایک مزدور خاتون مبینہ طور پر تین افراد کی اجتماعی زیادتی کا نشانہ بن گئی۔
ایک پولیس عہدیدار نے اتوار کو بتایا کہ یومیہ اجرت پر مزدوری کرنے والی خاتون گھر کا راستہ بھول گئی تھی جس پر اسے پولیس اسٹیشن میں پناہ لینا پڑی تھی۔
پولیس نے خاتون کو صبح ہونے تک ایک اسکول میں قائم قرنطینہ میں ٹھہرا دیا تھا جہاں اس کے ساتھ مبینہ طور تین افراد نے اجتماعی کی۔
راجستھان کے ضلع سوائی مادھوپور کے ڈپٹی سپرنٹنڈنٹ پولیس پرتھ شرما نے برطانوی خبر رساں ادارے 'رائٹرز' کو فون پر بتایا کہ خاتون سے زیادتی کرنے والے تینوں ملزمان کو گرفتار کر کے جیل بھیج دیا گیا ہے۔