اسپین میں لاک ڈاؤن میں نرمی، بچوں کے ہمراہ پارکس میں جانے کی اجازت
اسپین میں کرونا وائرس کی شدت میں کمی آنے کے بعد لاک ڈاؤن میں نرمی کی گئی ہے۔ لوگوں کو بچوں سمیت گھروں سے نکلنے اور پارکس جانے کی اجازت دے دی گئی ہے۔
عالمی وبا کے پیشِ نظر اسپین میں گزشتہ چھ ہفتوں سے لاک ڈاؤن جاری تھا اور لوگوں کو گھروں میں رہنے کی ہدایت کی گئی تھی
لاک ڈاؤن میں رمضان کی سرگرمیاں
دنیا بھر میں ماہ رمضان کا آغاز ہو چکا ہے۔ کرونا وائرس کی وبا اور لاک ڈاؤن کے باوجود رمضان کی خصوصی عبادات اور دیگر سرگرمیاں جاری ہیں۔ لیکن اس بار کا رمضان گزشتہ برسوں کی نسبت خاصا مختلف ہے۔ مساجد میں محدود اجتماعات ہو رہے ہیں اور بازاروں میں خریداروں کا رش نہیں ہے۔
برطانیہ میں لاک ڈاؤن میں فوری نرمی کا امکان مسترد
برطانیہ کے وزیر اعظم بورس جانسن نے کہا ہے کہ حکومت ابھی نہیں کہہ سکتی کہ کب تک لاک ڈاؤن سے متعلق پالیسی میں نرمی کی جا سکے گی اور یہ کس قدر جلد ممکن ہو سکے گا۔
برطانوی وزیر اعظم کا کہنا تھا کہ ہم ابھی یہ نہیں کہہ سکتے کہ کب کس قدر جلد یا کتنی دیر سے تبدیلی لا سکیں گے۔
انہوں نے کہا کہ حکومت اس حوالے سے آنے والے دنوں میں ہی کچھ بتا سکے گی۔
برطانوی وزیر اعظم کے مطابق یہ تمام فیصلے انتہائی شفافیت سے کیے جائیں گے۔
خیال رہے کہ برطانوی وزیر اعظم بورس جانسن نے کرونا وائرس سے صحت یاب ہونے کے بعد پیر کو دوبارہ اپنی ذمہ داریاں سنبھالی ہیں جب کہ ان پر شدید دباؤ ہے کہ وہ برطانیہ میں لاک ڈاؤن کے حوالے سے واضح نقشہ پیش کریں اور برطانیہ میں وبا کے ٹیسٹ کم ہونے کے حوالے سے سوالات کے جواب دیں۔
چین کے دو بڑے شہروں میں تعلیمی ادارے کھل گئے
چین کے دو انتہائی اہم شہروں میں تین ماہ بعد اسکول کھول دیے گئے ہیں جہاں بچوں کی تدریس کا سلسلہ ایک بار پھر شروع ہو گیا ہے۔
فرانسیسی خبر رساں ادارے 'اے ایف پی' کی رپورٹ کے مطابق چین کی حکومت نے کرونا وائرس کے باعث عائد پابندیوں میں بتدریج نرمی کرنا شروع کر دی ہے۔
پیر سے بیجنگ اور شنگھائی میں تعلیمی ادارے کھول دیے گئے جہاں کئی ماہ بعد تدریس کا سلسلہ ایک بار پھر بحال ہوا ہے۔
شنگھائی میں ثانوی اور اعلیٰ ثانوی جماعتوں کے اُن طلبہ کو کلاس میں جانے کی اجازت دی گئی ہے جو فائنل ایئر میں ہیں۔ بیجنگ میں صرف اعلیٰ ثانوی تعلیمی اداروں کے طلبہ کو کلاسز میں جانے کی اجازت دی گئی ہے۔
اسکول کھلنے کے حوالے سے شنگھائی کی 18 سالہ طالبہ ہانگ ہوان کا کہنا تھا کہ "مجھے خوشی ہے کہ میں ایک طویل عرصے کے بعد اپنی ہم جماعت ساتھیوں سے مل سکوں گی۔