افغانستان سے آنے پاکستانیوں کا قرنطینہ میں احتجاج، گھر جانے پر اصرار
افغانستان سے پاکستان آںے والے تین درجن سے زائد افراد نے گھر جانے کی اجازت دینے کے لیے لنڈی کوتل میں قائم قرنطینہ سینٹر میں احتجاج کیا۔
قبائلی ضلع خیبر کے انتظامی عہدے داروں نے احتجاج کی تصدیق کرتے ہوئے کہا ہے کہ جب تک صوبائی حکومت یا دیگر عہدے دار حکم نہیں دیتے ان لوگوں کو جانے کی اجازت نہیں دی جا سکتی۔
پوسٹ گریجویٹ کالج میں قائم قرنطینہ مرکز میں داخل تین درجن سے زائد افراد نے منگل کی صبح کالج کے گراؤنڈ میں آکر دھرنا دے دیا۔
مظاہرین کا موقف تھا کہ وہ مکمل طور پر صحت یاب ہیں۔ ان کے کرونا ٹیسٹ بھی منفی آئے ہیں۔ لیکن اُنہیں گھروں کو جانے کی اجازت نہیں دی جا رہی۔
البتہ ضلعی انتظامیہ کے اہلکاروں کا کہنا ہے کہ ان لوگوں میں سے کئی شوگر کے مریض ہیں۔ لہذٰا ان لوگوں کو قرنطینہ میں رکھا گیا ہے۔
خیبرپختونخوا کے وزیر اعلٰی کے مشیر برائے اطلاعات اجمل وزیر نے رابطے پر وائس آف امریکہ کو بتایا کہ صحت مند افراد کو گھر جانے کی اجازت ہے۔ لیکن مشتبہ افراد کو کم سے کم 14 روز قرنطینہ میں گزارنے ہوں گے۔
اجمل وزیر نے کہا کہ ابھی تک طورخم کے راستے افغانستان سے 1987 افراد واپس آئے ہیں۔ اور ان میں 900 سے زائد کو گھر جانے کی اجازت دی گئی ہے۔
صدر ٹرمپ کرونا کے باعث افغانستان سے فوج کا فوری انخلا چاہتے ہیں: رپورٹ
امریکی ذرائع ابلاغ نے بعض عہدے داروں کے بیانات کا حوالہ دیتے ہوئے انکشاف کیا ہے کہ صدر ڈونلڈ ٹرمپ افغانستان میں کرونا کے پھیلاؤ کے پیشِ نظر امریکی فوج کا جلد انخلا چاہتے ہیں۔
امریکی نشریاتی ادارے 'این بی سی نیوز' میں پیر کو شائع ہونے والی ایک رپورٹ کے مطابق صدر ٹرمپ تقریباً روزانہ اپنے مشیروں سے افغانستان میں کرونا کے پھیلاؤ کے پیش نظر فوج کے حوالے سے فکر مندی کا اظہار کر چکے ہیں۔ صدر افغانستان میں کرونا کے پھیلاؤ کو امریکی فوج کے لیے خطرہ قرار دے رہے ہیں۔
رپورٹ کے مطابق صدر ٹرمپ کے یہ تحفظات ایسے وقت میں سامنے آئے ہیں۔ جب امریکہ اور طالبان کے درمیان رواں سال فروری میں طے پانے والے امن معاہدے پر عمل درآمد میں سست روی پر بھی امریکی حکام تشویش کا اظہار کر رہے ہیں۔
ماہرین کا کہنا ہے کہ افغانستان میں تشدد کے بڑھتے ہوئے واقعات اور اس صورتِ حال میں کرونا وائرس کا پھیلاؤ افغانستان سے امریکی فوج کے جلد انخلا کا پیش خیمہ ہو سکتا ہے۔
فیس ماسک پہننے کا درست طریقہ کیا ہے؟
دنیا بھر میں کرونا سے دو لاکھ 11 ہزار سے زائد ہلاکتیں
