اسلام آباد: 30 نئے کیسز سامنے آنے کے بعد دو سب سیکٹرز سیل
اسلام آباد کے سیکٹر آئی-10 کے دو سب سیکٹرز میں 30 سے زائد کرونا وائرس کے نئے کیسز سامنے آنے کے بعد انہیں سیل کر دیا گیا ہے۔
اسلام آباد کی ضلعی انتظامیہ کی جانب سے جاری نوٹیفکیشن میں کہا گیا ہے کہ ان دو سب سیکٹرز میں کرونا کیسز سامنے آنے کے بعد سیل کیا جارہا ہے.
نوٹیفکیشن کے مطابق اس مقصد کے لیے پولیس کے ساتھ ساتھ رینجرز اور فوج کی نفری بھی طلب کر لی گئی ہے۔
ضلعی انتظامیہ کی رپورٹ کے مطابق 28 اپریل تک اس علاقے میں 30 سے زائد کیسز سامنے آ چکے تھے جس کی وجہ سے اس علاقے کو ہائی رسک قرار دے کر سیل کرنے کے احکامات جاری کیے گئے ہیں کیونکہ علاقے میں موجود مریضوں سے وبا پھیلنے کا خدشہ تھا۔
بیشتر مریضوں کو گھروں پر قرنطینہ کیا گیا ہے اور ضلعی انتظامیہ کی ٹیمیں مزید افراد کے ٹیسٹ کر رہی ہیں۔
بندرگاہ پر موجود سیکڑوں گاڑیوں کو لے جانے والا کوئی نہیں
وبا سے بچاؤ کے حفاظتی لباس میں ورزش
حکمران اشرافیہ نے فیصلہ کیا کہ ملک میں لاک ڈاؤن کرنا ہے: عمران خان
پاکستان کے وزیر اعظم عمران خان نے کہا ہے کہ حکمران اشرافیہ نے فیصلہ کیا کہ ملک میں لاک ڈاؤن کرنا ہے۔ وبا نے امیروں اور غریبوں میں تمیز نہیں کی لیکن حکمران اشرافیہ گھبرا گئے۔ یومیہ کمانے والے کے بارے میں نہیں سوچا گیا۔
طبی مصنوعات کی نمائش کی افتتاحی تقریب سے خطاب میں عمران خان کا کہنا تھا کہ کرونا وائرس نے سکھایا کہ اپنے پاؤں پر کھڑا ہونا ہے۔ قوم کو پورا ویژن دیں گے۔ ہمارا ویژن کسی چھوٹے طبقے کے لیے نہیں پورے ملک کے لیے ہو گا۔
ان کا کہنا تھا کہ کرونا وائرس سے پہلے ہر شخص علاج کے لیے بیرون ملک جاتا تھا۔ کرونا وائرس کے بعد سب ملک میں علاج کرا رہے ہیں۔ ہمیں اپنے اسپتال درست کرنے ہیں اور انہیں بہتر بنانا ہے۔
انہوں نے کہا کہ پاکستان میں اشرافیہ کا طبقہ مغرب سے بے انتہا متاثر تھا۔ اعلیٰ طبقے نے ملکی پیداواری صلاحیت کو کمزور بنایا ہوا تھا۔
پاکستان میں پیداواری صلاحیت موجود ہے۔ جوملک جوہری ہتھیار بنا سکتا ہے اس کے لیے وینٹی لیٹر بنانا مشکل ہے؟
عمران خان نے کہا کہ ڈیڑھ سال ملک کو دیوالیہ ہونے سے بچانے میں گزر گیا۔
ان کے بقول پاکستان نے ماضی میں تعلیم اور تحقیق پر پیسہ خرچ نہیں کیا۔
وزیر اعظم نے کہا کہ قومیں خود پر اعتماد کرکے آگے جاتی ہیں۔ برطانیہ چھوٹا سا ملک لیکن دنیا پر حکمرانی کرتا رہا۔ مدینہ کی ریاست کا نمونہ سب کے لیے بہترین مثال ہے۔
ان کا مزید کہنا تھا کہ خود اعتمادی لوگوں کومشکلات سے نبرد آزما ہونے کے قابل بناتی ہے۔ بدقسمتی سے ہم میں خود اعتمادی کی کمی رہی۔ خود اعتمادی سے غلامانہ سوچ سے نکلا جا سکتا ہے۔
بھارت کے وزیر اعظم کا ذکر کرتے ہوئے ان کا کہنا تھا کہ نریندر مودی نے ملک بند کر دیا غریب لوگوں کا سوچا ہی نہیں۔ لاک ڈاؤن کا اعلان کر دیا گیا سوچا ہی نہیں گیا کہ یومیہ کمانے والے کا کیا بنے گا۔