دنیا کو کرونا وائرس کے ساتھ جینا سیکھنا ہوگا: عالمی ادارۂ صحت
عالمی ادارۂ صحت نے خبردار کیا ہے کہ کرونا وائرس ختم ہونے والا نہیں اور دنیا کو اس وبا کے ساتھ ہی جینا سیکھنا ہو گا۔
دنیا بھر میں کرونا وائرس سے تین لاکھ سے زائد افراد ہلاک ہو چکے ہیں اور وبا پر قابو پانے کے لیے کئی ممالک لاک ڈاؤن اور دیگر پابندیوں میں نرمی کی طرف جا رہے ہیں۔ تاہم ماہرین مسلسل خبردار کر رہے ہیں کہ ایسا کرنے سے وبا کی شدت میں اضافہ ہو سکتا ہے۔
عالمی ادارۂ صحت نے بھی کرونا وائرس کے پھیلاؤ کو سنگین قرار دیا ہے۔
ادارے کے ہنگامی حالات کے ڈائریکٹر مائیکل ریان نے بدھ کو جنیوا میں ورچوئل پریس کانفرنس کرتے ہوئے کہا کہ کرونا وائرس انسانیت میں سرایت کر چکا ہے اور اب یہ پیش گوئی نہیں کی جا سکتی کہ اس پر کب تک قابو پایا جا سکتا ہے۔
انہوں نے کہا کہ دنیا سے اب تک ایچ آئی وی ختم نہیں ہوا اور اب اسے کرونا وائرس کی صورت میں ایک وبا کا چیلنج درپیش ہے جو جلد ختم ہونے والا نہیں ہے۔
کرونا وائرس کے مریضوں کی تعداد 45 لاکھ ہوگئی
دنیا بھر میں کرونا وائرس کے کیسز کی تعداد جمعرات کو 45 لاکھ تک پہنچ گئی جبکہ 3 لاکھ 10 ہزار سے زیادہ اموات ہوچکی ہیں۔ وائرس سے صحت یاب ہونے والوں کی تعداد 17 لاکھ ہوگئی ہے۔
جانز ہاپکنز یونیورسٹی اور ورڈومیٹرز کے مطابق امریکہ میں مزید 1400 مریض دم توڑ گئے ہیں۔ اس طرح اموات کی کل تعداد ساڑھے 86 ہزار سے بڑھ گئی جبکہ مریضوں کی تعداد ساڑھے 14 لاکھ ہے۔ امریکہ میں ایک کروڑ 5 لاکھ شہریوں کے کرونا وائرس ٹیسٹ کیے جاچکے ہیں۔
24 گھنٹوں کے دوران برازیل میں 460، برطانیہ میں 428، فرانس میں 351، میکسیکو میں 294، اٹلی میں 262، اسپین میں 217 اور کینیڈا میں 166 افراد ہلاک ہوئے۔ برطانیہ میں کم از کم 41 ہزار، اٹلی میں 31 ہزار، فرانس اور اسپین میں 27 ہزار اور برازیل میں ساڑھے 13 ہزار ہلاکتیں ہوئی ہیں۔
اب تک پانچ ملکوں میں ایک لاکھ سے زیادہ مریض شفایاب ہوچکے ہیں جن میں امریکہ 3 لاکھ سے زیادہ تعداد کے ساتھ سرفہرست ہے۔
افغانستان میں کرونا کے مزید 413 کیس رپورٹ
افغانستان میں کووڈ-19 کے مریضوں کی تعداد میں اضافہ ہو رہا ہے اور گزشتہ 24 گھنٹوں میں ریکارڈ 413 کیسز کے ساتھ مریضوں کی کل تعداد 5639 ہو گئی ہے۔
وزارتِ صحت کے نائب وزیر ڈاکٹر واحداللہ مجروح نے کابل میں جمعرات کو ایک نیوز کانفرنس میں بتایا کہ کابل میں ایک روز میں 188کیسز کا اندراج ہوا۔ انہوں نے اس اضافے کی وجہ لوگوں کی شہروں کی طرف واپسی قرار دیا ہے۔
ڈاکٹر مجروح نے کہا کہ اب تک کرونا وائرس کی وجہ سے مرنے والوں کی تعداد 136 ہو گئی ہے۔ انہوں نے خبردار کیا کہ لاک ڈاؤن کے جلد خاتمے کے نتیجے میں کرونا سے متاثر ہونے والوں کی تعداد میں اضافہ ہو رہا ہے۔
کرونا وائرس موسم خزاں میں دوبارہ زور پکڑے گا: ڈاکٹر رک برائٹ
امریکہ کے صدر ڈونلڈ ٹرمپ سے کرونا کا علاج ملیریا کی دوا کلورو کوئن کے معاملے پر اختلاف کرنے والے ڈاکٹر رک برائٹ آج امریکی ایوانِ نمائندگان میں اپنا بیان دیں گے۔
ڈاکٹر رک برائٹ کا کہنا تھا کہ اُنہیں اس لیے برطرف کر دیا گیا تھا کیوں کہ وہ حکومت کی کرونا وائرس سے نمٹنے کی حکمت عملی میں سائنس کو بنیادی فوقیت دینے پر اصرار کرتے رہے تھے۔
ایوان نمائندگان کی صحت سے متعلق ذیلی کمیٹی میں اپنے ابتدائی کلمات میں انہوں نے کہا کہ ہمیں اس بات سے بخوبی آگاہ ہونا چاہیے کہ ہم کس قسم کی صورت حال کا سامنا کر رہے ہیں۔
انہوں نے کہا کہ امریکہ میں دنیا کے بہترین سائنس دان موجود ہیں۔ لہذا انہیں کرونا وائرس کے خلاف مہم کی قیادت کرنے کی اجازت دی جانی چاہیے۔
ڈاکٹر رک برائٹ کا کہنا تھا کہ امریکی کانگریس کے اراکین یہ جاننا چاہتے ہیں کہ اس وبا سے نمٹنے کے لیے حکومت کی حکمت عملی کیا ہے جس سے اب تک امریکہ میں 84,000 ہلاکتیں ہو چکی ہیں۔
انہوں نے کہا کہ اس بات کے ناقابل تردید شواہد موجود ہیں کہ کرونا وائرس اس سال موسم خزاں میں دوبارہ زور پکڑے گا جس سے اس سے نمٹنے کا چیلنج مزید مشکل ہو جائے گا۔ کیونکہ اس کے ساتھ ساتھ موسمی نزلہ زکام بھی پیدا ہو گا۔
اُن کے بقول اس وقت ملک کے صحت کی دیکھ بھال کے نظام پر شدید دباؤ ہو گا۔ ان کا کہنا تھا کہ ان سمیت دیگر طبی ماہرین نے جو اقدامات تجویز کیے ہیں ان پر باقاعدہ منصوبہ بندی کے تحت عمل کیے بغیر 2020 کا موسم سرما امریکی تاریخ کے بدترین موسم کا روپ اختیار کر سکتا ہے۔