'حکومت آئندہ بجٹ میں کوئی نیا ٹیکس نہیں لگائے گی'
وزیرِ اعظم کے مشیر برائے خزانہ اور محصولات ڈاکٹر عبدالحفیظ شیخ نے اعلان کیا ہے کہ حکومت آئندہ بجٹ 21-2020 میں کوئی نیا ٹیکس لاگو نہیں کرے گی۔
حفیظ شیخ نے آئندہ بجٹ کو 'کرونا بجٹ' کا نام دیتے ہوئے کہا کہ اس اسمارٹ بجٹ میں معیشت کو دوبارہ سے رواں رکھنے کے اقدامات کیے جائیں گے۔
نجی ٹیلیویژن کو دیے گئے انٹرویو میں وزیرِ اعظم کے مشیر نے کہا کہ حکومت آنے والے بجٹ میں بہت سی اشیا پر ڈیوٹی صفر کرے گی جس سے صنعتوں اور پاکستان کے عوام کو راحت ملے گی۔
'کرونا بجٹ' کے حوالے سے حفیظ شیخ نے مزید کہا کہ حکومت اسمارٹ بجٹ تیار کر رہی ہے جس کے تحت حکومتی اخراجات اور ترقیاتی بجٹ کو بھی محدود رکھا جائے گا کیوں کہ آئندہ مالی سال بھی کرونا وائرس کے اثرات ملکی معیشت پر جاری رہیں گے۔
خیال رہے کہ وزارتِ خزانہ نے آئندہ مالی سال کے لیے مجموعی قومی پیداوار کا ہدف ایک فی صد رکھنے کا فیصلہ کیا ہے۔
اقوام متحدہ کا افریقہ کے لیے امداد کا مطالبہ
اقوامِ متحدہ کے سیکریٹری جنرل انتونیو گوتریس نے کرونا وائرس کی وبا کے حوالے سے افریقہ کے لیے عالمی امداد کا مطالبہ کرتے ہوئے کہا ہے کہ افریقی ممالک کو حفظان صحت کا نظام بہتر اور خوراک کی ترسیل کو یقینی بنانے کے لیے بین الاقوامی مالی امداد کی اشد ضرورت ہو گی۔
ایک بیان میں افریقی ممالک کی تعریف کرتے ہوئے انہوں نے کہا کہ ان ممالک نے قرنطینہ اور سرحدیں بند کرنے کے سلسلے میں بر وقت اقدامات کیے جب کہ وائرس کے پھیلاؤ کو روکنے کے لیے علاقائی تعاون پر انحصار کرتے ہوئے حکمت عملی وضع کی۔
انہوں نے کہا کہ کرونا وائرس سے افریقی ممالک کی ترقی کو خطرہ لاحق ہے۔ اس سے طویل عرصے سے جاری عدم مساوات، بڑھتی ہوئی بھوک و افلاس، خوراک کی کمی اور بیماریوں کے خطرات درپیش ہیں۔
سیکریٹری جنرل نے کہا کہ افریقی ممالک سے اشیا کی مانگ، سیاحت اور رقوم کی ترسیل پہلے ہی کم ہو چکی ہے۔ تجارتی زون کے معاملات بھی متاثر ہوئے ہیں۔
ان کے بقول اس بات کا حقیقی خطرہ موجود ہے کہ بڑی تعداد میں شہری انتہائی غربت کا شکار ہو جائیں۔
- By شمیم شاہد
خیبرپختونخوا حکومت کا سیاحتی مقامات بند رکھنے کا فیصلہ
خیبرپختونخوا حکومت نے کرونا وائرس کے باعث جاری جزوی لاک ڈاؤن کو مدنظر رکھتے ہوئے صوبے کے سیاحتی مقامات بند رکھنے فیصلہ کیا ہے۔
محکمہ سیاحت کے سیکریٹری خوشحال خان نے کہا ہے کہ حکومت کی کوشش ہے کہ وائرس پر جلد قابو پا لیا جائے جس کے بعد سیاحوں کے لیے سیاحتی مقامات کھولے جائیں گے۔
خیبرپختونخوا حکومت نے نئے ایس او پیز کا مسودہ تیار کیا ہے تاہم متعلقہ اسٹیک ہولڈرز کے ساتھ مشاورت کے بعد مناسب وقت پر اس کی منظوری دی جائے گی۔
- By شمیم شاہد
خیبرپختونخوا: عوامی نیشنل پارٹی کے متعدد رہنما وائرس سے متاثر
خیبر پختونخوا میں کرونا وائرس سے عوامی نیشنل پارٹی کے کئی رہنما متاثر ہوئے ہیں۔
گزشتہ روز پارٹی کے مرکزی سیکریٹری جنرل میاں افتخار حسین کے بھائی محمد سریر وائرس سے انتقال کر گئے تھے جب کہ میاں افتخار حسین بھی وبا سے متاثر ہوئے ہیں اور گھر میں قرنطینہ میں ہیں۔
میاں افتخار حسین اپنے بھائی کی نمازِ جنازہ میں شریک تھے تاہم ان کی حالت بگڑنے پر انہیں گھر منتقل کر دیا گیا تھا۔
عوامی نیشنل پارٹی کے مرکزی رہنما اور سابق وفاقی وزیر حاجی غلام احمد بلور بھی دو دن قبل وائرس سے متاثر ہوئے ہیں جب کہ ان کے خاندان کے دیگر افراد کے ٹیسٹ کے نتائج کا انتظار ہے۔