بھارت میں ایک دن میں سب سے زیادہ کیس رپورٹ
بھارت میں 24 گھنٹوں کے دوران کرونا وائرس کے 6767 کے مزید کیسز سامنے آئے ہیں جو کہ ایک دن میں سامنے آنے والے کیسز کی سب سے زیادہ تعداد ہے۔
وزارت صحت کے مطابق 24 گھنٹوں کے دوران کرونا وائرس سے 147 ہلاکتیں رپورٹ کی گئی ہیں۔ جس کے بعد اس وبا سے ہلاکتوں کی تعداد 3867 تک پہنچ چکی ہے۔
بھارتی نشریاتی ادارے ‘این ڈی ٹی وی’ کے مطابق اتوار کے روز مسلسل تیسرے دن کرونا وائرس سے چھ ہزار سے زائد کیسز رپورٹ ہوئے ہیں۔
انڈونیشیا میں 21 مزید ہلاکتیں، 526 نئے کیسز رپورٹ
انڈونیشیا میں اتوار کے روز کرونا وائرس کے 526 مزید کیسز سامنے آئے ہیں۔ جس کے بعد انڈونیشیا میں کرونا وائرس سے متاثرہ افراد کی تعداد 22271 تک پہنچ گئی ہے۔
اس مہلک وبا سے انڈونیشیا میں اتوار کے روز ہونے والی 21 ہلاکتوں کے بعد کل ہلاکتوں کی تعداد 1372 ہوگئی ہے۔
برطانیہ یکم جون سے پرائمری اسکول کھولنے کے لیے تیار
برطانیہ کی حکومت نے اعلان کیا ہے کہ کرونا وائرس کے سبب پیدا ہونے والی صورت حال کے پیش نظر طے شدہ پروگرام کے تحت یکم جون سے پرائمری اسکول کھول دیے جائیں گے۔
خبر رساں ادارے ‘رائٹرز’ کے مطابق وزیر برائے ٹرانسپورٹ گرانٹ شیپس کا اتوار کو کہنا تھا کہ اسکول کھولنے سے متعلق اساتذہ اور مزدوروں کی کچھ یونینز کی طرف سے مخالفت سامنے آرہی ہے۔ تاہم برطانوی حکومت اسکول یکم جون سے کھول دے گی۔
پاکستان میں وبا سے متاثرہ افراد کی تعداد میں مزید اضافہ، ہلاکتیں 1133 ہو گئیں
پاکستان میں کرونا وائرس سے مزید 32 افراد کی ہلاکت کے بعد اموات کی تعداد 1133 ہو گئی ہے۔
سرکاری اعداد و شمار کے مطابق پاکستان میں گزشتہ 24 گھنٹوں میں مزید 2164 افراد میں وائرس کی تصدیق ہوئی ہے جس کے بعد مریضوں کی تعداد 54601 ہو گئی ہے۔
سرکاری ویب سائٹ 'کوئڈ' پر موجود تفصیلات کے مطابق پاکستان میں اب تک 4 لاکھ 73 ہزار افراد کے کرونا وائرس کے ٹیسٹ کیے گئے ہیں جب کہ گزشتہ 24 گھنٹوں میں 12915 ٹیسٹ کیے گئے۔
حکام کا دعویٰ ہے کہ کرونا وائرس سے متاثر ہونے والے 17198 افراد صحت یاب ہو چکے ہیں۔
خیال رہے کہ وائرس سے سب سے زیادہ 21645 افراد سندھ میں متاثر ہوئے ہیں۔ جب کہ پنجاب میں 19557، خیبر پختونخوا میں 7685، بلوچستان میں 3306، وفاقی دارالحکومت اسلام آباد میں 1592، گلگت بلتستان میں 619 اور پاکستان کے زیر انتظام کشمیر میں 197 افراد میں وائرس کی تصدیق ہوئی ہے۔