افریقہ میں ایک دن میں 10 ہزار کیسز کا اضافہ
افریقہ میں کرونا وائرس کے پھیلاؤ میں تیزی آ گئی ہے جب کہ ایک دن میں 10ہزار مصدقہ کیسز سامنے آئے ہیں۔
رپورٹس کے مطابق افریقی ممالک میں گزشتہ 24 گھنٹوں میں مجموعی طور پر 9761 کیسز کا اضافہ ہوا ہے جس کے بعد متاثرہ افراد کی مجموعی تعداد دو لاکھ 50 ہزار ہو گئی ہے۔
خیال رہے کہ برِ اعظم افریقہ کی مجموعی آبادی ایک ارب 20 کروڑ کے قریب ہے۔
افریقی ممالک میں حکومتوں نے اب تک چھ ہزار 800 کے قریب ہلاکتوں کی تصدیق کی ہے۔
حکام کا کہنا ہے کہ وبا سے متاثرہ ایک لاکھ 14 ہزار افراد صحت یاب بھی ہو چکے ہیں۔
وفاقی وزیرِ آئی ٹی سید امین الحق بھی کرونا وائرس میں مبتلا
پاکستان کے وفاقی وزیر برائے انفارمیشن ٹیکنالوجی (آئی ٹی) سید امین الحق بھی کرونا وائرس میں مبتلا ہو گئے ہیں۔
سید امین الحق کے مطابق انہیں گزشتہ کئی روز سے بخار تھا جس کے بعد انہوں نے خود کو آئسولیٹ کر لیا تھا۔ گزشتہ روز انہوں نے کرونا ٹیسٹ کرایا تھا جو مثبت آیا ہے۔
دوسری جانب پیپلز پارٹی کی سینئر رہنما اور سندھ اسمبلی کی سابقہ ڈپٹی اسپیکر شہلا رضا بھی کرونا وائرس میں مبتلا ہو گئی ہیں۔
ٹوئٹر پر اپنے ایک پیغام میں شہلا رضا نے بتایا کہ ان کا کرونا ٹیسٹ مثبت آیا ہے۔