میکسیکو میں سات ہزار سے زائد نئے کیسز
لاطینی امریکہ کے ملک میکسیکو میں گزشتہ چوبیس گھنٹوں کے دوران کرونا وائرس کے مزید 7051 کیسز رپورٹ ہوئے ہیں۔
دنیا بھر میں کرونا وائرس سے سب سے زیادہ متاثر ہونے والے ملکوں کی فہرست میں میکسیکو کا ساتواں نمبر ہے جہاں گزشتہ چوبیس گھنٹوں میں مزید 836 اموات رپورٹ ہوئی ہیں۔
وزارتِ صحت کے مطابق ملک بھر میں کرونا وائرس کے کیسز کی تعداد تین لاکھ 11 ہزار 486 اور 36 ہزار 327 اموات ہو چکی ہیں۔
نیوزی لینڈ کو وائرس کی دوسری لہر کے لیے تیار رہنا چاہیے: وزیرِ اعظم
نیوزی لینڈ کی وزیرِ اعظم جیسنڈا آرڈرن نے عوام کو خبردار کیا ہے کہ انہیں کرونا وائرس کی دوسری لہر کے لیے تیار رہنا چاہیے۔
ویلنگٹن میں بدھ کو صحافیوں سے گفتگو کرتے ہوئے جیسنڈا آرڈرن نے کہا کہ دنیا بھر میں کرونا وائرس کے کیسز میں ایک مرتبہ پھر اضافہ ہو رہا ہے۔ اگر نیوزی لینڈ میں اس وبا کی مقامی سطح پر منتقلی سامنے آئی تو وبا کے خاتمے کی حکمتِ عملی پر عمل درآمد کیا جائے گا۔
انہوں نے کہا کہ حکومت نے ایک فریم ورک جاری کیا ہے جس کے تحت نئے کیسز سامنے آنے کی صورت میں کرونا وائرس کا مقابلہ کیا جائے گا۔
اُن کے بقول دنیا بھر میں کرونا وائرس پر قابو پانے کے لیے کوئی بھی نظام سو فی صد کارآمد نہیں ہے۔
یاد رہے کہ نیوزی لینڈ میں ڈھائی ماہ قبل مقامی سطح پر رپورٹ ہونے والا آخری کیس سامنے آیا تھا۔ ملک بھر میں اب تک اس وبا سے 22 اموات اور 1200 کیسز رپورٹ ہوئے تھے۔
کرونا وائرس کی ویکسین آزمائش کے آخری مرحلے میں داخل
امریکہ کی بایوٹیک کمپنی 'موڈرنا' کی تیار کردہ کرونا وائرس کی ویکسین نے تمام رضاکاروں میں مدافعتی نظام کو متحرک کر دیا ہے جس سے اس کی کامیابی کی توقعات بڑھ گئی ہیں۔
موڈرنا نے اس ویکسین کو نیشنل انسٹی ٹیوٹس آف ہیلتھ کے تعاون سے تیار کیا ہے۔
نیو انگلینڈ جرنل آف میڈیسن میں منگل کو شائع ہونے والی رپورٹ کے مطابق ویکسین کے معمولی مضر اثرات دیکھنے میں آئے ہیں جن میں تھکن، ٹھنڈ لگنا، سر درد، پٹھوں کا درد اور انجکشن کے مقام پر درد شامل ہیں۔
یہ پہلی امریکی ویکسین ہے جس کی آزمائش کے نتائج سینئر ماہرین کی نگرانی میں شائع ہوئے ہیں۔
'نیویارک اب کرونا وائرس سے نمٹنے کے لیے تیار ہے'
امریکی ریاست فلوریڈا میں ایک ہی دن میں کرونا وائرس سے ہلاکتوں کی تعداد ریکارڈ حد سے بڑھ گئی ہے۔ ایک ہی دن میں ایک سو بتیس افراد کرونا وائرس سے ہلاک ہوئے ہیں۔ اس وقت ریاست کے صرف ایک مقامی ہیلتھ سسٹم جیکسن ہل میں دو سو کے قریب ہیلتھ ورکر کرونا سے متاثر ہو چکے ہیں۔
کچھ عرصہ پہلے ایسی ہی خبریں نیویارک سے بھی آرہی تھیں۔ مگر اب وہاں صورتِ حال بہت مختلف ہے اور نہ صرف اس وائرس کے بہت کم مریض زیرِ علاج ہیں بلکہ اموات کا سلسلہ بھی رک سا گیا ہے۔
اب نیویارک اس قابل ہے کہ جن ریاستوں میں وائرس کا زور ہے، انہیں وینٹیلیٹرز، ماسک، گاؤن اور دواؤں کی پیشکش کر سکے۔ اس کے اپنے ہیلتھ کئیر ورکرز اس وائرس کے خلاف لڑائی میں مدد کیلئے دیگر ریاستوں میں جا رہے ہیں اور یہ سب وہ مدد ہے جو چند ماہ پہلے نیویارک کے اسپتالوں کا سہارا بنی تھی۔