انڈونیشیا میں کرونا کے مزید 1752 کیس رپورٹ
انڈونیشیا میں ہفتے کو کرونا وائرس کے مزید 1752 کیس رپورٹ ہوئے ہیں جس کے بعد ملک بھر میں کیسز کی مجموعی تعداد 84 ہزار 882 ہو گئی ہے۔
وزارت صحت کے ایک عہدیدار اچمند یوریانٹو نے برطانوی خبر رساں ادارے کو بتایا کہ ہفتے کو وبائی مرض سے مزید 59 افراد ہلاک ہوگئے جس کے بعد ہلاکتوں کی مجموعی تعداد چار ہزار 16 ہوگئی ہے۔
انڈونیشیا میں رواں ماہ کے آغاز سے اب تک یومیہ اوسطً 1200 سے زائد نئے کیسز سامنے آرہے ہیں۔ انڈونیشیا آبادی کے لحاظ سے دنیا کا چوتھا بڑا ملک ہے۔ وہاں جون کے آخر میں لاک ڈاؤن میں نرمی کا اعلان کیا گیا تھا لیکن نئے کیسز کی تعداد میں اضافے کے بعد ملک بھر میں واقع تمام سنیما ہالز کھولنے کا ارادہ ترک کردیا گیا ہے جب کہ جکارتہ میں دو ہفتوں تک کے لیے دوبارہ لاک ڈاؤن نافذ کیا گیا ہے، اس دوران تمام سماجی اور سفری پابندیاں برقرار رہیں گی۔
کرونا کی شکار ایشوریا رائے بھی اسپتال منتقل
کرونا وائرس میں مبتلا بالی وڈ اداکارہ ایشوریا رائے کو بھی اسپتال منتقل کر دیا گیا ہے۔ اس سے قبل اُن کے سسر امیتابھ بچن کو کرونا کے باعث اسپتال منتقل کیا گیا تھا۔
گزشتہ ہفتے امیتابھ بچن نے ٹوئٹر پر اعلان کیا تھا کہ اُن کا کرونا ٹیسٹ مثبت آیا ہے۔ اس کے بعد ایشوریا رائے، اُن کے شوہر ابھیشک بچن اور آٹھ سالہ بیٹی ارادھیا کا کرونا ٹیسٹ بھی مثبت آیا۔
بچن فیملی کے یہ اراکین ممبئی کے نانا وتی اسپتال میں زیرِ علاج ہیں۔ امیتابھ بچن کی اہلیہ جیا بچن کا کرونا ٹیسٹ منفی آیا تھا۔
چین میں کرونا کے مزید 22 کیس رپورٹ
چین میں جمعے کو کرونا وائرس کے 22 نئے کیسز رپورٹ ہوئے ہیں جن میں سے 16 کا تعلق ملک کے مغربی علاقے سنکیانگ کے دارالحکومت اُرمچی سے ہے جہاں کرونا وائرس کے کیسز پر قابو پانے کے لیے ہنگامی منصوبہ بندی کا اعلان کردیا گیا ہے۔
علاقائی حکومت کا کہنا ہے کہ حالیہ تمام نئے کیسز مقامی طور پر ایک فرد سے دوسرے فرد تک منتقل ہوئے ہیں۔
اُرمچی کا شمار چین کے اُن شہروں میں ہوتا تھا جو اب تک اس وبا سے بچے ہوئے تھے۔ اس علاقے میں وائرس کے شبہے میں 269 افراد کی نگرانی بھی کی جا رہی ہے۔