امریکہ عالمی وبا کے 'نئے دور' میں داخل ہو گیا: مشیر وائٹ ہاؤس
وائٹ ہاؤس کی کرونا وائرس سے متعلق مشیر ڈیبرا برکس نے تنبیہ کی ہے کہ امریکہ عالمی وبا کے 'نئے دور' میں داخل ہو گیا ہے جس میں دیہی علاقوں میں مقیم شہریوں کو بھی وائرس لگنے کا اتنا ہی خطرہ ہے جتنا کسی شہر میں رہنے والے کو درپیش ہے۔
انہوں نے امریکی نشریاتی ادارے 'سی این این' سے گفتگو کرتے ہوئے کہا کہ کرونا وائرس غیر معمولی تیزی سے پھیل رہا ہے۔ دیہی علاقوں میں رہنے والوں کو معلوم ہونا چاہیے کہ وہ بھی خطرے میں ہیں۔ انہوں نے کہا کہ وائرس کی صورتِ حال مارچ اور اپریل سے مختلف ہے۔
ڈیبرا برکس نے تلقین کی کہ کرونا وائرس سے بچاؤ کے لیے ماسک پہنیں اور احتیاطی تدابیر پر سختی سے عمل کریں۔
خیال رہے کہ امریکہ میں کرونا وائرس کے کیسز کی کل تعداد 46 لاکھ 65 ہزار سے زائد ہو چکی ہے جب کہ اموات ایک لاکھ 54 ہزار 834 ہو چکی ہیں۔
سنگاپور آنے والوں کو قرنطینہ میں رکھنے کے لیے الیکٹرونک ڈیوائس پہنائی جائے گی
سنگاپور کے حکام نے پیر کو اعلان کیا ہے کہ کرونا وائرس کے پیشِ نظر سنگاپور آنے والے کچھ افراد کو ایک الیکٹرونک ڈیوائس پہننا ہوگی تاکہ اس بات کو یقینی بنایا جا سکے کہ وہ قرنطینہ کے احکامات کی پابندی کر رہے ہیں۔
یہ الیکٹرونک ڈیوائسز سنگاپور آنے والوں کو 11 اگست سے دی جائیں گی۔ یہ ڈیوائسز سنگاپور کے شہریوں اور مستقل رہائش رکھنے والے ان افراد کو بھی پہنائی جائیں گی جو 11 اگست کو سنگاپور پہنچیں گے۔
خبر رساں ادارے 'رائٹرز' کے مطابق یہ ڈیوائسز صرف ان افراد کو پہنائی جائیں گی جو کچھ مخصوص ملکوں سے سنگاپور پہنچیں گے اور ان افراد کو اپنے گھر پر قرنطینہ میں رہنے کی پابندی پر عمل کرنا ہو گا۔ گھر سے نکلنے کی کوشش پر یہ ڈیوائس حکام کو آگاہ کر دے گی۔
پاکستان میں کرونا کے 553 نئے کیسز، 24 گھنٹوں میں صرف چھ اموات
کرونا وائرس سے متعلق سرکاری ویب سائٹ پر جاری ہونے والے اعداد و شمار کے مطابق پاکستان میں گزشتہ 24 گھنٹوں کے دوران 14 ہزار افراد کے کرونا ٹیسٹس کیے گئے جن میں سے 553 ٹیسٹس مثبت آئے ہیں۔
گزشتہ 24 گھنٹوں میں کرونا سے جان کی بازی ہارنے والوں کی تعداد چھ ہے۔
پنجاب میں سمارٹ لاک ڈاؤن ختم کرنے کا اعلان
پنجاب کی حکومت نے صوبہ بھر میں فوری طور پر اسمارٹ لاک ڈاؤن ختم کرنے کا فیصلہ کیا ہے۔ پنجاب حکومت نے لاک ڈاون 5 اگست کی بجائے اتوار اور پیر کی درمیانی شب ختم کرنے کا اعلان کر دیا ہے۔
سیکرٹری پرائمری اینڈ سیکنڈری ہیلتھ کیئر کیپٹن ریٹائرڈ محمد عثمان کی جانب سے جاری کردہ نوٹیفکیشن کے مطابق مویشی منڈیوں سے لیے گئے اسمارٹ سیمپلز کے نتائج حوصلہ افزا آنے پر اسمارٹ لاک ڈاؤن ختم کرنے کا فیصلہ کیا گیا۔
سیکرٹری پرائمری اینڈ سیکنڈری ہیلتھ کئیر کے مطابق عیدالاضحٰی پر بازاروں اور تجارتی مراکز کی بندش سے کرونا وائرس کے پھیلاؤ کے امکانات کم ہونے پر فیصلہ کیا گیا۔
نوٹیفکیشن میں 5 اگست کو کشمیریوں سے اظہار یکجہتی کے لیے اجتماع کی اجازت ہو گی۔ تمام متعلقہ ادارے کشمیر ریلی کے دوران سماجی فاصلہ اور دیگر تمام ایس او پیز پر عمل درآمد یقینی بنائیں گے۔
محکمہ صحت کی جانب سے جاری کردہ مراسلے کے مطابق تعلیمی ادارے، شادی ہال، ریسٹورنٹ، پارک اور سینما ہال بدستور بند رہیں گے۔ سماجی اور مذہبی اجتماعات، کھیل کی سرگرمیوں کے لیے اجتماع کی اجازت نہیں ہو گی۔
نوٹیفکیشن میں کہا گیا ہے کہ تمام کاروباری مقامات صبح 9 سے شام 7 بجے تک، سوموار تا جمعہ کھلے رہیں گے۔ میڈیکل اسٹور، پنکچر شاپ، آٹا چکی تندور، زرعی ورکشاپس 24 گھنٹے کھلی رکھنے کی اجازت ہو گی جب کہ کال سنٹرز کو 50 فی صد سٹاف کے ساتھ کھلا رکھنے کی اجازت ہو گی۔
بین الاضلاع ٹرانسپورٹ 24 گھنٹے چلنے کی اجازت ہو گی۔ گراسری اور کریانہ سٹور صبح 9 سے شام 7 تک، ہفتہ بھر کھلے رہیں گے۔
سیکرٹری پرائمری اینڈ سکینڈری ہیلتھ کئیر کے نوٹیفکیشن میں کہا گیا ہے کہ چرچ صرف اتوار کو صبح 7 سے شام 5 بجے تک عبادت کے لیے کھلے رہیں گے۔ نوٹیفکیشن کا اطلاق فی الفور ہو گا جو کہ 17 اگست تک نافذ العمل رہے گا۔
یاد رہے حکومتِ پنجاب نے عیدالاضحٰی پر کرونا وائرس کے اثرات کو کم سے کم کرنے کے لیے گزشتہ ماہ 28 جولائی کو صوبہ بھر میں اسمارٹ لاک ڈاؤن نافذ کیا تھا۔ جسے پانچ اگست تک نافذالعمل رہنا تھا۔