بھارت میں ہلاکتیں 50 ہزار سے تجاوز کر گئیں
بھارت میں گزشتہ چوبیس گھںٹوں کے دوران کرونا وائرس سے مزید 941 اموات ہوئی ہیں جس کے بعد ہلاکتوں کی کل تعداد 50 ہزار سے تجاوز کر گئی ہے۔
سرکاری اعداد و شمار کے مطابق بھارت میں پیر کو مزید 57 ہزار سے زیادہ افراد میں وائرس کی تشخیص ہوئی ہے جس کے بعد ملک بھر میں کیسز کی کل تعداد 26 لاکھ 47 ہزار سے زیادہ ہو گئی ہے۔
وزارتِ صحت کے حکام کا کہنا ہے کہ 19 لاکھ سے زیادہ مریض صحت یاب ہو چکے ہیں جب کہ چھ لاکھ 76 ہزار سے زیادہ مریض اب بھی زیرِ علاج ہیں۔
کرونا وائرس: نیوزی لینڈ میں عام انتخابات ایک ماہ کے لیے ملتوی
نیوزی لینڈ میں کرونا وائرس کی نئی لہر آنے کے بعد عام انتخابات ایک ماہ کے لیے ملتوی کر دیے گئے ہیں۔
19 ستمبر کو ہونے والے انتخابات ملتوی کرنے کا اعلان وزیراعظم جیسنڈرا آرڈرن نے پیر کو ایک پریس کانفرنس کے دوران کیا۔ التوا کی وجہ آکلینڈ میں دوسری مرتبہ نافذ کیا جانے والا لاک ڈاؤن ہے۔
نیوزی لینڈ میں کرونا وائرس کی دوسری لہر کے دوران پیر کو 9 نئے کیسز سامنے آگئے جس کے بعد فعال کیسز کی تعداد 78 ہوگئی جب کہ ملک بھر میں متاثرین کی مجموعی تعداد 1280 تک پہنچ گئی ہے۔ اب تک 22 افراد ہلاک ہو چکے ہیں۔
موجودہ صورت حال کے پیش نظر وزیراعظم نے انتخابات کے لیے نئی تاریخ کا اعلان کیا ہے۔ شیڈول کے مطابق اب انتخابات 17 اکتوبر کو ہوں گے۔
جیسنڈا آرڈرن پر حزب اختلاف کی جماعتوں کی جانب سے انتخابات ملتوی کرنے کا دباؤ تھا۔ ان جماعتوں کا کہنا تھا کہ آکلینڈ میں لاک ڈاؤن کے سبب انتخابی مہم نہیں چلائی جاسکتی۔ ساتھ ہی ان جماعتوں کا یہ بھی کہنا تھا کہ آزادانہ اور منصفانہ انتخابات کو یقینی بنانے کے لیے انتخابی مہم کو وقت دینا پڑے گا۔
وزیراعظم نے اپنی پریس کانفرنس کے دوران کہا کہ 17 اکتوبر تک تمام جماعتوں کو اپنی مہم چلانے کا بھرپور موقع مل جائے گا تاہم انہوں نے انتخابات میں 17 اکتوبر کے بعد مزید تاخیر سے انکار کر دیا۔
پاکستان میں مزید سات اموات، 488 نئے کیسز رپورٹ
پاکستان میں گزشتہ چوبیس گھنٹوں کے دوران کرونا وائرس کے شکار مزید سات مریض دم توڑ گئے ہیں جب کہ 488 افراد میں وائرس کی تشخیص ہوئی ہے۔
سرکاری اعداد و شمار کے مطابق ملک بھر میں کرونا وائرس سے اب تک ہلاکتوں کی تعداد 6175 ہو گئی ہے۔
پاکستان میں کرونا وائرس کے کیسز کی مجموعی تعداد دو لاکھ 89 ہزار سے زیادہ ہے اور دو لاکھ 69 ہزار سے زیادہ مریض صحت یاب ہو چکے ہیں۔
حکام کا کہنا ہے کہ وبا کے شکار 771 مریضوں کی حالت تشویش ناک ہے۔
فوجی افسر کرونا کا شکار، امریکہ اور جنوبی کوریا کی مشقیں دو دن کے لیے ملتوی
امریکہ اور جنوبی کوریا کی سالانہ مشترکہ فوجی مشقیں کرونا وائرس کے سبب دو دن کے لیے ملتوی کر دی گئی ہیں۔
دونوں ممالک کے درمیان اب یہ مشقیں اتوار کے بجائے منگل سے شروع ہوں گی۔
جنوبی کوریا کے سرکاری خبر رساں ادارے کے مطابق مشترکہ فوجی مشقوں میں شرکت کرنے والے ایک فوجی افسر کے کرونا وائرس سے متاثر ہونے کی تصدیق ہوئی ہے۔
جنوبی کوریا کے جوائنٹ چیفس آف اسٹاف کا کہنا تھا کہ کرونا وائرس کی صورتِ حال کو دیکھتے ہوئے اب ان مشقوں کا آغاز منگل سے ہوگا۔
خیال رہے کہ ان مشترکہ فوجی مشقوں کو شمالی کوریا انتہائی سنجیدگی سے دیکھتا ہے اور انہیں ‘جنگ کی آزمائشی مشقیں’ قرار دیتا ہے۔