بھارت: لگ بھگ 70 ہزار نئے کیسز، 819 مریض ہلاک
بھارت میں منگل کو کرونا وائرس کے مزید 69 ہزار 921 متاثرین سامنے آ گئے ہیں جس کے بعد متاثرین کی مجموعی تعداد 37 لاکھ ہو گئی ہے۔
بھارت کی وزارتِ صحت کے مطابق گزشتہ 24 گھنٹوں کے دوران کرونا وائرس سے مزید 819 مریض ہلاک ہو گئے۔ بھارت میں عالمی وبا سے ہلاکتوں کی کل تعداد 65 ہزار 288 تک پہنچ گئی ہے۔
پاکستان میں 300 افراد میں وائرس کی تشخیص
پاکستان میں گزشتہ چوبیس گھنٹوں کے دوران کرونا وائرس کے چار مریض ہلاک اور 300 افراد میں وائرس کی تشخیص ہوئی ہے۔
سرکاری اعداد و شمار کے مطابق پاکستان میں کرونا وائرس سے اب تک 6298 اموات ہو چکی ہیں اور دو لاکھ 96 ہزار سے زیادہ کیسز رپورٹ ہو چکے ہیں۔
حکام کے مطابق ملک بھر میں 26 لاکھ سے زیادہ افراد کے کرونا ٹیسٹ کیے جا چکے ہیں اور متاثرہ مریضوں میں سے دو لاکھ 80 ہزار سے زیادہ مریض صحت یاب ہو چکے ہیں۔
بھارت میں 78 ہزار سے زائد افراد میں وائرس کی تشخیص
بھارت میں کرونا وائرس کے متاثرین کی تعداد میں ایک مرتبہ پھر ریکارڈ اضافہ ہو گیا ہے۔ گزشتہ چوبیس گھنٹوں کے دوران مزید 78 ہزار 512 افراد میں وائرس کی تشخیص ہوئی ہے۔
گزشتہ روز بھی بھارت میں 87 ہزار 700 سے زیادہ کیسز رپورٹ ہوئے تھے جو ایک روز کے دوران اب تک کسی بھی ملک کے مقابلے میں رپورٹ ہونے والے سب سے زیادہ کیسز تھے۔
بھارت کی وزارتِ صحت کے مطابق ملک بھر میں کرونا وائرس کے کیسز کی کل تعداد 36 لاکھ سے تجاوز کر گئی ہے جب کہ اس وبا سے 64 ہزار 469 مریض ہلاک ہو چکے ہیں۔
دنیا بھر میں کرونا وائرس سے متاثرہ ملکوں کی فہرست میں بھارت تیسرے نمبر پر ہے۔ امریکہ اور برازیل کا بدستور پہلا اور دوسرا نمبر ہے۔
آسٹریلیا: پیر کا دن مہلک ترین ثابت
آسٹریلیا میں پیر کا دن کرونا وائرس سے ہونے والی ہلاکتوں کے حوالے سے مہلک ترین ثابت ہوا ہے۔
آسٹریلیا کی ریاست وکٹوریہ میں گزشتہ چوبیس گھنٹوں کے دوران 41 مریض ہلاک ہوئے جب کہ 73 افراد میں وائرس کی تشخیص ہوئی ہے۔
آسٹریلیا کی دوسری سب سے بڑی ریاست وکٹوریہ میں 30 جون تک سب سے کم 67 کیسز سامنے آئے تھے تاہم کرونا وائرس کی دوسری لہر کے دوران اس تعداد میں اضافہ ہو گیا ہے۔