نیویارک کا میٹرو پولیٹن میوزیم آف آرٹ دوبارہ کھل گیا
نیویارک شہر میں قائم امریکہ کا 'میٹرو پولیٹن میوزیم آف آرٹ' چھ ماہ کی بندش کے بعد جب حال ہی میں کھلا تو لوگوں کی لمبی قطار میوزیم میں داخلے کی منتظر تھی۔ یہ عجائب گھر کرونا کی عالمی وبا کے باعث بند کرنا پڑا تھا۔ اس میوزیم کا دوبارہ کھلنا بہت سے لوگوں کے لیے معمولاتِ زندگی کی بحالی کی ایک علامت ہے۔
آسٹریلیا: وکٹوریا میں لاک ڈاؤن کے باوجود وائرس کا پھیلاؤ جاری، مزید 11 ہلاکتیں
آسٹریلیا کی ریاست وکٹوریا میں گزشتہ 24 گھنٹوں کے دوران کرونا وائرس کے مزید 76 کیسز رپورٹ ہوئے ہیں۔ جب کہ 11 افراد وبائی مرض کے سبب ہلاک ہوئے ہیں۔
وکٹوریا کے دارالحکومت میلبرن میں لگ بھگ پانچ ہفتوں کے لاک ڈاؤن کے باوجود وائرس کے پھیلاؤ میں اضافہ ہو رہا ہے۔
آسٹریلوی معیشت میں ایک چوتھائی حصہ ڈالنے والی ریاست وکٹوریا کے شہری مطالبہ کر رہے ہیں کہ وائرس کا پھیلاؤ روکنے کے لیے نافذ پابندیاں ختم کی جائیں۔ تاکہ معاشی سرگرمیاں شروع ہو سکیں۔
وکٹوریا کے پریمیئر ڈینیئل انیڈریوز کا کہنا ہے کہ وائرس صحت کا معاملہ ہے۔ جب تک اسے حل نہیں کیا جاتا معیشت میں بہتری نہیں آ سکتی۔
خیال رہے کہ آسٹریلیا میں کرونا وائرس سے متاثرہ افراد میں سے 75 فی صد کیسز یعنی 19479 وکٹوریا سے سامنے آئے ہیں۔ جب کہ 90 فی صد ہلاکتیں یعنی 661 اموات بھی وکٹوریا میں ہوئی ہیں۔
کرونا وائرس میں خوبصورتی تلاش کرنے والی آرٹسٹ
ملیے ایک امریکی فن کارہ لورا اسپلین سے جنہیں کرونا وائرس میں بھی دلکشی کا پہلو نظر آتا ہے۔ لورا ایک عرصے سے وائرسز کی دنیا کے انوکھے اور حیران کن پہلوؤں کو آرٹ کے ذریعے پیش کر رہی ہیں۔ بائیولوجی اور آرٹ کا حسین اور منفرد امتزاج دیکھیے اس رپورٹ میں
پاکستان میں 24 گھنٹوں میں مزید 513 کیسز کا اضافہ، 285 افراد صحت یاب
پاکستان میں گزشتہ 24 گھنٹوں میں کرونا وائرس کے مزید 513 مریض سامنے آئے ہیں.
سرکاری اعداد و شمار کے مطابق پاکستان میں اب تک 2 لاکھ 98 ہزار سے زائد افراد کے کرونا وائرس سے متاثر ہونے کی تصدیق ہوئی ہے۔ ان متاثرہ لوگوں میں سے 95 فی صد کے قریب یعنی 2 لاکھ 82 ہزار سے زائد افراد صحت یاب ہو چکے ہیں۔
گزشتہ 24 گھنٹوں میں 285 افراد کے صحت یاب ہونے کی تصدیق کی گئی ہے۔
پاکستان میں دو ماہ قبل جون میں سب سے زیادہ یومیہ کیسز سامنے آتے رہے ہیں۔ 14 جون کو ملک میں 6825 افراد کے کرونا وائرس سے متاثر ہونے کی تصدیق ہوئی تھی۔ جو کہ ایک دن میں سامنے آنے والے کیسز کی سب سے زیادہ تعداد تھی۔
جون میں ملک میں یومیہ اوسطاََ چار ہزار سے زائد کیسز سامنے آتے رہے۔ اس کے بعد سے اس میں کمی آنا شروع ہوئی۔ گزشتہ ماہ کے آخر سے ملک میں یومیہ کیسز کی تعداد 400 سے 500 تک آ چکی ہے۔