میکسیکو میں ہلاکتیں 70 ہزار سے متجاوز
میکسیکو میں گزشتہ 24 گھنٹوں کے دوران مزید 534 اموات کے بعد کرونا وائرس کے باعث ہونے والی ہلاکتوں کی تعداد 70 ہزار سے تجاوز کر گئی ہے۔
وزارتِ صحت کے حکام کے مطابق جمعے کو کرونا وائرس کے مزید 5 ہزار 935 کیسز سامنے آئے جس کے بعد میکسیکو میں متاثرہ افراد کی تعداد 6 لاکھ 58 ہزار سے زائد ہو گئی ہے۔
وبا کے باعث میکسیکو کی معیشت میں مزید 13 فی صد گراوٹ دیکھی جا رہی ہے۔
اعداد و شمار کے مطابق امریکہ،بھارت اور برازیل کے بعد میکسیکو کرونا وائرس سے سب سے زیادہ متاثرہ چوتھا ملک ہے۔
خیال رہے کہ میکسیکو میں ہونے والی ایک تحقیق میں کہا گیا تھا کہ رواں سال مارچ کے وسط سے اگست کے آغاز تک ایک لاکھ 20 ہزار سے زائد اضافی اموات ہوئی ہیں۔
تحقیق میں یہ بھی کہا گیا تھا کہ یہ لازمی نہیں کہ یہ اضافی اموات کرونا وائرس کے باعث ہی ہوئی ہوں۔
امریکہ میں یومیہ اموات میں کمی
دنیا بھر میں کرونا وائرس سے سب سے زیادہ متاثرہ ملک امریکہ میں یومیہ ہلاکتوں کی تعداد میں کمی ہو رہی ہے۔ جب کہ ماہرین نے خبردار کیا ہے کہ سردیوں میں اس وبا کے باعث ایک بار پھر ہلاکتوں میں اضافہ ہو سکتا ہے۔
ماہرین کا کہنا ہے کہ سردی کی شدت میں اضافے کے باعث لوگوں کے چار دیواری کے اندر زیادہ وقت گزارنے سے وبا کے پھیلاؤ میں اضافہ ہو سکتا ہے۔
واشنگٹن یونیورسٹی کے پروفیسر علی موقداد کا کہنا ہے کہ جب تک کرونا ویکسین نہیں آ جاتی۔ ہمیں اپنے معمولاتِ زندگی بدلنا ہوں گے۔
خیال رہے کہ امریکہ میں کرونا وائرس سے متاثرہ افراد کی تعداد 64 لاکھ سے تجاوز کر چکی ہے۔ جب کہ ایک لاکھ 93 ہزار سے زائد افراد اس وبا کا نشانہ بن کر ہلاک ہو چکے ہیں۔
برازیل میں مزید 874 اموات، مجموعی ہلاکتیں 30 ہزار سے متجاوز
لاطینی امریکہ کے ملک برازیل میں گزشتہ 24 گھنٹوں کے دوران کرونا وائرس کے مزید 43 ہزار 718 کیسز سامنے آئے ہیں۔
اعداد و شمار کے مطابق برازیل میں وبا سے متاثرہ افراد کی تعداد 42 لاکھ 82 ہزار سے تجاوز کر گئی ہے۔
وزارتِ صحت کی جانب سے جمعہ کو جاری کردہ اعداد و شمار کے مطابق کرونا وائرس کے باعث گزشتہ 24 گھنٹوں میں مزید 874 اموات ہوئی ہیں۔
ملک بھر میں وبا سے اب تک ایک لاکھ 30 ہزار 396 افراد ہلاک ہو چکے ہیں۔
فرانس کا کیسز میں اضافے کے باوجود دوبارہ لاک ڈاؤن نہ کرنے کا اعلان
یورپی ملک فرانس کے وزیرِ اعظم جوں کیسٹکس کا کہنا ہے کہ کرونا وائرس کے بڑھتے ہوئے کیسز کے باوجود حکومت لاک ڈاؤن ناٖفذ نہیں کر رہی۔
فرانسیسی وزیرِ اعظم نے جمعے کو لوگوں سے اپیل کی تھی کہ وہ کرونا وائرس کے پھیلاؤ کو روکنے کے لیے سماجی دوری اختیار کریں اور فیس ماسک پہنیں۔
وزارت صحت کے کرونا وائرس سے متعلق اعداد و شمار کے مطابق جمعرات کو وبا سے متاثرہ مزید 9 ہزار 843 مریض سامنے آئے۔
ماہرینِ صحت نے حکومت کو خبردار کیا ہے کہ کرونا وائرس کی دوسری لہر سے بچنے کے لیے خاطر خواہ اقدامات کیے جائیں۔
خیال رہے کہ رواں سال مارچ میں کرونا وائرس کے باعث فرانس میں لاک ڈاؤن نافذ کیا گیا تھا۔ تاہم معیشت کو پہنچنے والے نقصان کے سبب مئی کے اوائل میں پابندیاں نرم کر دی گئی تھیں۔