روس میں یومیہ کیسز کی تعداد 11 ہزار تک پہنچ گئی
روس میں کرونا وائرس کے یومیہ کیسز کی تعداد میں ایک بار پھر اضافہ ہو رہا ہے اور 24 گھنٹوں کے دوران سامنے آنے والے کیسز 11 ہزار تک پہنچ گئے ہیں۔
امریکہ کی 'جانز ہوپکنز یونیورسٹی' کے اعداد و شمار کے مطابق جمعرات کو روس میں کرونا وائرس کے 11 ہزار 300 سے زائد کیسز رپورٹ ہوئے ہیں۔ اس سے قبل چھ اکتوبر کو بھی روس میں 11 ہزار سے زائد کیسز سامنے آئے تھے۔
روس میں کرونا وائرس کی وبا مئی میں زوروں پر تھی جس کے بعد جولائی میں یومیہ کیسز کی تعداد کم ہونا شروع ہوئی تھی۔
اگست میں روس میں ایک دن کے دوران سامنے آنے والے کیسز کی تعداد پانچ ہزار سے بھی کم ہو گئی تھی۔
البتہ ستمبر کے آخری عشرے میں کیسز دوبارہ بڑھنا شروع ہوئے اور اکتوبر میں یومیہ کیسز کی تعداد ایک بار پھر 10 ہزار سے زائد ہو گئی ہے۔
خیال رہے کہ روس میں وبا کے آغاز سے اب تک کووڈ 19 کے 12 لاکھ 53 ہزار سے زائد کیسز سامنے آ چکے ہیں جب کہ اموات کی تعداد 22 ہزار سے زیادہ ہے۔
آسٹریلیا میں تین ماہ بعد 48 گھنٹوں میں کرونا سے کوئی ہلاکت نہیں ہوئی
آسٹریلیا میں مسلسل دوسرے روز کرونا وائرس سے کوئی ہلاکت نہیں ہوئی ہے اور ایسا آسٹریلیا میں لگ بھگ تین ماہ بعد ہوا ہے۔
گزشتہ 24 گھنٹوں کے دوران آسٹریلوی ریاستوں اور زیرِ انتظام علاقوں میں کووڈ 19 کے 16 کیسز سامنے آئے ہیں جب کہ جمعرات کو 28 کیسز رپورٹ ہوئے تھے۔ البتہ گزشتہ دو روز کے دوران کرونا وائرس سے کوئی ہلاکت نہیں ہوئی۔
خبر رساں ادارے 'رائٹرز' کے مطابق گیارہ جولائی کے بعد یہ پہلا موقع ہے جب آسٹریلیا میں 48 گھنٹوں کے دوران کرونا سے کوئی ہلاکت نہیں ہوئی۔
امریکی فوج کے ایک اور سینئر افسر کرونا وائرس سے متاثر
امریکہ کی فوج کی میرین کور نے کہا ہے کہ اس کے دوسرے اعلیٰ ترین افسر جنرل گیری تھامس بھی کرونا وائرس کا شکار ہو گئے ہیں۔ ان کا کرونا وائرس کا ٹیسٹ بھی مثبت آیا ہے۔
خیال رہے کہ جنرل گیری تھامس امریکہ کی فوج کے دوسرے اعلیٰ ترین افسر ہیں جو کہ رواں ہفتے عالمی وبا سے متاثر ہوئے ہیں۔
اب خدشات ظاہر کیے جا رہے ہیں کہ ان دونوں اعلیٰ افسران سے ملاقات کرنے والے پینٹاگون کے دیگر اعلیٰ حکام بھی وائرس سے متاثر ہو سکتے ہیں۔
جنرل گیری تھامس میرین کور کے اسسٹنٹ کمانڈنٹ ہیں۔ ان میں کرونا وائرس کی معمولی علامات ظاہر ہوئی ہیں۔ انہوں نے خود کو اپنے گھر میں قرنطینہ کر لیا ہے۔
امریکی فوج کی جوائنٹ چیفس آف اسٹاف میں شامل تمام اعلیٰ فوجی افسران قرنطینہ میں جا چکے ہیں۔ ان میں چیئرمین جوائنٹ چیفس آف اسٹاف جنرل مارک ملی بھی شامل ہیں۔
آسٹریلیا: نیو ساؤتھ ویلز میں مزید کیسز سامنے آنے پر نرمی کے امکانات ختم
آسٹریلیا کی گنجان آباد ریاست نیو ساؤتھ ویلز میں ایک ماہ کے دوران جمعرات کو کرونا وائرس کے سب سے زیادہ یومیہ کیسز رپورٹ ہوئے ہیں۔
نیو ساؤتھ ویلز میں گزشتہ 24 گھنٹوں کے دوران 12 نئے کیسز رپورٹ ہوئے ہیں جو دو ستمبر کے بعد سے ایک دن میں سامنے آنے والے کیسز میں سب سے بڑا اضافہ ہے۔ دو ستمبر کو کرونا وائرس کے 17 کیسز رپورٹ ہوئے تھے۔
نئے کیسز کی وجہ سے اس بات کے امکانات بڑھ گئے ہیں کہ اب شاید پابندیوں میں نرمی نہ کی جائے۔
12 نئے کیسز میں سے چار کیسز بیرون ملک سے آسٹریلیا آنے والے افراد سے منتقل ہوئے۔ یہ تمام افراد قرنطینہ میں ہیں۔
دوسری جانب ریاست وکٹوریہ میں کرونا وائرس کی دوسری لہر کے دوران گزشتہ 24 گھنٹوں کے دوران 11 نئے کیسز رپورٹ ہوئے ہیں۔
آسٹریلیا میں کرونا وائرس سے متاثرہ افراد کی مجموعی تعداد 27 ہزار تک پہنچ چکی ہے۔ جب کہ اب تک 900 افراد ہلاک ہو چکے ہیں۔ تاہم یہ تعداد بیشتر ترقی یافتہ ممالک سے بہت کم ہے۔