پاکستان میں مزید 13 اموات، مجموعی ہلاکتیں 6638 ہو گئیں
پاکستان میں گزشتہ 24 گھنٹوں میں کرونا وائرس سے مزید 641 افراد متاثر ہوئے ہیں جب کہ حکام نے 13 افراد کی اموات کی تصدیق کی ہے۔
سرکاری اعداد و شمار کے مطابق پاکستان میں 9 ہزار 174 افراد زیر علاج ہیں جن میں سے 567 انتہائی نگہداشت میں ہیں۔
حکام کے مطابق گزشتہ 24 گھنٹوں میں ملک بھر میں 32 ہزار 465 ٹیسٹ کیے گئے۔ جس کے بعد مجموعی طور پر کیے گئے ٹیسٹس کی تعداد 40 لاکھ 42 ہزار تک پہنچ گئی ہے۔
واضح رہے کہ پاکستان میں کرونا سے تین لاکھ 22 ہزار سے زائد افراد متاثر ہو چکے ہیں جن میں سے تین لاکھ چھ ہزار 640 صحت یاب ہوئے ہیں۔ جب کہ 6638 کی اموات ہوئی ہیں۔
ڈاکٹر انتھونی فاؤچی کا تھیکنس گیونگ ڈے کی تقریبات پر نظرِ ثانی کی تجویز
امریکہ کے اعلیٰ ترین طبی مشیر ڈاکٹر انتھونی فاؤچی نے کہا ہے کہ امریکہ میں نومبر کے آخر میں تھینکس گیونگ ڈے یعنی یوم شکرانہ کا تہوار ہوگا۔ اس موقع پر شہری تقریبات پر نظر ثانی کریں۔
ڈاکٹر انتھونی فاؤچی نے 'اے بی سی' کو انٹرویو دیتے ہوئے لوگوں سے کہا کہ بہت سے لوگ یہ تہوار اپنے خاندان کے ساتھ گزارنے کے لیے سفر کرتے ہیں اور یوں بس اڈوں، ٹرین اسٹیشنز اور ایئر پورٹس پر بے تحاشہ بھیڑ ہوتی ہے۔
ان کے بقول اگر ان کے خاندان میں بزرگ افراد یا ایسے لوگ موجود ہیں جنہیں کرونا وائرس سے کسی قدر متاثر ہونے کا خدشہ موجود ہو تو سوچنا چاہیے کہ کیا ایسی صورتِ حال میں ان کے پاس جانا چاہیے یا نہیں۔
انہوں نے لوگوں کو مشورہ دیا کہ وہ سفر کر کے اپنے خاندان کے افراد کے پاس جانے کے لیے اس وقت تک کا انتظار کریں جب تک کرونا وائرس پر قابو نہیں پا لیا جاتا۔
اسٹاف کا کرونا ٹیسٹ مثبت، کاملا ہیرس کی انتخابی مصروفیات معطل
ڈیموکریٹک پارٹی کی جانب سے نائب صدارت کی امیدوار کاملا ہیرس نے اپنے اسٹاف کے دو ارکان کے کرونا وائرس ٹیسٹ مثبت آنے کے بعد اگلے پیر تک انتخابی مہم میں شرکت نہ کرنے کا فیصلہ کیا ہے۔
صدارتی امیدوار جو بائیڈن کی انتخابی مہم نے جمعرات کو بتایا ہے کہ بائیڈن کا کسی بھی ایسے فرد سے سامنا نہیں ہوا جب کہ آٹھ اکتوبر کو بائیڈن اور ہیرس ریاست ایریزونا میں انتخابی مہم کے دوران کئی گھنٹے اکٹھے شریک رہے۔
شیڈول کے مطابق کاملا ہیرس کو جمعرات کو شمالی کیرولائنا جانا تھا، جہاں ووٹروں سے ایک ملاقات میں انہوں نے الیکشن کے دن سے پہلے ووٹ ڈالنے پر بات کرنا تھی۔
ہیرس کی انتخابی مہم نے صحافیوں کو جمعرات کو بتایا کہ ان کے کمیونیکیشنز کے ڈائریکٹر اور جہاز کے عملے کے ایک رکن کے ایک حالیہ دورے کے بعد کرونا وائرس کے ٹیسٹ مثبت آئے تھے۔
امریکہ: بے روزگاری میں اضافہ، ایک ہفتے میں بے روزگاری الاؤنس کی نو لاکھ درخواستیں
امریکہ میں گزشتہ ہفتے بے روزگاری الاؤنس کے لیے آٹھ لاکھ 98 ہزار امریکیوں نے درخواستیں دی ہیں جو کہ دو ماہ کے عرصے میں تاریخی اضافہ ہے۔ یہ اعداد و شمار اس بات کی بھی عکاسی کرتے ہیں کہ عالمی وبا کے دنوں میں ملازمتوں سے فارغ کیے جانا معیشت کی بحالی میں ایک بڑی رکاوٹ ہے۔
امریکہ کے لیبر ڈپارٹمنٹ کی جاری کردہ رپورٹ دیگر حالیہ ڈیٹا سے مطابقت رکھتی ہے جن میں یہ اشارہ ملتا ہے کہ روزگار کی فراہمی سست روی کا شکار ہے۔
اس سال موسمِ بہار میں عالمی وبا کی وجہ سے کل 22 ملین یعنی دو کروڑ 20لاکھ ملازمتیں ختم ہو گئی تھیں، جن میں سے ایک کروڑ 70 لاکھ ملازمتیں ابھی تک بحال نہیں ہو سکیں ہیں۔
گزشتہ ماہ سے کرونا وائرس سے متاثر ہونے والے مریضوں کی تعداد میں ملک بھر میں اضافہ دیکھا جا رہا ہے جس کی وجہ سے امریکی اب باہر کھانا کھانے، شاپنگ اور دیگر تجارتی سرگرمیوں سے اجتناب برت رہے ہیں۔
ملک بھر میں بے روزگاری مراعات کے لئے درخواستوں میں اضافہ ہو رہا ہے۔ دوسری جانب اسٹمولس پیکج یعنی کاروباروں میں جان ڈالنے کے منصوبے کے تحت امدادی رقوم کی فراہمی پر مذاکرات، ایوان کی سپیکر نینسی پیلوسی اور وزیرخزانہ سٹیو منوچن کے درمیان تعطل کا شکار ہیں۔