دنیا بھر میں وبا سے 11 لاکھ 60 ہزار اموات
دنیا بھر میں کرونا وائرس سے ہلاکتوں کی تعداد 11 لاکھ 60 ہزار تک پہنچ گئی۔
امریکہ کی 'جان ہاپکنز یونیورسٹی' کے اعداد و شمار کے مطابق گزشتہ 24 گھنٹوں میں دنیا بھر میں کرونا وائرس سے 5 ہزار سات سو 70 افراد ہلاک ہوئے۔ جب کہ اس سے ایک دن قبل یعنی اتوار کو وبا سے 3 ہزار 8سو 47 اموات ہوئی تھیں۔
'جان ہاپکنز یونیورسٹی کے اعداد و شمار کے مطابق وبا سے سب سے زیادہ امریکہ میں دو لاکھ 25 ہزار 735 اموات ہوئی ہیں۔
امریکہ کے بعد زیادہ ہلاکتیں برازیل میں ایک لاکھ 57ہزار 397 اموات ہوئی ہیں۔
واضح رہے کہ وبا سے ہلاکتوں کی تعداد میں بھارت تیسرے نمبر پر ہے جہاں حکام نے ایک لاکھ 19 ہزار سے زائد اموات کی تصدیق کی ہے۔
بھارت میں 45 ہزار نئے کیسز، مجموعی مریض 79 لاکھ سے زیادہ
بھارت میں کرونا وائرس کے یومیہ کیسز کی تعداد کم ہو رہی ہے لیکن فضائی آلودگی میں اضافے کے باعث وائرس دوبارہ پھیلنے کے خدشات ظاہر کیے جا رہے ہیں۔
بھارتی وزارتِ صحت کے مطابق پیر کو بھارت میں 45 ہزار سے زائد نئے کیسز رپورٹ ہوئے ہیں جس کے بعد کیسز کی مجموعی تعداد 79 لاکھ سے تجاوز کر گئی ہے۔
گزشتہ 24 گھنٹوں کے دوران بھارت میں 480 افراد کرونا وائرس سے جان کی بازی ہار گئے جس کے بعد اموات کی تعداد بڑھ کر ایک لاکھ 19 ہزار سے زیادہ ہو گئی ہے۔
بھارت کے دارالحکومت نئی دہلی میں یومیہ کیسز میں اضافہ ہو رہا ہے۔ گزشتہ 24 گھنٹوں کے درمیان نئی دہلی میں تقریباً چار ہزار نئے کیسز رپورٹ ہوئے جو گزشتہ پانچ ہفتوں کے دوران یومیہ کیسز کی ریکارڈ تعداد ہے۔
ماہرین صحت نئی دہلی میں کیسز کی تعداد میں ہونے والے اضافے کو فضائی آلودگی سے جوڑ رہے ہیں۔ ماہرین کا کہنا ہے کہ فضائی آلودگی میں اضافہ کرونا وائرس کے بڑھنے کا سبب بن رہا ہے۔
عالمی شہرت یافتہ سابق فٹ بالر رونالڈینیو بھی کرونا وائرس کے شکار
برازیل کے سابق فٹ بالر رونالڈینیو کرونا وائرس کا شکار ہو گئے ہیں۔ بیماری کی تشخیص کے بعد انہوں نے خود کو سب سے الگ تھلگ کر لیا ہے اور وہ ان دنوں ایک ہوٹل میں مقیم ہیں۔
خبر رساں ادارے 'رائٹرز' کے مطابق رونالڈینیو برازیل کے شہر بیلو ہوریزونٹے میں مقامی فٹ بال کلب کی جانب سے کھیل رہے تھے جہاں اُن میں وائرس کی تشخیص ہوئی ہے۔
رونالڈینیو نے اتوار کو انسٹاگرام پر ایک پوسٹ میں کہا کہ وہ گزشتہ روز بیلو ہوریزونٹے پہنچے تھے جہاں اُن کا کرونا وائرس کا ٹیسٹ ہوا جس کی رپورٹ مثبت آئی ہے۔
ان کے بقول وہ ٹھیک ہیں اور ان میں اب تک کرونا وائرس کی بظاہر کوئی علامت نہیں۔
رونالڈینیو کا کہنا ہے کہ جب تک اُن کی طبیعت بہتر نہیں ہوجاتی، وہ ہوٹل میں ہی قیام کریں گے۔