تھینکس گیونگ: لاکھوں امریکیوں کا دوسرے شہروں کا سفر
اس سال امریکیوں سے طبی ماہرین ایک ہی اپیل کر رہے ہیں کہ تھینکس گیونگ پر اپنے پیاروں سے دور رہیں اور اگر ملیں بھی تو فاصلے سے ملیں تاکہ کرونا وائرس کا پھیلاؤ روکا جا سکے۔ لیکن ان ہدایات کے باوجود لاکھوں امریکی اس ہفتے سفر کر رہے ہیں تاکہ یہ تہوار اپنے پیاروں کے ساتھ منا سکیں۔ تفصیلات اس رپورٹ میں۔
پاکستان میں نومبر میں 885 اموات
پاکستان میں کرونا وائرس سے رواں ماہ 885 افراد ہلاک ہو چکے ہیں جب کہ اموات کی مجموعی تعداد آٹھ ہزار کے قریب پہنچ چکی ہے۔
سرکاری اعداد و شمار کے مطابق پاکستان میں گزشتہ 24 گھنٹوں کے دوران مزید 43 افراد وبا کے باعث ہلاک ہوئے ہیں جس کے بعد ملک بھر میں کرونا وائرس سے اموات کی مجموعی تعداد 7985 ہو گئی ہے۔
واضح رہے کہ نومبر میں پاکستان میں اموات کی شرح میں اضافہ ہوا ہے اور ملک بھر میں 885 افراد ہلاک ہوئے ہیں۔
برطانیہ: غلطی سے 1300 افراد کے کرونا ٹیسٹ مثبت آ گئے
برطانیہ میں وزارتِ صحت کا کہنا ہے کہ کرونا ٹیسٹ کرنے والے حکومتی ادارے ‘این ایچ ایس’ کی لیبارٹری میں ہونے والی خرابی کے باعث غلطی سے 1300 سے زائد افراد کے کرونا ٹیسٹ مثبت ظاہر کر دیے گئے۔
این ایچ ایس کے مطابق 1311 ایسے افراد میں غلطی سے کرونا وائرس کی تشخیص کی گئی تھی۔ جن کے ٹیسٹ رواں ماہ 19 سے 23 نومبر کے درمیان کیے گئے تھے۔
ای میل کے ذریعے جاری کردہ بیان میں ادارے کا کہنا ہے کہ ٹیسٹنگ کیمیکلز میں ہونے والی خرابی کے باعث ان ٹیسٹوں کو رد کر دیا گیا ہے۔
بیان میں مزید کہا گیا ہے کہ ٹیسٹوں میں خرابی کی تشخیص کے بعد مذکورہ افراد کو فوری طور پر مطلع کیا گیا اور انہیں کہا گیا کہ وہ فوری طور پر اپنا ٹیسٹ دوبارہ کرائیں۔ بیان کے مطابق ان افراد سے کہا گیا ہے کہ اگر ان میں کرونا کی علامات پائی جاتی ہیں تو وہ اپنے آپ کو علیحدہ رکھیں۔
بیان کے مطابق لیبارٹری میں آنے والی خرابی کی تحقیقات کی جارہی ہیں۔
فرانس: پابندیوں میں نرمی کے بعد حجام کی دکانوں پر رش
یورپی ملک فرانس میں کرونا وائرس کے پیشِ نظر نافذ کردہ پابندیوں میں ہفتے کو کی جانے والی نرمی کے بعد حجام کی دکانیں اور اسٹورز جزوی طور پر کھل گئے ہیں اور لوگوں کا رش دیکھا جا رہا ہے۔
رواں سال 30 اکتوبر کو لگائے گئے لاک ڈاؤن میں نرمی کرتے ہوئے پہلے مرحلے میں غیر ضروری اشیا جیسے، جوتے، کپڑے اور کھلونوں کی دکانوں کو کھولا گیا ہے جب کہ بارز اور ریستوران اگلے سال 20 جنوری تک بند رہیں گے۔
فرانس کے دارالحکومت پیرس میں ایک حجام کا کہنا تھا کہ آن لائن بکنگ کے بغیر آنے والے لوگ دکان کے باہر قطار لگائے کھڑے ہیں۔
ان کا کہنا تھا کہ پابندیوں کی وجہ سے گاہک دکان کے اندر انتظار نہیں کر سکتے۔
حکومت کی طرف سے اس شرط کے ساتھ دکانیں کھولی گئی ہیں کہ دکانوں کے اندر زیادہ لوگ نہیں بیٹھ سکیں گے۔ جس کی وجہ سے چھوٹے دکان داروں کو مشکلات کا سامنا ہے۔
حکومت کی طرف سے دکان داروں کو دکانیں رات نو بجے تک کھولے رکھنے کی اجازت دی گئی ہے۔ تاکہ زیادہ سے زیادہ گاہک آ سکیں۔