برطانیہ: الرجی کے شکار افراد کو ویکسین نہ لینے کا مشورہ
برطانیہ میں حکام نے ان افراد کو کرونا وائرس کی ویکسین لینے سے منع کیا ہے جن کو کسی بھی قسم کی الرجی کی شکایت رہی ہو۔
رپورٹس کے مطابق برطانیہ میں حکام ان اطلاعات کی, کہ دو افراد کو کرونا ویکسین دیے جانے کے بعد ان پر شدید الرجی کا ری ایکشن ہوا تھا، تحقیقات کر رہے ہیں۔
برطانیہ نے گزشتہ روز سے امریکہ کی کمپنی فائزر اور جرمن کمپنی بائیو این ٹیک کے اشتراک سے بنائی گئی ویکسین شہریوں کو بڑے پیمانے پر دینا شروع کی ہے۔
برطانیہ کی میڈیسنز اینڈ ہیلتھ کیئر پروڈکٹس ریگولیٹر ایجنسی کے سربراہ ڈاکٹر جون رائن کا کہنا تھا کہ ایجنسی ان دو رپورٹس کا جائزہ لے رہی ہے جن میں سامنے آیا ہے کہ ویکسین سے الرجک ری ایکشن ہوا ہے۔
واضح رہے کہ فائزر اور بائیو این ٹیک کی ویکسین کے حوالے سے کہا گیا ہے کہ یہ کرونا وائرس کے انسداد میں 95 فی صد تک مؤثر ہے۔
پاکستان میں زیرِ علاج افراد کی تعداد 46 ہزار تک پہنچ گئی
پاکستان میں کرونا وائرس سے متاثرہ زیرِ علاج افراد کی تعداد 45 ہزار 594 ہو گئی ہے جب کہ 2498 مریض انتہائی نگہداشت میں ہیں۔
سرکاری اعداد و شمار کے مطابق پاکستان میں گزشتہ 24 گھنٹوں میں وبا سے مزید 2963 افراد متاثر ہوئے جس کے بعد متاثرہ افراد کی مجموعی تعداد 4 لاکھ 26 ہزار 412 ہو گئی ہے۔
اعداد و شمار کے مطابق پاکستان میں وبا سے متاثرہ 3 لاکھ 72 ہزار 271 افراد صحت یاب ہو چکے ہیں جب کہ 8547 کی موت ہوئی ہے۔
ملک بھر میں متاثرہ افراد کی نشان دہی کے لیے گزشتہ 24 گھنٹوں میں 38 ہزار سے زائد ٹیسٹ کیے گئے۔ جب کہ مجموعی طور پر 85 لاکھ 45 ہزار سے زائد ٹیسٹ کیے جا چکے ہیں۔
پاکستان میں اموات ساڑھے آٹھ ہزار سے متجاوز
پاکستان میں کرونا وائرس سے مزید 60 اموات کے بعد ہلاکتوں کی مجموعی تعداد ساڑھے آٹھ ہزار سے تجاوز کر گئی۔
سرکاری اعداد و شمار کے مطابق پاکستان میں گزشتہ 24 گھنٹوں میں مزید 60 افراد وبا کے باعث ہلاک ہوئے ہیں جس کے بعد اموات کی تعداد 8547 ہو گئی ہے۔
واضح رہے کہ پاکستان میں گزشتہ ماہ کے وسط سے اموات کی شرح میں ایک بار پھر اضافہ ہو رہا ہے۔ گزشتہ روز بھی ملک بھر میں 89 اموات ہوئی تھیں۔ جو کہ 6 ماہ بعد ایک دن میں وبا سے ہلاک ہونے والوں کی سب سے زیادہ تعداد تھی۔
کیسز اور اموات میں اضافے کے باعث حکومت شہریوں سے مسلسل احتیاطی تدابیر پر عمل درآمد کرنے پر زور دے رہی ہے۔
اسپین کے چار شیروں میں کرونا کی تشخیص
یورپی ملک اسپین میں انسانوں کے بعد اب شیروں میں بھی کرونا وائرس کی تشخیص ہوئی ہے۔
بارسلونا کے چڑیا گھر کے چار شیروں کا کرونا وائرس ٹیسٹ مثبت آیا ہے۔ متاثرہ شیروں میں ایک نر اور تین مادائیں شامل ہیں۔
کرونا کے شکار نر شیر کی عمر چار سال جب کہ ماداؤں کی عمریں 16، 16 سال بتائی جاتی ہیں۔
چڑیا گھر کے حکام کا کہنا ہے کہ چاروں شیروں کا چڑیا گھر کے دیگر جانوروں سے کوئی رابطہ نہیں ہوا اور ان میں کرونا وائرس کی معمولی علامات ظاہر ہونے پر ان کا ٹیسٹ کرایا گیا تھا۔
حکام یہ پتا لگانے کی کوشش کر رہے ہیں کہ شیروں میں کرونا وائرس کس طرح پھیلا جب کہ عمومی رائے یہ ہے کہ شیروں میں کرونا وائرس سے متاثرہ چڑیا گھر کے عملے سے رابطے کے نتیجے میں وائرس پھیلا ہو گا۔
شیروں کے ساتھ ساتھ چڑیا گھر کے عملے کے دو افراد میں بھی کرونا وائرس کی تشخیص ہوئی ہے تاہم حتمی نتیجے کے لیے متاثرہ شیروں کا انسانوں کی طرز پر پی سی آر ٹیسٹ کیا جا رہا ہے۔
جانوروں کے علاج پر مامور حکام کے مطابق یہ دوسرا موقع ہے جب اسپین میں بلی کی نسلی سے تعلق رکھنے والے بڑے جانوروں میں کرونا وائرس کی موجودگی کا علم ہوا ہے۔
بارسلونا سے قبل رواں برس اپریل میں نیویارک کے چڑیا گھر برونیکس زو میں چار ٹائیگرز اور تین ببر شیر کرونا وائرس میں مبتلا ہو چکے ہیں۔